Hizqeela 21 - ጌሻ ማፃፋ

ባብሎነ ማሻ

¹ ጎዳ ቃላይ ሀይሳዳ ያግሸ ታኮ ይስ።

² “አሳ ናአዉ፥ ነ ሶምኡዋ የሩሳላመኮ ዛራዳ፥ አሳይ ጎይንያ በሳታ ቦላነ እስራኤለ ቢታ ቦላ ትንብተ ኦዳ።

³ ሀይሳዳ ያጋ፦ ‘ታኒ ነዉ ሞርከ። ታኒ ታ ማሻ ሾሁዋፐ ሾዳዳ፥ ነ ግዶፐ ፅሎ አሳነ ኢታ አሳ ኡባ ዉርሳና።

⁴ ፅሉዋነ ናጋራንቹዋ ኡባ ይሳናዉ ዱገሀፐ ፑደሀ ጋካናዉ ደእያ አሳ ኡባ ቦላ ታ ማሻ ሾዳና።

⁵ ታኒ ጎዳይ፥ ታ ማሻ ሾሁዋፐ ሾድዳይሳነ ጉየ ዛሮናይሳ አሳ ኡባይ ኤራና’ ” ያጌስ።

⁶ “ሄሳ ግሾ፥ አሳ ናአዉ፥ አሳ ኡባይ ፄልሽን፥ ነ ዎዛናይ መቅን፥ ጫመታዳ ኦላ።

⁷ ‘አይስ ኦላይ?’ ያግድ ኤንቲ ነና ኦይችኮ፥ ‘ስንራ ያ ኢታ ዎርያ ግሾ ኦላይስ’ ያጋ። ሄ ዎርያን፥ ‘ዎዛን ኡባይ ያሻን ሴራና፤ ኩሸ ኡባይ አርጋጫና፤ ጎባተ ኡባይ ኤከታና፤ ጉልባት ኡባይ ኮኮራና። ሄ ዎደይ ጋክስ፤ ቱማ ፖለታና’ ” ያጌስ ኡባ ሃርያ ጎዳይ።

⁸ ጎዳ ቃላይ ሀይሳዳ ያግሸ ታኮ ይስ፦

⁹ “አሳ ናአዉ፥ ትንብተ ኦዳ፤ ታኒ ጎዳይ ኦድያባ አሳስ ኦዳ፤ ማሻ፤ ሌፈትዳነ ቁሸትዳ ማሻ።

¹⁰ “ጎራአናዉ ሌፈትስ፤ ዎልአን መላ ጶላናዉ ቁሸትስ። ታ አሳይ እመትዳ ሴራ እፅዳ ግሾ፥ ህዛፐ ጉየ፥ ኦንካ ኡፋይተና።

¹¹ ጎኤታናዉ ማሻይ ቁሸትስ፤ ሌፈትድነ ቁሸትድ፥ ጎራኤይሳስ እመታናሳ።

¹² አሳ ናአዉ፥ ዬካነ ዘሌላ፤ ሀ ማሻይ ጊገትዳይ ታ አሳ ቦላነ እስራኤለ ሀላቃታ ቦላና። ሀላቃት ታ አሳራ እስፈ ማሻን ሀይቃና፤ ሄሳ ግሾ፥ አዛናዳ ነ ትራ ቆፃ።

¹³ ታኒ ታ አሳ ፓጫና፤ ኤንቲ ናጋራ ፓፆና እፅኮ፥ ሀ መቶይ ኡባይ ኤንታ ቦላ ያና፤ ኡባ ሃርያ ጎዳይ ሀይሳ ኦድስ።

¹⁴ “ሀእካ አሳ ናአዉ፥ ትንብተ ኦዳ፤ ነ ኩሽያ ባቃ። ሄ ዎደ ማሽ ናምኡ ቶሆ ሄ ቶሆ ዛሪድ ሾጫና፤ ሄስካ ዳጋንያ፥ ዩሹዋ ኡባን ዎያነ ሹክያ ማሽ።

¹⁵ ሄስ ኤንታ ዎዛናይ ትልአናዳነ ኤንታፈ ዳሮት በታናዳ ኦና። ህንተና አየ! ህንተ ፐንገን ማሽ ዎልአን መላ ዎልአሜስ፤ ሹካናዉ ሾሆፐ ሾደትስ።

¹⁶ ነኖ፥ ቃራ ማሻዉ፥ ኡሻችነ ሀድርስ ስምዳ ነ ስምዳ ባጋ ኡባ ቡ።

¹⁷ ህዛ ታኒ ታ ኩሽያ ባቃና፤ ታ ሀንቆይ ዶቻና” ያጌስ ጎዳይ።

¹⁸ ጎዳ ቃላይ ሀይሳዳ ያግሸ ታኮ ይስ።

¹⁹ “አሳ ናአዉ፥ ባብሎነ ካዋ ማሻይ ያ ናምኡ ኦገታን ማላ ዎ። ናምኡ ኦገት እስ ቢታፈ ደንዶሶና፤ ኦገይ ካታማኮ ስምያ ኦገን ማላታ ቱሱ ኤሳ።

²⁰ እስ ኦግያን ደእያ ማላ ራባ ጌተትያ አሞነ ካታማ ብያ ኦግያ ማሌስ፤ ሀንኮይ ኦገይ ግምበትዳ ይሁዳን ደእያ የሩሳላመ ካታማ ብያ ኦግያ ማሌስ።

²¹ ባብሎነ ካዎይ ኦገት ጋሄትያ ዳጋላን፥ ማላ ቱሳታ ማታን ኤቄስ። እ አዉ ኦግያራ ባነኮ ኤራናዉ፥ ዶንገ ቶራን ሳማ የጋና፤ ባ ኤቃታ ዞረ ኦይቻና፤ ማራጭያ በአና።

²² ግምብያ ፐንግያ ላልያ ዱሩማ ኤሀና መላ፥ ዎ ኪታ አና መላ፥ ጬቀታና መላ፥ ድርሳ ፐንግያ ላልያ ዱሩማ ካታማ ፐንገን ኤሳና መላ፥ ቢታ ዶራና መላነ ሚፃ ጊግሳና መላ የሩሳላመ ሳም እያዉ ኡሻቻ ኩሸን ከይስ።

²³ የሩሳላመ አሳይ ባብሎነ ካዉዋራ ጫቅዳ ግሾ፥ ሄስ ባንታ ቦላ ጋካና ግድ ቆፕቦኮና። ሽን ባብሎነ ካዎይ ኤንታ ድእያ ዎደ ኤንቲ ባንታ ናጋራ ሀሳያና።

²⁴ ሄሳ ግሾ፥ ኡባ ሃርያ ጎዳይ ሀይሳዳ ያጌስ፤ ህንተ ናጋራይ ቆንጭስ፤ ህንተ ባላ ግደይሳ አሳ ኡባይ ኤሬስ፤ ህንተ ኦሶይ ህንተ ናጋራንቾ ግደይሳ በሴስ። ሄሳ ግሾ፥ ህንተ ኢታ ኦሶይ ሀሳየታና፤ ህንተ፥ ህንተ ሞርከታስ አድ እመታና።

²⁵ “ነኖ፥ ኢታነ ቱና ግድዳ እስራኤለ ሀላቃዉ፥ ነ ፕርዳ ጋላሳይ ጋክስ።

²⁶ ኡባ ሃርያ ጎዳይ ሀይሳዳ ያጌስ፦ ነ ሁጵያፐ ካላቻ ደን፤ ነ ሁጰ ፃ ቃራ። ህዛፐ ጉየ ካሰይሳዳ ሀናናባይ ባዋ፤ ዝቃይ ቁ ጋና፤ ቃይ ዝቅ ጋነ።

²⁷ ጋዶ! ጋዶ! ታኒ ሀ ካታማ ይሳና። ፕርዳናዉ ማት ደኤይስ ያና ጋካናዉ ሀ ካታማይ ዛሪድ ኬፀተና። እ ያ ዎደ ታ እያዉ አዳ እማና” ያጌስ።

²⁸ አሳ ናአዉ፥ ሀይሳዳ ያጋዳ ትንብተ ኦዳ። እስራኤለ ጫይያ አሞነታ ኡባ ሃርያ ጎዳይ ሀይሳዳ ያጌስ ጋዳ ኦዳ። “ይስያ ማሽ ሾሆፐ ሾደትስ፤ ዎናዉ ዎልአሜስ፤ ዉርሳናዉ ቁሸቴስ።

²⁹ ህንተ በእያ ቆንጨይ ዎርዶ፤ ህንተ ኦድያ ትንብተይ ዎርዶ። ህንተ ኢታነ ቱና አስ፤ ህንተ ፕርዳ ጋላሳይ ጋክስ ህንተ ቆን ማሽ ዎና ሀኔስ።

³⁰ ማሻ ሾሁዋን ዛርተ፤ ህንተ መትዳ በሳን፥ ህንተ የለትዳ ቢታን ታ ህንተ ቦላ ፕርዳና።

³¹ ታኒ ታ ሀንቁዋ ህንተ ቦላ ጉሳና፤ ታ ሀንቆ ታማይ ህንተ ቦላ ኤፃና፤ ይሶ ሜዘትዳ፥ ዎዛና ምኖ አሳስ አዳ እማና።

³² ህንተ ታማን ያና፤ ህንተ ሱይ ህንተ ቢታን ጉካና፤ ህንተ ዛሪድ ሀሳየተከታ። ታኒ ጎዳይ ሀይሳ ኦዳስ” ያግስ።