Galatiya 5 - ጌሻ ማፃፋክርስቶሳን ደእያ ላአተ 1 ኑኒ ላአተን ዳና መላ ክርስቶስ ኑና አይለተፈ ከስስ። ህዛ፥ ምንድ ኤቅተ፤ ዛሪድ አይለተ ቃምባራን ገሎፕተ። 2 ታ፥ ጳዉሎስ፥ ገይሳ ስእተ። ህንተ ቃፃረታናዉ ኮይኮ፥ ክርስቶስ ህንተና አይኮካ ማደና። 3 ቃፃረትያ ኦንካ ህገይ ኪትያ ኡባ ፖላናዉ በሰይሳ ጉጃዳ ታ ኦዳይስ። 4 ህገ ናግድ ፅላናዉ ኮየይሳቶ፥ ክርስቶሳፐ ሻከትደታ፤ ፆሳ አ ኬሀተፈ ኩንድደታ። 5 ሽን ኑኒ ፆሳ አያና ባጋራ አማኖን ፅላናዉ ኡፋይሳን ናጎስ። 6 ህዛ፥ ክርስቶስ የሱሳን ደእኮ፥ ሲቆን ቆንጭያ አማኖፐ አትሽን፥ ቃፃረትን፥ ቃፃረቶና አግን ኑና አይኮካ ማደና። 7 ካሰ ህንተ ሎኦ ዎፄታ፥ ሽን ሀእ ቱማስ ኪተቶና መላ ህንተና ድግዳይ ኦኔ? 8 ሀይሳ መላ ኢታ ጭሞይ ህንተና ፄግዳ ፆሳፈ ይቤና። 9 ሄስካ፥ “ጉ እርሾይ ሙኑቃ ኡባ ደንስ” ጌተትድ ፃፈትዳይሳ መላ። 10 ህንተዉ ሀራ ቆፍ ባይናይሳስ ታ ጎዳን አማነታይስ። ሽን ህንተና ቡቅያ ኦንካ ፆሳፈ ባ ፕርዳ ኤካና። 11 ታ እሻቶ፥ ታ ሀእ ጋካናዉ ቃፃአረተ ሳባክያባ ግድኮ፥ ያትን ታና አይስ ጎዶና? ሄስ ቱማ ግድያኮ ክርስቶሳ ማስቃልያባ ታማርሶይ አሳስ በ ግደናሽን። 12 ህንተና ቡቀይሳት ቃፃረተ ፃላላ ግዶናሽን፥ ባንታና ቃራትያኮካ ታ ዶሳይስ። 13 ታ እሻቶ፥ ህንተ ላአ ዳናዉ ፄገትደታ። ግዶሽን፥ ህንተ ላአተይ አሾ አሞ ፖላናዉ ህንተዉ ጋሶ ግዶፖ፤ ሄሳፈ አድ እሶይ እሱዋ ሲቆን ማድተ። 14 ህገ ኡባይ፥ “አሰ ኔዳ ዶሳ” ግያ እስ ቃላን ቃሸትስ። 15 ሽን ህንተ እሶይ እሱዋራ ሳፀትያባነ ሜተትያባ ግድኮ፥ ህንተ ዎል ዉርሶና መላ ናገትተ። አያና ደኦነ አሾ ደኦ 16 ህዛ፥ ታ ህንተዉ ኦዳይስ፤ አያናን ደእተ፤ ህንተ አሾ አሙዋ ፖሎፕተ። 17 አሾ አሞይ አያና አሙዋራ ሞርከ፤ ቃስ አያና አሞይካ አሾ አሙዋራ ሞርከ። ኤንቲ እሶይ እሱዋራ እፀትያ ግሾ ህንተ ዶስያባ ኦናዉ ዳንዳኤከታ። 18 ሽን አያናይ ህንተና ካለያባ ግድኮ ህገይ ህንተና ሃረና። 19 አሾ ኦሶት ኤረትዳይሳታ፤ ኤንትካ፥ ላይማተ፥ ቱናተ፥ ቃይፀ፥ 20 ኤቃ ጎይኖ፥ ብታ፥ ሞርከተ፥ ካች፥ ቃናተ፥ ሀንቆ፥ ባና ዶሶ፥ ሻከተ፥ ኢታ ቶቦ 21 ገነ፥ ማ፥ የነ ሄሳ ሄሳ መላታ። ካሰ ታ ህንተዉ ኦድዳይሳዳ ሀእካ ታ ህንተዉ ኦዳይስ። ሀይሳ መላባታ ኦይሳት ፆሳ ካዎተ ላቶኮና። 22 ሽን አያና አይፈይ፥ ሲቆ፥ ኡፋይስ፥ ሳሮተ፥ ዳንዳአ፥ ኬሀተ፥ ሎኦተ፥ አማኖ፥ 23 አሽከተ፥ ባና ሃሮ። ሀይሳ መላባታ እፅያ ህገይ ባዋ። 24 ክርስቶስ የሱሳባ ግድዳይሳት ባንታ አሹዋ እያ ኢታ ቆፋራነ እያ አሙዋራ እስፈ ማስቃልያ ቦላ ካቅዶሶና። 25 ኑ አያናን ደእያባ ግድኮ፥ ኑና አያናይ ካለ። 26 አነ እሶይ እሱዋ ይሎይሸነ ቃናትሸ ጮ ጬቀተይሳ አጎስ። |
The Word for the World International and The Word for the World Ethiopia