Hizqeela 19 - ጌሻ ማፃፋ

እስራኤለ ካዎታስ ከስዳ ዘለልስ

¹ ጎዳይ ህዝቄላኮ፥ እስራኤለ ሀላቃታስ ሀይሳዳ ያጋዳ ዘሌላ፦

² “ህንተ አይያ ጋሞታ ግዶን ዋንዳ ጋሞ! ያላጋ ጋሞታ ግዶን ዝንአዳ፥ ባ ማራታ ድቻሱ።

³ እያ ባ ማራታፐ እሱዋ ድችን፥ እ ዎዳላ ጋሞ ግድስ፤ ሻንካ ታማርስ፤ አሰ ሙሱ ዶምስ።

⁴ ካዎተት ኡባይ እያባ ስእዶሶና፤ ኤንቲ ቦክዳ ኦላን ገልድ ኦይከትስ፤ ሲን ዎዶሮ አድ ግብፀ ቢታ ኤፍዶሶና።

⁵ እያ አይያ ናግዳይስ ሀኖና እፅን፥ እ ኡፋይሳይ ይዳይሳ በእዳ ዎደ፥ ባ ማራታፐ እሱዋ ድቻዳ፥ ዎዳላ ጋሞ ከሳሱ።

⁶ እ ዎዳላ ጋሞ ግድድ፥ ሀራ ጋሞታራ ስመረትስ፤ እ ሻንካ ታማርስ፤ አሰ ሙሱ ኦይክስ።

⁷ እ ኤንታ ሚፃ መንረስ፤ ካታማታ ይስስ፤ እ ጉድያ ዎደ ቢታን ደእያ አሳ ኡባይ ዳጋሜስ።

⁸ እያ ዩሹዋን ደእያ ካዎተት ኡባይ እያ ኦይካናዉ ፅሄ ዎዶሶና፤ ባንታ ግትያ ምጭዶሶና፤ ኤንታ ኦላን እ ኦይከትስ፤

⁹ ኤንቲ እያ ስን ዎዶሮ አድ ሆን የግድ፥ ባብሎነ ካዋኮ ኤፍዶሶና። እ ጉደይስ ዛሪድ እስራኤለን ስኤቶና መላ ኤንቲ እያ ቃሾ ኬን የግዶሶና።

¹⁰ ነ አይያ ሃ ዶናን ቶከትዳ ዎይነ መላ፤ ዳሮ ሃ ደእያ ግሾ ዎይነይ ዳሻንነ አይፈን ኩምድ ደኤስ።

¹¹ እያ ታሸት ምኖ ግድያ ግሾ ካዎታ ፃምአ ግድዶሶና። ዎይነይ ዎራን ደእያ ምታፐ አድ ድጭስ፤ ባ ታሽያ ዳሮተንነ አዱሳተን ኡባፈ ቦላራ በንትስ።

¹² ሽን ሄ ዎይነይ ሀንቆን ሾደትድ ሳአን የገትስ፤ ዶሎሀ ጫርኮይ እያ አይፍያ መልስስ፤ እያ ምኖ ታሸይ መልን ታም ምስ።

¹³ ሀእ እ ሃ ባይና መላ ቢታን ቶከትስ።

¹⁴ ታም እያ ኡባፈ ከይድ፥ እያ አይፍያነ ታሽያ ምስ። ካዎታ ፃምአ ግዳና ምኖ ታሸይ፥ እያ ቦላ በንትቤና። ሀይስ ዬሆ ዘለልስ፤ ሀይሳ ዘለልስ ከስያ ዎደ ጎኤታናዉ በሴስ” ያግስ።