Galatiya 3 - ጌሻ ማፃፋ

ፅሎተ አማኖና

¹ ህንተኖ፥ አኬክ ባይና ጋላትያ አሳቶ፥ ህንተ አይፍያ ስንን ክርስቶስ ማስቃለ ቦላ ካቀትዳ ምስለዳ ቆንጭድ በንቴስ። ያትን፥ ቱማስ ህንተ ኪተቶና መላ ህንተና ብትዳይ ኦኔ?

² ታ እስባ ኤራናዉ ኮያይስ፤ ህንተ ጌሻ አያና ኤክዳይ ህገ ናግድየ ዎይኮ ህንተ ስእዳ ዎንገላ አማንድ ኤክደቲ?

³ ህንተ ሄሳ መላ ኤዬ? ህንተ ፆሳ አያናን ዶምድ፥ ሀእ ዎልቃን ፖላናዉ ኮዬቲ?

⁴ ህንተ ዎንገላ ጋሶን ዳሮ ዋየትዳይ መሌ? ሄ ዋየ ኡባይ ጮ ግድዴ?

⁵ ፆሳይ ህንተዉ ጌሻ አያና እመይነ ህንተ ግዶን ማላታታ ኦይ፥ ህንተ ህገ ናግዳ ግሾየ ዎይኮ ዎንገላ ስእድ አማንዳ ግሾ?

⁶ አነ አብራሃመ በእተ፥ “እ ፆሳ አማንስ፤ ፆሳይ እያዉ ሄሳ ፅሎተ ኦድ ኤክስ” ጌተትድ ፃፈትስ።

⁷ ህዛ፥ አማነይሳት አብራሃመ ናይታ ግደይሳ ኤርተ።

⁸ ፆሳይ አይሁደ ግዶና አሳ አማኖን ፅልሳናይሳ ጌሻ ማፃፋይ በእድ፥ “ካዎተ ኡባይ ነናን አንጀታና” ያግድ፥ ዎንገላ አብራሃመስ ካሰትድ ኦድስ።

⁹ ሄሳ ግሾ፥ አማንያ ኡባይ አማንዳ አብራሃመራ እስፈ አንጀትዶሶና።

¹⁰ ህገ ናግድ ፅላና ግያ ኦንካ ባደትዳይሳ። አይስ ጊኮ፥ ጌሻ ማፃፋን፥ “ህገ ማፃፋን ፃፈትዳ ኡባ ናጎና ኦንካ ባደትዳይሳ ግዶ” ጌተትድ ፃፈትስ።

¹¹ “ፅሎይ አማኖን ዳና” ጌተትድ ፃፈትዳ ግሾ፥ ኦንካ ፆሳ ስንን ህገ ናግድ ፅሎናይስ ኤረትዳባ።

¹² ህገይ አማኖን ዘምፐና። ሽን፥ “ህግያ ናግያ ኦንካ ህግያን ደኦን ዳና” ያጌስ።

¹³ “ም ቦላ ካቀትድ ሀይቅያ ኦንካ ባደትዳይሳ” ጌተትድ ፃፈትዳ ግሾ፥ ክርስቶስ ኑ ግሾ ባደትዳይሳ ግድድ፥ ኑና ህገ ባደፈ ዎዝስ።

¹⁴ ፆሳይ አብራሃመስ እምዳ አንጆይ፥ የሱስ ክርስቶሳ ባጋራ አይሁደ ግዶና አሳ ጋካና መላነ ፆሳይ እማና ግዳ ጌሻ አያና ኑኒ አማኖን ኤካና መላ ሄሳ ኦስ።

ህገነ ኡፋይሳ ቃላ

¹⁵ ታ እሻቶ፥ ታ ህንተዉ አሳ ደኦን ሜዘ ግድድ ደእያባ ሌምሶ ኦዳ ኦዳይስ። አስ ጫቅዳ ጫቆይ ምንዳፐ ጉየ፥ ኦንካ ሄ ጫቁዋ ሻራናዉ ዎይኮ እያ ቦላ ሀራ ጉጃናዉ ዳንዳኤና።

¹⁶ ፆሳይ ሄ ኬከ ቃላ አብራሃመስነ እያ ዘረስ እሚስ። ጌሻ ማፃፋይ፥ ዳሮ አሳስ ኦድያዳ፥ “ነ ዘረታስ” ጌና። ሽን እስ አሳስ ኦድያዳ፥ “ነ ዘረስ” ያጌስ፤ እካ ክርስቶሳ።

¹⁷ ታኒ ገይ ሀይሳ፤ ኦይዱ ፄታነ ሀስታሙ ላይፈ ጉየ እመትዳ ህገይ፥ ኮይሮ ፆሳይ ምንዳ ጫቁዋ ሻርድ ኡፋይሳ ቃላ ይሳናዉ ዳንዳኤና።

¹⁸ ፆሳይ እምያ ላታይ ህገን ኤከትያባ ግድያኮ ፆሳይ እምዳ ኡፋይሳ ባጋራ ግደይስ አቴስ። ሽን ፆሳይ ባ አ ኬሀተን ላታ አብራሃመስ ኡፋይሳ ቃላ ባጋራ እሚስ።

¹⁹ ያትን፥ ህገይ አይስ እመትዴ? ህገይ እመትዳይ፥ አብራሃመስ ኡፋይሳ ቃል እመትዳ ኮቻይ ያና ጋካናዉ ኢታ ኦሶይ አይበኮ ኤርሳናሳ። ህገይ ኪታንቾታ ባጋራ እመትድ፥ ግዶ ግድድ ስገያ እስ አሳ ባጋራ ኦሶ ቦላ ፔእስ።

²⁰ ግዶ ግድድ ስገያ ኡራይ እስ አሳ ፃላላስ ግደና፥ ሽን ፆሳይ እስኖ።

አይለታነ ናይታ

²¹ ያትን፥ ህገይ ፆሳ ኡፋይሳ ቃላራ ኤቀትዬ? አካይ፥ ግደና! ህገይ እመትዳይ አሳስ ደኦ እማናዉ ግድያኮ፥ ፅሎተ ህገ ባጋራ በንታናሽን።

²² ሽን የሱስ ክርስቶሳ አማንን በንትያ ኡፋይሳ ቃላይ አማነይሳታስ እመታና መላ ኩመ አላመይ ናጋራስ ሃረትድ ደኤይሳ ጌሻ ማፃፋይ ኦዴስ።

²³ ሽን አማኖይ ያናፐ ካሰ ህገይ ኑና ቃች ዎስ። ሄ አማኖይ ቆንጫና ጋካናዉ ህገይ ኑ ቦላ ጎርድ ዎስ።

²⁴ ሄሳ ግሾ፥ ኑኒ አማኖን ፅላና መላ ክርስቶስ ያና ጋካናዉ ህገይ ናአ ናግያ አሳ መላ ኑና ናገይሳ ግድስ።

²⁵ ሽን ሀእ አማኖይ ይዳ ግሾ፥ ህገይ ህዛፐ ጉየ ናአ ናግያ አሳ መላ ኑና ናገይስ አትስ።

²⁶ ህንተ ኡባይ የሱስ ክርስቶሳ አማንድ ፆሳ ናይታ ግድደታ።

²⁷ ክርስቶሳራ እስኖ ግዳናዉ ፃማቀትዳ ኡባይ ክርስቶሳ ማኦዳ ማእደታ።

²⁸ ህንተ ኡባይ ክርስቶሳን እስኖ ግድያ ግሾ፥ አይሁደ አሳ ግዶንነ ግርከ አሳ ግዶን፥ አይለ ግዶንነ ዎማኖ ግዶን፥ አደ ግዶንነ ማጫሳ ግዶን ዱማተ ባዋ።

²⁹ ህዛ፥ ህንተ ክርስቶሳባ ግድኮ ህንተ አብራሃመ ዛረ። ፆሳ ኡፋይሳ ቃላዳ ህንተ ላተይሳታ።