Hizqeela 17 - ጌሻ ማፃፋአርጋንነ ዎይነ ሌምሶ 1 ጎዳ ቃላይ ሀይሳዳ ያግድ ታኮ ይስ፦ 2 “አሳ ናአዉ፥ እስራኤለ አሳስ ቃንእሽን ኦዳ፤ ሌምሶን ቆንጭሳ። 3 ኡባ ሃርያ ጎዳይ ሀይሳዳ ያጌስ ጋዳ ኦዳ። ‘ግታ ቀፈይነ ዱማ ዱማ ማላራ ደእያ ባለት ደእያ እስ አርጋን ደኤስ። ሄ አርጋንይ ልባኖሰ ይድ ዝጋ ፄራን ኦይክስ። 4 ሄ ዝጋ ፄራ መን ኤክድ፥ ዛልኤይ ዳርያ ቢታ ኤፍድ ዛልአንቾታ ካታማን ቶክስ። 5 እ እስራኤለ ቢታፈ አጫ ኤፍድ፥ አራዳ ቢታን፥ ሃ ማታን ቶክስ። 6 አጫይ ዳሮ አዱቆና ደእሸ ዳይድ አርጋንኮ ስሚድ ድጭስ፤ ሽን እያ ፃጶይ ቢታ ግዶ ገልስ። ሄ ዎይነይ ዳሮ ታሸነ ሀይ ከስስ። 7 ሄሳዳካ፥ ግታ ቀፈይነ ዳሮ ባለት ደእያ ሀራ አርጋን ደኤስ። ሃ ደማናዉ ሄ ዎይነይ ባ ቶከትዳ በሳፈ ሄ አርጋንይ ደእያ በሳኮ ባ ፃጱዋነ ባ ታሽያ የድስ። 8 ሽን፥ ሄ ዎይነይ ታሸ ከሳና መላ፥ አይፈ አይፋና መላነ ሎኦ ዎይነ ግዳና መላ አራዳ ቢታን፥ ዳሮ ሃ ደእያ በሳን ቶከትስ’ ” ያጌስ። 9 ኡባ ሃርያ ጎዳይ ሀይሳዳ ያጌስ ጋዳ ኦዳ። “ሄ ዎይነይ ድጫኔ? ኮይሮ እያ ቶክዳ አርጋንይ እያ ሾደኔ? እያ አይፈታ ቆቆፍድ፥ እያ እርፃ ሀይታ መልሰኔ? እያ ሄ በሳፈ ፃጶራ ሾዳናዉ ግታ ዎልቃ ዎይኮ ዳሮ አስ ኮሸና። 10 እያ ሾድድ፥ ሀራ በሳን ቶክያኮ እ ድጫኔ? ዶሎሀ ባጋ ጫርኮይ ሾጭን ባ ቶከትዳ በሳን መለኔ?” 11 ጎዳ ቃላይ ሀይሳዳ ያግሸ ታኮ ይስ፦ 12 “ሄ ሌምሱዋ ብርሸይ አይበኮ አነ ሀ ጌላ አሳታ ኦይቻ። ሄስ አይበ ጊኮ፥ ባብሎነ ካዎይ የሩሳላመ ይድ፥ ኤንታ ካዋነ ኤንታ ሀላቃታ ድእድ፥ ባብሎነ ኤፍስ። 13 ካዋ ሶ አሳፐ እሱዋ ኤክድ፥ ባራ ጫቅስድ፥ አሳ ግዶፈ ኤረትዳይሳታ ድእድ ኤፍስ። 14 ሄሳ ኦዳይ ኤንታ ካዎተይ ዎልቃ ይድ፥ ዛሪድ ደንዶናዳ ባንታ ጫቁዋ ፃላላ ናግድ ዳና መላሳ። 15 ሽን ይሁዳ ካዎይ ማካልድ፥ ፓራታነ ዳሮ ኦላንቾታ የዳና መላ ግብፀ ኪትስ። ያትን ሄስ ሀናንዴ? ሄሳ ኦዳ እ ከስ ኤካንዴ? እ ጫቁዋ መንድ ሴረቶና አታንዴ?” 16 “ታኒ ኡባ ሃርያ ጎዳይ ታ ደኡዋን ጫቃስ። ባና ካዎዳ ካዋ ጫቁዋ መንዳ ግሾነ ጫቁዋ ካዳ ግሾ፥ ሄ ካዋ ቢታን፥ ባብሎነን እ ሀይቃና። 17 ባብሎነ ኦላንቾት ዳሮ አሳ ዎናዉ ግምብያ ዩሾን ቢታ ዶርድ ድርስ ጊግስያ ዎደ፥ ግብፀ ካዎይ ባ ኦላንቾታራነ ባ ዳሮ አሳራ ይድ አይኮካ ማደና። 18 እ ጫቆ ካድ መንዳ ግሾነ ባ ኩሽያ እምድ፥ ባ ግዳ ባ ኡባ ፖሎና አግዳ ግሾ ከስ ኤካናዉ ዳንዳኤና።” 19 “ታኒ ኡባ ሃርያ ጎዳይ ታ ደኡዋን ጫቃስ። እ ጫቁዋ ካድ ታ ጫቁዋ መንዳ ግሾ ታ ሱንን ጫቅዳስ ታ እያ ቦላ ዛራዳ ኤሀና። 20 ታኒ ታ ግትያ እያ ቦላ ምጭን፥ እ ታ ፅህያን ኦይከታና። እ ታዉ አማነቶና እፅዳ ግሾ ታ እያ ባብሎነ ኤፋዳ፥ ያን እያ ቦላ ፕርዳና። 21 ዶረትዳ እያ ኦላንቾት ማሻን ሀይቃና፤ አትዳይሳት ዱማ ዱማ በሳራ ላለታና።” ሄሳ ኦደይ ታና፥ ጎዳ ግደይሳ ህንተ ኤራና። 22 ኡባ ሃርያ ጎዳይ ሀይሳዳ ያጌስ፤ “ታኒ ታ ሁጰን አዱሳ ዝጋ ፄራ ቃንፃ ኤካዳ፥ ቃነ አዱሳ ዙማ ሁጰን ቶካና። 23 ታኒ እያ እስራኤለ ዙማ ሁጰን ቶካና፤ ያን ዳያና፤ አይፈ አይፋናነ ሎኦ ዝጋ ግዳና። ካፎ ኮቸ ኡባይ እያን ኬፃና፤ ኤንቲ እያ ታሽያ ኩያን ሸምፓና። 24 አዱሳ ም ዝቅ ኦይነ ቃን ም ቁ ኦይ፥ ቃስ ጭልኦ ም መልሰይነ መላ ም አጭሰይ ታና ጎዳ ግደይሳ ቢታን ደእያ ም ኡባይ ኤራና። ታኒ ጎዳይ ሀይሳ ኦዳስ፤ ታ ኦድዳይሳ ታ ኦና” ያጌስ። |
The Word for the World International and The Word for the World Ethiopia