Hizqeela 37 - ጌሻ ማፃፋ

መልዳ መቀ ደእያ ዛንጋራ

¹ ጎዳ ኩሸይ ታ ቦላ ደኤስ፤ እያ አያናይ ታና መቀ ኩምዳ ዛንጋራን ዎስ።

² እ ታና ኤንታ ግዶን ያነ ሃነ ዩሽስ፤ ታ ህንች ግድ መልዳ ዳሮ መቀታ ዛንጋራ ግዶን በአስ።

³ እ፥ “አሳ ናአዉ፥ ሀ መቀት ዛሪድ፥ ሸምፖራ ዳናዉ ዳንዳኦና?” ያግስ። ታኒ፥ “ኡባ ሃርያ ጎዳዉ፥ ሀይሳ ነ ኤራሳ” ያጋስ።

⁴ እ ታኮ፥ “ሀ መቀታስ ሀይሳዳ ያጋዳ ትንብተ ኦዳ፤ ህንተኖ፥ መልዳ መቀቶ፥ ጎዳ ቃላ ስእተ።

⁵ ኡባ ሃርያ ጎዳይ ሀ መቀታኮ ሀይሳዳ ያጌስ፦ ‘ታኒ ሸምፖ ህንተ ግዶ ገልሳና፤ ዛሪድ ህንተ ደኦን ዳና።

⁶ ታ ህንተ ቦላ ሻያ ዎና፤ ህንተና አሾ ማይዛና፤ ህንተና ጎጋን ካማና። ህንተ ደኦን ዳና መላ ታ ህንተ ግዶ ሸምፖ ገልሳና። ሄ ዎደ ህንተ ታኒ ጎዳ ግደይሳ ኤራና’ ” ያጌስ።

⁷ እ ታና ኪትዳይሳዳ ትንብተ ኦዳስ፤ ታ ትንብተ ኦዶ ዶምያ ዎደ ግርስ ስኤትስ፤ መቀት ሺቅድ፥ ባ በሳን በሳን ኦይከትዶሶና።

⁸ ታ ፄልያ ዎደ፥ ኤንታ ቦላ ሻይ ደኤስ፤ አሾይ ኤንታ ቦላ በንትስ፤ ጋልባ ማእዶሶና፤ ሽን ሸምፖይ ኤንታ ግዶን ዴና።

⁹ እ ታኮ፥ “አሳ ናአዉ፥ ጫርኩዋስ ትንብተ ኦዳ፤ ነኖ፥ ጫርኩዋዉ፥ ኦይዱ ባጋፈ ሃ ያ፤ ኤንቲ ደኦን ዳና መላ ሀ ሀይቅዳይሳታ ቦላ ሸምፖ ፑና” ያግስ።

¹⁰ እ ታና ኪትዳይሳዳ ትንብተ ኦዳስ፤ ሸምፖይ ኤንታ ግዶ ገልስ፤ ደኦ ደምዶሶና፤ ኤንቲ ዳሮ ኦላንቾ ግድድ ባንታ ቶሆን ኤቅዶሶና።

¹¹ እ ታኮ፥ “አሳ ናአዉ፥ ሀ መቀት እስራኤለ አሳ ሌምሶ፤ እስራኤለ አሳይ፥ ‘ኑ መቀት መልዶሶና፤ ኑ ኡፋይሳይ ይስ፤ ኑባይ ኩመ ሀልስ’ ያጎሶና።

¹² ሄሳ ግሾ፥ ኤንታዉ ሀይሳዳ ያጋዳ ትንብተ ኦዳ፤ ‘ህንተኖ፥ ታ አሳዉ፥ ታኒ ህንተ ዱፉዋ ዶያና፤ ህንተና ያፐ ከሳና፤ ታ ህንተና ዛራዳ፥ እስራኤለ ቢታ ኤሀና።

¹³ ታ አሳዉ፥ ታ ህንተ ዱፉዋ ዶይያ ዎደነ ህንተና ከስያ ዎደ፥ ታ ጎዳ ግደይሳ ህንተ ኤራና።

¹⁴ ታኒ ታ አያና ህንተ ግዶን ዎና፤ ህንተ ደኦን ዳና። ታኒ ህንተና፥ ህንተ ቢታን ዎና። ሄ ዎደ ታኒ ጎዳይ ኦድዳይሳነ ኦዳይሳ ህንተ ኤራና’ ” ያጌስ ኡባ ሃርያ ጎዳይ።

እስ ዳረነ እስ ካዎ

¹⁵ ዛሪድ ጎዳ ቃላይ ሀይሳዳ ያግሸ ታኮ ይስ፦

¹⁶ “አሳ ናአዉ፥ እስ ም ፃምአ ኤካዳ፥ እያ ቦላ፥ ‘ሀይስ ይሁዳስነ እያራ ደእያ እስራኤለ አሳሳ’ ያጋዳ ፃፋ። ቃስ ሀራ ፃምአ ኤካዳ፥ እያ ቦላ፥ ‘ሀይስ ኤፍሬማ፤ ዮሰፋነ እያራ ደእያ እስራኤለ አሳሳ’ ያጋዳ ፃፋ።

¹⁷ ሄሳፈ ጉየ፥ ኤንቲ ነ ኩሸን እስ ፃምአ ግዳና መላ ናምአ እስፈ ጋዳ ኦይካ።

¹⁸ ነ ቢታ አሳይ ኔኮ፥ ‘ሀይስ ነ ኦይስ አይቤ? ኑስ ብርሸ ኦዳ’ ያግድ ኦይችኮ፥

¹⁹ ኡባ ሃርያ ጎዳይ ሀይሳዳ ያጌስ ጋዳ ኦዳ፦ ታኒ ኤፍሬማ ኩሸን ደእያ ዮሰፋ ፃምአነ እያራ ደእያ እስራኤለ ኮቻታ ኤካናዉ ሀናይስ፤ ኤንታ ናምኣ እስ ፃምአ ኦናዉ፥ ይሁዳ ፃምአራ ጋና። ኤንቲ ናምአይ ታ ኩሸን እሶ ግዳና” ያጌስ ኡባ ሃርያ ጎዳይ ያጋዳ ኦዳ።

²⁰ “ሄ ነ ኤንታ ቦላ ፃፍዳ ናምኡ ፃምአታ ኤንታ ስንን ኦይካዳ፥

²¹ ኡባ ሃርያ ጎዳይ ሀይሳዳ ያጌስ ጋዳ ኦዳ። ታኒ እስራኤለ አሳ ኤንቲ ላለትዳ ካዎተታ ግዶፈ ከሳና፤ ታ ኤንታ ሺሻዳ፥ ኤንታ ቢታ ዛራዳ ኤሀና።

²² እስራኤለ ደረታ ቦላነ ኤንታ ቢታን ታ ኤንታ እስ ካዎተ ኦና፤ ኤንታ ኡባ ቦላ እስ ካዎ ካዎና። ቃስ ኤንቲ ዛሪድ ናምኡ ቢታ ግዶኮና፤ ናምኡ ካዎተ ግድድ ሻከቶኮና።

²³ ህዛፐ ጉየ፥ ኤንቲ ባንታ ኤቃታን፥ ባንታ እፀትዳባታንነ ባንታ ናጋራ ኡባን ባንታና ቱንሶኮና። ታኒ ኤንታ ኩንድዳ በሳፈ ደንዳ ናጋራ ኡባፈ ጌሻና። ኤንቲ ታ አሰ ግዳና፤ ታካ ኤንታዉ ፆሰ ግዳና።

²⁴ “ታ አይለይ ዳዊቲ ኤንታዉ ካዎ ግዳና፤ ኤንታ ኡባስ እስ ሄንንቾ ፃላል ዳና። ኤንቲ ታ ህግያ ካላና፤ ታ ዎጋ ምንድ ናጋና።

²⁵ ታኒ ታ አይልያ ያይቆባስ እምዳነ ኤንታ ማይዛት ደእዳ ቢታን ኤንቲ ዳና። ሄ ቢታን ኤንቲ፥ ኤንታ ናይትነ ኤንታ ናይታ ናይት መርናዉ ዳና፤ ታ አይለይ ዳዊቲ ኤንታ ቦላ መርናዉ ካዎ ግዳና።

²⁶ ታ ኤንታራ ሳሮተ ጫቆ ጫቃና፤ ሄ ጫቆይ መርና ጫቆ ግዳና። ታኒ ኤንታ ምንዳ ኤሳና፤ ኤንታ ታይቡዋ ዳርሳና፤ ታ ኬ መርናዉ ኤንታ ግዶን ዎና።

²⁷ ታኒ ያን ኤንታራ ዳና፤ ኤንታዉ ፆሰ ግዳና፤ ኤንቲ ታ አሰ ግዳና።

²⁸ ፆሳ ኬይ ኤንታ ግዶን መርናዉ ደእያ ዎደ፥ እስራኤለ ጌሸይ ታን፥ ጎዳ ግደይሳ ካዎተት ኤራና” ያግስ።