Hizqeela 13 - ጌሻ ማፃፋ

ዎርዶ ናበታ ቦላ ኦደትዳ ትንብተ

¹ ጎዳ ቃላይ ሀይሳዳ ያግሸ ታኮ ይስ።

² “ነኖ አሳ ናአዉ፥ እስራኤለን ትንብተ ኦድያ ናበታ ቦላ ነ ትንብተ ኦዳ። ባንታዉ መ ከስድ ትንብተ ኦደይሳታ ሀይሳዳ ያጋ፤ ጎዳ ቃላ ስእተ።

³ ኡባ ሃርያ ጎዳይ ሀይሳዳ ያጌስ፦ ‘አይባካ በኦና ባንታ ቆፋን ደንድድ ትንብተ ኦድያ ኤያ ናበታ አየ!’

⁴ እስራኤለ አሳዉ፥ ህንተ ናበት ላለትዳ ካታማን ደእያ ዎርካናታ መላ።

⁵ ጎዳ ጋላሳን ኦላን ምንድ ኤቃና መላ እስራኤለ አሳ ድርሳ ግምብያ ምንድ ኤስቤከታ፤ ፑደ ላለትዳ በሳ ከይበከታ።

⁶ ኤንታ ቆንጨይነ ኤንታ ብታይ ዎርዶ። ኤንቲ ጎዳይ ኪቶናሽን፥ ጎዳይ ሀይሳዳ ያጌስ ያጎሶና። ኤንቲ ኦደይሳ ጎዳይ ፖላና ግድ ናጎሶና።

⁷ ታኒ ኦዶናሽን፥ ጎዳይ ሀይሳዳ ያጌስ ያግድ ኦድያነ ዎርዶ ቆንጨ በኤይሳታነ ሙራንቾታ ግደከቲ?” ያጌስ።

⁸ ሄሳ ግሾ፥ ኡባ ሃርያ ጎዳይ ሀይሳዳ ያጌስ፤ “ህንተ በእዳ ቆንጨነ ህንተ ኦድዳ ትንብተይ ዎርዶ ግድያ ግሾ ታ ህንተዉ ሞርከ ግዳና።

⁹ ዎርዶ ቆንጨ በእያነ ሙራንችያ ናበታ ቦላ ታኒ ታ ኩሽያ ደንና። ኤንቲ ታ አሳ ዞረታን ገሎኮና፤ እስራኤለ አሳ ማዝጋበን ፃፈቶኮና፤ ኤንቲ እስራኤለ ቢታ ገሎኮና። ሄ ዎደ ታ ኡባ ሃርያ ጎዳ ግደይሳ ህንተ ኤራና።

¹⁰ “ሳሮይ ባይናሽን ሳእ ሳሮ ያግድ ታ አሳ ባለሶና። አሳይ ሹቹ ኬልድ ዶርን፥ ኤንቲ ቦቅንተ ትዮሶና።

¹¹ ሀ ቦቅንተ ትየይሳታስ፤ ሀ ህንተ ትይዳ ግምበይ ኩንዳና፤ ዎልቃማ እር ቡካና። ታኒ ግታ ሻች የጋና፤ ዎልቃማ ጎተይ ደንዳና።

¹² ሄ ግምበይ ኩንድያ ዎደ አሳይ ህንተ ትይዳ ኖራይ አኔ? ያግድ ኦይቾና አጋነ” ያጌስ።

¹³ ኡባ ሃርያ ጎዳይ ሀይሳዳ ያጌስ፦ “ታኒ ግምብያ ላላናዉ፤ ታ ሀንቁዋን ዎልቃማ ጎተ የዳና፤ ታ ይሉዋን ግታ ሻቻ ኪታና፥ ታ ሸንያን ዎልቃማ እራ ቡክሳና።

¹⁴ ህንተ ቦቅንተ ትይዳ ግምብያ ታ መንረና፤ ባሶይ በንታና ጋካናዉ ላላና። እ ኩንድያ ዎደ ህንተ እያ ግዶን ሀይቃና፤ ሄ ዎደ ታኒ ጎዳ ግደይሳ ህንተ ኤራና።

¹⁵ ታ ሀንቆይ ግምብያ ቦላነ ግምብያ ቦቅንተ ትይዳ አሳታ ቦላ ዎና። ታ ህንተኮ፥ ‘ግምበይ ባዋ፤ ግምብያ ቦቅንተ ትይዳይሳትካ ዶኮና።

¹⁶ እስራኤለን ደእያ ናበት፥ የሩሳላመባ ትንብተ ኦደይሳት፥ ሳሮይ ባይናሽን ሳሮ ቆንጨ በኤይሳት ዶኮና’ ” ያጌስ ኡባ ሃርያ ጎዳይ።

¹⁷ “ነኖ አሳ ናአዉ፥ ባንታ ቆፋን ደንድድ፥ ትንብተ ኦድያ ማጫሳ ደሬቃ ፄላዳ ኤንታ ቦላ ትንብተ ኦዳ።

¹⁸ ኡባ ሃርያ ጎዳይ ሀይሳዳ ያጌስ፦ ‘ሀራ አሳ ቦላ ዎልቅ ዳናዳ፥ ኤንታ ሀሽያ ቦላ ሙሩኖባ ስክያነ አሳስ ኡባስ ቢታ ቃጨ ጊግስያ ማጫሳ አየ! ህንተ ታ አሳ ፅሄን ኦይክድ ህንተ ሸምፑዋ አሻኔ?

¹⁹ እስ ኮጰ ባንጋ ዎይኮ እስ ባሶ ኡይ ደማናዉ፥ ዬላያባ ኦድ፥ ታ አሳ ስንን ታና ካዉሼታ። ህንተ ሀይቃናዉ በሶናይሳታ ዎድ ዳናዉ በሶናይሳታ አሼታ። ያትድ ታ አሳ ዎርዶ ኦዴታ፤ ኤንትካ ህንተ ዎርዱዋ ስኦሶና’ ” ያጌስ።

²⁰ ሄሳ ግሾ፥ ኡባ ሃርያ ጎዳይ ሀይሳዳ ያጌስ፦ “ህንተዉ ሀራ አሳ ቦላ ዎልቅ ዳና መላ ህንተ ኩሸን ቃችዳ ሙሩኑዋ ቃጭያ ታ ዳፋ ኤካና። ታ እያ ህንተ ኩሽያፐ ዱ ሆላና፤ ፅሄፐ ከስ ኤክያ ካፎዳ ታ ኤንታ ህንተ ፅህያፐ ከሳ ኤካና።

²¹ ታኒ ህንተ ሻሽያ ቃራ ኤካዳ፥ ታ አሳ መርናዉ ህንተ ኩሸፐ አሻና። ታኒ ጎዳ ህንተ ሄ ዎደ ኤራና።

²² ታኒ አዛንቦና ፅሎ አሳ ዎዛና ህንተ ዎርዶን አዛንደታ፤ ናጋራንቾት ባንታ ኢታ ኦሱዋፐ ስሚድ፥ ባንታ ሸምፑዋ አሾና መላ ኤንታ ምንደታ።

²³ ህዛፐ ህንተ ዎርዶ ቆንጨ በኤከታ፤ ሙሩነከታ። ታኒ ታ አሳ ህንተ ኩሸፐ ከሳ ኤካና። ታኒ ጎዳ ግደይሳ ህንተ ሄ ዎደ ኤራና” ያጌስ።