Galatiya 6 - ጌሻ ማፃፋ

እሶይ እሱዋ ማድተ

¹ ታ እሻቶ፥ እስ አስ ናጋራን ኩንድኮ፥ አያናን ደእያ ህንተ ሄ ኡራ አሽከተን ሱርስተ። ሽን ኔኒ ሄሳ መላባን ፓጨቶና መላ ነና ናጋ።

² እሶይ እሱዋ ዴፆ ቶሁዋ ቶክተ። ያትኮ ክርስቶሳ ህግያ ፖሌታ።

³ እስ አስ አይኮይካ ባዋሽን፥ ባና ሀራታፐ ሎኦ ግድ ቆፕኮ፥ እ ባና ጭሜስ።

⁴ ሽን እስ እስ አስ ባ ኦሱዋ ፓጮ። ሄሳፈ ጉየ፥ ሀራታራ ባና ጋደየይሳ አግድ ባዉ ጬቀትያባ ደሜስ።

⁵ እስ እስ አስ ባ ቶሁዋ ባዉ ቶካናዉ በሴስ።

⁶ ፆሳ ቃላ ታማርያ ኦንካ ሎኦባ ኡባ ባ አስታማርያራ ሻከቴስ።

⁷ ህንተ፥ ህንተና ጭሞፍተ። አስ ባ ዘርዳባ ዛሪድ ጫክያ ግሾ ፆሳ ቦላ ቀልቅሶፕተ።

⁸ ባ አሾ አሙዋ ኩንናዉ ዘርያ ኦንካ፥ ባ አሾ አሙዋፐ ሀይቆ ቡጫና። ሽን አያና ኡፋይሳናዉ ዘርያ ኦንካ አያናፐ መርና ደኦ ጫካና።

⁹ አነ ሎኦ ኦሶ ኦናዉ አዛለይሳ አጎስ። ኑኒ አዛሎና እፅኮ ዎደይ ጋክያ ዎደ ኑ ዘርዳይሳ ጫካና።

¹⁰ ኑ እንጀ ዎደ ደምኮ፥ አሳ ኡባስ፥ አድካ አማንያ አሳስ ሎኦባ ኦስ።

ዞረነ ሳሮ

¹¹ ታኒ ታ ኩሸን፥ አይ መላ ግታ ፕዳለን ህንተዉ ፃፍዳኮ በእተ።

¹² አሳ ስንን ሎኦ ግድድ በንታናዉ ኮይያ አሳት ህንተ ቃፃረታና መላ ኮዮሶና። ሽን ሄሳ ኤንቲ ኦይ፥ ክርስቶሳ ማስቃልያ ግሾ ኤንታና ጎድ ጋኮና መላሳ።

¹³ ኤንቲ ህንተ ቃፃረተን ጬቀታናዉ ኮይድ ህንተና ቃፃረቶ ጎሶናፐ አትሽን፥ ቃፃረትዳይሳትካ ባንታ ሁጰን ህግያ ናጎኮና።

¹⁴ ሽን አላመይ ታዉ ካቀትዳይሳፈነ ታንካ አላምያስ ካቀትዳ፥ ጎዳ የሱስ ክርስቶሳ ማስቃልያፐ አትሽን፥ ሀራ ጬቆይ ታፐ ሃኮ።

¹⁵ ህዛ፥ ቃፃረትን ቃፃረቶና አግን አይኮካ ማደና። ማደይ ኦራ መተ ግዶ።

¹⁶ ሀ ዎጋ ካልያ ኡባስነ ፆሳ ደረ ግድዳ እስራኤለስ ሳሮተነ ማሮተ ግዶ።

¹⁷ ታኒ የሱሳስ ማዱንፅዳ ቤታ ታ አሳተን ቶክዳ ግሾ፥ ህዛፐ ታና ኦንካ ዋይሶፖ።

¹⁸ ታ እሻቶ፥ ኑ ጎዳ የሱስ ክርስቶሳ አ ኬሀተይ ህንተራ ግዶ። አምንእ።