Hizqeela 6 - ጌሻ ማፃፋ

እስራኤለ ዙማታስ ኦደትዳ ትንብተ

¹ ጎዳ ቃላይ ታኮ ሀይሳዳ ያግሸ ይስ።

² “ነኖ፥ አሳ ናአዉ፥ እስራኤለ ዙማታ ደሬቃ ፄላሸ፥ ኤንታ ቦላ ትንብተ ኦዳ።

³ ህንተኖ፥ እስራኤለ ደረቶ፥ ኡባ ሃርያ ጎዳ ቃላ ስእተ። ኡባ ሃርያ ጎዳይ እስራኤለ ዙማታኮ፥ ዞዘታኮ፥ ዛንጋራታኮነ ካካታኮ ሀይሳዳ ያጌስ፦ ‘አሳይ ኤቃ ጎይንያ በሳታ ታኒ ይሳናዉ ማሻ የዳና።

⁴ ህንተ ያርሾ ፃርጴዛቲ ላለታና፤ ህንተ እፃነ ጩይስያ ሚሸት መቃና፤ ሀይቅዳ ህንተ አሳይ ህንተ ኤቃታ ስንን የገታና።

⁵ ታኒ እስራኤለ አሳ አሀ ኤንታ ኤቃታ ስንን ዝንእሳና፤ ህንተ መቀታ ህንተ ያርሾ ፃርጴዛታ ዩሾን ላላና።

⁶ ህንተ ደእያ በሳ ኡባን፥ ህንተ ካታማትነ ህንተ ጎይኖ በሳት ላለታና። ሄሳዳካ፥ ህንተ ያርሾ በሳይ ቱናናነ ላለታና፤ ህንተ ኤቃት መቃና፤ ህንተ እፃነ ጩይስያ ሚሸት መቃና፤ ህንተ ኦዳባ ኡባይ ፕተትድ ያና።

⁷ ሀይቅዳ አሳይ ህንተ ግዶን ኩንዳና። ታኒ ጎዳ ግደይሳ ህንተ ሄሳን ኤራና።

⁸ ታኒ ህንተ ግዶን ማሻፈ አትዳ ጉታ ፓፃ አሻና፤ ህንተ ቢታታንነ ካዎተታ ግዶን ላለታና።

⁹ ማሻፈ አትዳ ኤንቲ፥ ድኤትድ ብዳ ካዎተታ ግዶን ደእሸ ታና ሀሳያና። ኤንቲ ባንታ ላይማ ዎዛናንነ አሞትያ አይፍያን ኤቃ ጎይናናዉ ስሚድ ታ ዎዛና መንዳይሳ ኤንቲ አኬካና። ኤንቲ ባንታ ኢታ ኦሱንነ እፀትዳ ኤቃ ጎይኖ ጋሶን ባንታና ሻተታና።

¹⁰ ታኒ ጎዳ ግደይሳ ኤንቲ ኤራና። ታኒ ኤንታ ቦላ ኢታባ ኤሀና ግዳይ ጮ ባብሶ ግዶናይሳ ኤንቲ አኬካና’ ” ያጌስ።

¹¹ ኡባ ሃርያ ጎዳይ ታኮ ሀይሳዳ ያጌስ፦ “እስራኤለ አሳይ እፀትዳ ኤቃ ጎይንዳ ግሾ፥ ነ ሀንቁዋ ብራ ማላዳ በሳ፤ ነ ይሉዋ ቢታ ቃካዳ ቆንጭሳ። ኤንታና አየ! ኤንቲ ኦላን፥ ኮሻንነ ጋዶን ዉራና።

¹² ሃሆን ደኤይ ጋዶን ያና፤ ማታን ደኤይ ኦላን ሀይቃና፤ ፓፃ አትዳይ፥ ኮሻን ዉራና። ሄሳዳ ኦዳ፥ ታ ሀንቁዋ ኤንታ ቦላ ፖላና።

¹³ ኤንታ አሀይ ኤንታ ኤቃታ ግዶ ኡባን፥ ኤንታ ያርሾ በሳ ዩሾ ኡባን፥ ዙማታ ቦላ ኡባን፥ ደረ ቦላ ኡባን፥ ጭልኦ ም ጋርሳ ኡባን፥ ዳሻ ም ጋርሳ ኡባን፥ ባንታ ኤቃታስ ሳውያ ያርሾ ያርሽዳ በሳ ኡባን ኩንድዳ ዎደ ታኒ ጎዳ ግደይሳ ኤራና።

¹⁴ ታኒ ታ ኩሽያ የዳዳ፥ ኤንቲ ደእያ ቢታ ኡባ፥ ዱገሀ መላ ቢታፈ ብድ ፑደሀን ደእያ ደብላታ ጋካናዉ ባይሳ ኦና። ታኒ ጎዳ ግደይሳ ኤንቲ ሄሳን ኤራና” ያጌስ።