Hizqeela 11 - ጌሻ ማፃፋ

እስራኤለ ካለይሳት ፕርደታና

¹ ፆሳ አያናይ ታና ደንድ፥ ፆሳ ኬስ ዶሎሀ ባጋ ፐንግያኮ ኤፍስ። ፐንግያ ማታን ላታማነ እቻሹ አደት ደኦሶና፤ ኤንታ ግዶን አሳ ካለያ አዙራ ናኣ ያእዛና ባናያ ናኣ ፓላፃ በአስ።

² ጎዳይ ታኮ፥ “ነኖ አሳ ናአዉ፥ ሀ አሳይ ካታማ ቦላ ኢታ ቆፋ ቆፖሶና፤ ኢታ ዞረ ዞረቶሶና።

³ ኤንቲ፥ ‘ኑኒ ኬ ዛሪድ ኬፃና ዎደይ ማታትስ። ሀ ካታማይ አሾ ፃሮ፤ ኑኒ ቃስ አሾ’ ያጎሶና።

⁴ ሄሳ ግሾ፥ ትንብተ ኦዳ፤ አሳ ናአዉ፥ ኤንታ ቦላ ትንብተ ኦዳ” ያግስ።

⁵ ጎዳ አያናይ ታ ቦላ ዎድ፥ ታኮ ሀይሳዳ ያግስ፦ “እስራኤለ አሳዉ፥ ህንተ ሄሳዳ ጌታ፤ ሽን ታ ህንተ አይ ቆፕያኮ ኤራይስ።

⁶ ሀ ካታማን ህንተ ዳሮ አሳ ዎድ፥ ኦገ ኡባን አሀ ኩንደታ” ያጌስ።

⁷ ሄሳ ግሾ፥ ኡባ ሃርያ ጎዳይ ሀይሳዳ ያጌስ፤ “ህንተ ዎድ የግዳ አሀይ አሾ፤ ሀ ካታማይ አሾ ፃሮ፤ ሽን ታ ህንተና ሀ ካታማፐ የደዳ ከሳና።

⁸ ህንተ ኦላስ ያይደታ፤ ሽን ታ ህንተ ያይዳ ኦላ ህንተ ቦላ ኤሀና።

⁹ ታ ህንተና ሀ ካታማፐ ከሳዳ፥ አላጋታ ኩሸን አዳ እማና፤ ታ ህንተና ህንቴ ዛዋን ፕርዳና።

¹⁰ ህንተ ኦላን ዉራና፤ ታ ህንተና ህንተ ቢታን ፕርዳና። ሄ ዎደ ህንተ ታ ጎዳ ግደይሳ ኤራና።

¹¹ ሀ ካታማይ ህንተዉ አሾ ፃሮ ግደና፤ ህንተካ እያ ግዶን አሾ ግደከታ። ታ ህንተ ቦላ እስራኤለ ዛዋን ፕርዳና።

¹² ህንተ ታ ህግያነ ታ ዎጋ ሻርድ ህንተ ዩሹዋን ደእያ ካዎተታ ዎጋ መላ ደእዳ ግሾ ህንተ ቦላ ፕርደይ ጎዳ ግደይሳ ህንተ ኤራና” ያጌስ ኡባ ሃርያ ጎዳይ።

¹³ ታ ትንብተ ኦድያ ዎደ ባናያ ናኣ ፓላፅ ሀይቅን፥ ታኒ ጉፋናዳ፥ ታ ቃላ ቁ ኦዳ፥ “አቤት ኡባ ሃርያ ጎዳዉ፥ እስራኤለፐ አትዳይሳታ ኩመ ዉርሳና ሀናዬ?” ያጋዳ ዋሳስ።

¹⁴ ጎዳ ቃላይ ታኮ ሀይሳዳ ያግድ ይስ፤

¹⁵ “ነኖ አሳ ናአዉ፥ የሩሳላመን ደእያ እስራኤለ አሳይ ነባነ ድኦን ደእያ ነ ዳቦታባ፥ ‘ኤንቲ ጎዳፐ ሃክዶሶና፤ ሀ ቢታይ ኑስ ላታ ግድድ እመትስ’ ” ያግድ ሃሳዮሶና።

ድኦፐ ስሞ ኡፋይስ ደኤስ

¹⁶ ኡባ ሃርያ ጎዳይ ሀይሳዳ ያጌስ፦ “ታ ኤንታ ሃሆን ደእያ ካዎተታ ግዶ የድኮካ፥ ቢታ ኡባን ላልኮካ፥ ኤንቲ ብዳ ቢታታን ጉ ዎደስ ኤንታራ ግዳና” ያጌስ።

¹⁷ ሄሳ ግሾ፥ ኡባ ሃርያ ጎዳይ ሀይሳዳ ያጌስ፦ “ታ ህንተና ካዎተታፐነ ህንተ ላለትዳ ቢታታፐ ሺሻና፤ እስራኤለ ቢታ ዛራዳ ህንተዉ እማና።

¹⁸ ኤንቲ ጉየ ስሚድ ያ ዎደ ቱና ምስለታነ ኤቃታ ቢታፈ ይሳና።

¹⁹ ታኒ ኤንታዉ እስ ዎዛና እማና፤ ኦራ አያና ኤንታ ግዶን ዎና። ኤንታፈ ሹቻ ዎዛና ድጋዳ፥ አሾ ዎዛና ኤንታዉ እማና።

²⁰ ሄ ዎደ ኤንቲ ታ ህግያ ካላና፤ ታ ኪታ ናጋና። ኤንቲ ታ አሰ ግዳና፤ ታኒ ኤንታ ፆሳ ግዳና።

²¹ ግዶሽን፥ እፀትዳ ምስልያነ ቱና ኤቃ ጎይናናዉ ዶሰይሳታ ታኒ ኤንታ ኦሱዋዳ ኦና” ያጌስ ኡባ ሃርያ ጎዳይ።

²² ሄ ዎደ ክሩበት ባንታ ቀፍያ ምጭዶሶና፤ ኤንታ ምየን ገርቶት ደኦሶና። እስራኤለ ፆሳ ቦንቾይ ኤንታፈ ቦላራ ደኤስ።

²³ ጎዳ ቦንቾይ ካታማ ግዶፈ ደንድድ፥ ዶሎሀ ባጋን ደእያ ዙማ ቦላ ኤቅስ።

²⁴ ፆሳ አያናይ ታዉ እምዳ ቆንጨን አያናይ ታና ቢታፈ ደንድ፥ ካልዳወታ ቢታን ደእያ ድኤትዳይሳታኮ ኤፍስ። ሄሳፈ ጉየ፥ ቆንጨይ ታፐ ሻከትስ።

²⁵ ጎዳይ ታና በስዳባ ኡባ ድኦን ደኤይሳታስ ኦዳስ።