Hagge 1 - ጌሻ ማፃፋ

ፆሳ ኬይ ኬፀታና መላ እመትዳ ኪታ

¹ ካዎይ ዳርዮስ ካዎትዳ ናምአን ላይን፥ ኡሱፑን አጌናን ኮይሮ ጋላሳን፥ ጎዳ ቃላይ ናብያ ሀገ ባጋራ ይሁዳ ቢታ ሃርያ ሳላትያላ ናኣ፥ ዛሩባበላኮነ ካህነ ሀላቃ ግድዳ እዮሳደቃ ናኣ፥ እያሱኮ ሀይሳዳ ያግድ ይስ።

² ኡባፈ ዎልቃማ ጎዳይ፥ “ሀ አሳይ ጎዳ ኬ ዛሪድ ኬፅያ ዎደይ ቡሮ ጋክቤና” ያጌስ።

³ ያትን፥ ጎዳ ቃላይ ናብያ ሀገ ባጋራ ሀይሳዳ ያግስ:

⁴ “ታ አሳዉ፥ ታ ኬይ ላለትድ ኡትን፥ ህንተ፥ ህንተ አሌቀትዳ ኬታን ዳናዉ ሀይስ ህንተዉ ዎዴ?” ያግስ።

⁵ ሄሳ ግሾ፥ ኡባፈ ዎልቃማ ጎዳይ፥ “አነ ህንተ ህንተና ጋክሸ ደእያባ ቆፕተ።

⁶ ህንተ ዳሮ ዘርደታ፥ ሽን ጉ ሺሽደታ። ሜታ፥ ሽን ካለከታ፤ ኡዬታ፥ ሽን አለከታ። ማኤታ፥ ሽን ህንተና ሆኤና። ዳሞዘ ኤኬታ፥ ሽን ፔ ኪሰን የግያዳ ጮ ዬስ” ያጌስ።

⁷ ኡባፈ ዎልቃማ ጎዳይ፥ “አነ ህንተ ህንተና ጋክሸ ደእያባ ቆፕተ።

⁸ ህዛ ደርያ ቦላ ከይድ፥ ም ቃንፅድ ኤህተ፤ ታኒ እያን ኡፋይታና መላነ ቦንቸታና መላ ፆሳ ኬ ዛሪድ ኬፅተ።

⁹ ህንተ ዳሮ ካ ሺሻናዉ ቆፕደታ፥ ሽን ጉ ግድስ። እያ ህንተ ሶ ገልስያ ዎደ ታ ፑንን ይ አግስ። ሀይስ አይብስ ሀንዴ? ታኒ ሀይሳ ኦዳይ ህንተ ኡባይ ህንተ ኬ ኬ ኬፅሽን፥ ታ ኬይ ላለትድ አትዳ ግሾሳ።

¹⁰ ሄሳ ግሾ፥ ሳሎይ እራ ድግስ፥ ሳእ ካ እሞና እፅስ።

¹¹ ታኒ ቢታነ ዙማ ቦላ፥ ካ ቦላ፥ ዎይንያነ ዛይትያ ቦላ፥ ቢት ዶልስያባ ኡባ ቦላ፥ አሳነ መህያ ቦላነ ህንተ ዳቡራ ኡባ ቦላ ኮሻ ፄጋስ” ያጌስ።

¹² ሀይሳፈ ጉየ፥ ሳላትያላ ናአይ ዛሩባበል፥ ካህነ ሀላቃ ግድዳ እዮሳደቃ ናአይ፥ እያሱይነ ድኤተፈ ስምዳ አሳ ኡባይ፥ ጎዳ ባንታ ፆሳ ቃላስነ ጎዳይ ኤንታ ፆሳይ ኪትዳ ናብያ ሀገ ቃላስ፥ ኪተትዶሶና፤ አሳይ ጎዳ ያይዶሶና።

¹³ ያትን፥ ጎዳይ ኪትዳ ሀገይ አሳኮ፥ “ ‘ታኒ ህንተራ ደአይስ’ ያጌስ” ያግድ ጎዳ ኪታ አሳስ ኦድስ።

¹⁴ ያትን፥ ጎዳይ፥ ይሁዳ ቢታ ሃርያ ሳላትያላ ናኣ፥ ዛሩባበላ፥ ካህነ ሀላቃ ግድዳ እዮሳደቃ ናኣ፥ እያሱነ ድኤተፈ ስምዳ አሳ ኡባ ደንስ። ኤንቲ ኡባፈ ዎልቃማ ጎዳ፥ ባንታ ፆሳ ኬ ኬፆ ዶምዶሶና።

¹⁵ ሀይስ ሀንዳይ ካዎይ ዳርዮስ ካዎትዳ ናምአን ላይን፥ ኡሱፑን አጌናን ላታማነ ኦይዳን ጋላሳና።