Hizqeela 22 - ጌሻ ማፃፋ

የሩሳላመ ናጋራ

¹ ጎዳ ቃላይ ሀይሳዳ ያግሸ ታኮ ይስ።

² “አሳ ናአዉ፥ ሸምፖ ዎይሳት ኩምዳ ካታማ ቦላ ፕርዳናዉ ጊጋዲ? ያትኮ፥ እ ኦዳ ቱና ኦሶ ኡባ እያዉ ኦዳ።

³ ኡባ ሃርያ ጎዳይ ሀይሳዳ ያጌስ ጋዳ ኦዳ፦ ነ ዳሮ አሳ ዎዳ ግሾነ ኤቃ ጎይኖን ነና ቱንስዳ ግሾ ነ ዮ ዎደይ ጋክስ።

⁴ ነ ጉስዳ ሱን ባላ ግዳዳሳ፤ ነ ኦዳ ኤቃን ቱናዳሳ። ነ ፕርዳ ጋላሳይ ማታትስ፤ ነ ዮ ዎደይ ጋክስ። ሄሳ ግሾ፥ ታ ነና ካዎተታስ ሚቻስነ ሀራ ቢታታስ ቀልቅሴስ አጋና።

⁵ ነኖ፥ ነ ሱንይ ኢትዳ ዳጋም ኩምዳ ካታማዉ፥ ማታንነ ሃሆን ደኤይሳት ነና ቀልቅሳና።

⁶ “ነ ግዶን ደእያ እስራኤለ ሀላቃት ኡባይ ሱ ጉሳናዉ ባንታ ዎልቃ አይ መላ ጎኤትያኮ በአ።

⁷ ነ ግዶን ደኤይሳት ባንታ አዋነ ባንታ አይዉ ቦንቾኮና። ኤንቲ በተ አሳ ጭሞሶና፤ አምኤታነ አዉ አይያ ባይና ናይታ ናቆሶና።

⁸ ኤንቲ ታ ጌሻ ሚሸታ ካኦሶና፤ ታ ሳምባታ ቱንሶሶና።

⁹ ነ ግዶን እሶት እሶት ሀራታ ዎሳናዉ ዎርዶን ኦዶሶና፤ ሀራት ኤቃስ ያርሸትዳባ ሞሶና፤ ሀራት ላይማቶሶና።

¹⁰ ነ ግዶን እሶት እሶት ባ አዋ ማቸራ ቱኖሶና፤ ሀራት ኩሸ መቶይ ደእያ ማጫሳራ ዎልቃን ቱንሶሶና።

¹¹ ነ ግዶን እሶት እሶት ባ ሾሩዋ ማቸራ ቱኖሶና፤ አዋይ ባ ናአ ማቸራ ቱኔስ፤ ባ አዋ ናእዉ፥ ባ ምችዉ ዎልቃን ኢስድ ዬላዬስ።

¹² ነ ግዶን እሶት እሶት ሚሸ ኤክድ፥ ሸምፖ ዎኦሶና፤ ሀራት ባንታ ሚሽያ ባንታ ያራ ግድዳ እስራኤለታስ የሎራ ታልኦሶና፤ ኤንታ ቦንቅድ ባንታዉ ዱረቶሶና፤ ታና ኩመ ዶግዶሶና” ያጌስ ኡባ ሃርያ ጎዳይ።

¹³ “አሳይ በሶና ሚሸ ኤክያ ግሾነ ሸምፖ ዎያ ግሾ፥ ታኒ ታ ኩሽያ ህንተ ቦላ ደንና።

¹⁴ ታ ነና ሴርያ ዎደ ነ ጎባተይ ኔራ ዳኔ? ዎይኮ ነ ኩሸይ ምኖ ግዳኔ? ታኒ ጎዳይ ሀይሳ ኦዳስ፤ ታ ኦድዳይሳዳ ኦና።

¹⁵ ታ ነና ካዎተታ ግዶንነ ቢታታ ግዶን ላላና፤ ነ ቱናተ ኔፐ ድጋና።

¹⁶ ሀራ ካዎተታ ስንን ነ ካዉያና፤ ታኒ ጎዳ ግደይሳ ነ ኤራና” ያግስ።

¹⁷ ጎዳይ ታኮ ሀይሳዳ ያግስ፦

¹⁸ “አሳ ናአዉ፥ እስራኤለ አሳይ አይኮካ ፓኮና፤ ኤንቲ ኡባይ ብራ ሼሽያ ዎደ ናሰ ብራታፐ፥ ቆርቆሮፐ፥ ብራታፐነ እርሳሰፐ ከያ ሻአ መላ።

¹⁹ ሄሳ ግሾ፥ ኡባ ሃርያ ጎዳይ ሀይሳዳ ያጌስ፤ ‘ህንተ ኡባይ አታላ መላ ግድዳ ግሾ ታ ህንተና ኡባ የሩሳላመ ሺሻና።

²⁰ ብራ፥ ናሰ ብራታ፥ ብራታ፥ እርሳሰነ ቆርቆሮ ታማን ሁብድ ሼሸይሳዳ ታ ህንተና ሺሻዳ ታ ሀንቁዋና ትልእሳና።

²¹ ታ ህንተና የሩሳላመ ሺሻዳ፥ ታ ሀንቆ ታማ ህንተ ቦላ ኤዳ ህንተና ያን ትልእሳና።

²² ብር ጮጨን ሼኤይሳዳ ህንተ የሩሳላመን ትልአና። ሄ ዎደ ታኒ ጎዳይ ታ ሀንቁዋ ህንተ ቦላ ጉስዳይሳ ህንተ ኤራና’ ” ያጌስ።

²³ ዛሪድ ጎዳ ቃላይ ሀይሳዳ ያግሸ ታኮ ይስ።

²⁴ “አሳ ናአዉ፥ ኤንታ ቢታይ ቱንዳ ግሾ፥ ታ ሀንቁዋን እር ቡኮና መላ ድጋዳ ኤንታ ሴራ ዶምዳሳ እስራኤለ አሳስ ኦዳ።

²⁵ ነ ግዶን ኤንታ ሀላቃት ዎዳባ ጉድሸ መንረያ ጋሞ መላ፤ ኤንቲ ዎኦሶና፤ ሚሸ ግድን፥ ሀራ ቡቁራ ግድን፥ ኡባ ባንታዉ ኤኮሶና፤ ዳሮ ማጫሳታ አምኦ ኦዶሶና።

²⁶ ካህነት ታ ህግያ መንዶሶና፤ ታ ጌሻባታ ቦንችቦኮና። ጌሽነ ጌሽ ግዶና ባ ሻኮኮና፤ ቱናነ ቱና ግዶና ባ ሻክድ ታማርሶኮና፤ ታ ሳምባታ የግ አግደታ። ሄሳ ጋሶን ታ እስራኤለ አሳ ግዶን ቦንቸታብከ።

²⁷ ሀላቃት ባንታ ዎዳባ ዱሰረያ ሱመ መላ፤ ኤንቲ ባንታዉ በሶና ዱረተ ደማናዉ ሸምፖ ዎኦሶና።

²⁸ ናበት ጎዳ ቦቅንተ ትይያ አሳዳ፥ ዎርዶ ቆንጨ በእድ፥ ዎርዶ ትንብተ ኦድድ ኤንታ ናጋራ ገንሶና። ጎዳይ ኦዶና ደእሽን፥ ‘ኡባ ሃርያ ጎዳይ ሀይሳዳ ያጌስ’ ያጎሶና።

²⁹ ቢታን ደእያ አሳይ ቦንቆሶና፤ ማንቆታነ መቶታንቾታ ኡንኤሶና፤ ኤንቲ ሱረ ፕርዳ ድግድ በተ አሳ ጌላዮሶና።

³⁰ “ታኒ ቢታ ይሶና መላ ድርሳ ግምብያ ኬፀይ፥ ላለትዳ ድርሳ ግምብያ ባጋራ ታ ስንን ኤቅድ ናግያ እስ አስ ኮያስ፤ ሽን ኦናካ ደማብከ።

³¹ ሄሳ ግሾ፥ ታ ሀንቁዋ ኤንታ ቦላ ጉሳና፤ ታኒ ታ ይሉዋን ኤንታ ይሳና፤ ኤንቲ ኦሱዋ ኤንታ ቦላ ዛራና” ያጌስ ኡባ ሃርያ ጎዳይ።