Galatiya 2 - ጌሻ ማፃፋሀዋረት ጳዉሎሳ ኤክዶሶና 1 ታማነ ኦይዱ ላይፈ ጉየ፥ ባርናባሳራ ዛራዳ የሩሳላመ ባስ። ሄ ዎደ ትቶ ታራ ኤካዳ ባስ። 2 ፆሳይ ታዉ ቆንጭስዳ ቆንጨን ያ ባዳ አይሁደ ግዶና አሳ ግዶን ታ ሳባክያ ዎንገላ ኤንታዉ ቆንጭሳስ። ካሰ ታ ዎፅዳ ዎይነ ሀእካ ታ ዎፅያ ዎይ ሀዳ ግዶና መላ ጋዳ ካለይሳታ ዱማ ሺሻዳ ኤንታዉ ኦዳስ። 3 ሀር አቶሽን፥ ታራ ደእያ ትቶይ ግርከ አስ ግድኮካ፥ ቃፃረቶ ግድ ኡንኤቦኮና። 4 ግዶሽን፥ አማንያ እሻታ ዳንድ ኑ ግዶ ገልዳ እሶት እሶት እ ቃፃረታና መላ ኮይዶሶና። ሄ አሳት ክርስቶስ የሱሳን ኑስ ደእያ ላአተ ዎችድ በአናዉ ጌማን ኑ ግዶ ገልድ ዛሪድ ኑና አይለ ኦናዉ ኮዮሶና። 5 ሽን ቱማ ዎንገላይ ህንተናን ምንድ ዳና መላ ኑኒ ሀር አቶሽን፥ ጉ ዎደስካ ኤንታዉ ኩሸ እምቦኮ። 6 ሽን ሀላቃ ዳንያ አሳታ ኦናተይ ታዉ አይኮካ ግደና። ፆሳይ አሳ ሶምኦ በእድ ፕርደና። ሀ አሳት ታ ማርካትያ ዎንገላ ቦላ ጉጅዳባይ ባዋ። 7 ሽን ጰፅሮስ፥ አይሁደታስ ዎንገላ ኦዳና መላ ፆሳይ እያዉ ሀዳራ እምዳይሳዳ ታዉካ አይሁደ ግዶና አሳስ ዎንገላ ኦድያ ሀዳራ እምዳይሳ ኤንቲ ጉየፐ በእዶሶና። 8 ህዛ፥ ጰፅሮስ አይሁደታ ሀዋረ ግዳና መላ ኦዳ ፆሳይ፥ ታካ አይሁደ ግዶና አሳስ ሀዋረ ግዳና መላ ኦስ። 9 ቃስ ቱሱ ዳንድ በንትያ ያይቆብ፥ ጰፅሮስነ ዮሃንስ፥ ታዉ እመትዳ አ ኬሀተ በእዳ ዎደ ኑራ እስፍዳይሳ ቆንጭሳናዉ ታ ኩሽያነ ባርናባሳ ኩሽያ ኦይክዶሶና። ኑኒ አይሁደ ግዶና አሳኮ፥ ቃስ ኤንቲ አይሁደ አሳኮ ባናዉ ጊግዶሶና። 10 ኤንቲ ኑና ምንድ ሀዳራ ግዳይ፥ ኑኒ ማንቆታስ ቆፓናይሳ። ካሰካ ታ ሄሳ ኦናዉ አሞታይስ። ጳዉሎስ ጰፅሮሳ ትምርትያ ጳልቅስ 11 ጰፅሮስ አንፆከ ካታማ ይዳ ዎደ እ ባልዳ ግሾ ታኒ እያ ሶምኦን “ኔኒ ባላዳሳ” ጋስ። 12 ያይቆብ ኪትዳ ጉ አሳይ ያናፐ ስን እ አይሁደ ግዶና አሳራ ሜስ፥ ሽን ኤንቲ ይዳፐ ጉየ፥ “አይሁደ ግዶና አሳፐ አማንዳይሳት ቃፃረታናዉ በሴስ” ግያ አሳስ ያይድ ኤንታፈ ሻከትስ። 13 ቃስ ሀንኮ አማንዳ አይሁደት ጰፅሮሳ ሀኑዋ ካልዶሶና። ሀር አቶሽን፥ ባርናባስካ እያ ቆፋን ጎሸትስ። 14 ሽን ኤንቲ ዎንገላ ቱማተን ሱረ ሄመቶናይሳ በአዳ፥ ጰፅሮሳ አሳ ኡባ ስንን፥ “ኔኒ አይሁደ ግዳሸ፥ አይሁደ ዎጋ ግዶናሽን፥ አይሁደ ግዶና አሳዳ ደኣሳ፤ ያትን፥ ዋናዳ አይሁደ ግዶናይሳታ፥ ‘አይሁደ ዎጋን ደእተ ጋዳ ዎልቃታይ?’ ” ያጋስ። 15 ኑኒ የለታን አይሁደ፥ ሽን ናጋራንቾ ግድዳ አይሁደ ግዶና አሳ መላ ግዶኮ። 16 ሽን አስ የሱስ ክርስቶሳ አማንድ ፅሌስፐ አትሽን፥ ህገ ናግድ ፅሎናይሳ ኤሮስ። ኦንካ ህገ ናግድ ፅሎና ግሾ፥ ኑካ ህገ ናግድ ግዶናሽን፥ ክርስቶሳን አማንድ ፅላና መላ ክርስቶስ የሱሳ አማንዳ። 17 ኑ አይሁደትካ ክርስቶሳ ባጋራ ፅላናዉ ኮሼስ። ሄሳ ግድኮ ኑካ ሀራ አሳዳ ናጋራንቾ ግደይሳ በኦስ። ያትን፥ ኑ ናጋራ ኦና መላ ደንይ ክርስቶሳ ጉሰዬ? ኡባካ ግደና! 18 ህዛ፥ ታ ላልዳይሳ ዛራዳ ኬፅያባ ግድኮ ታኒ ታ ሁጰን ህገ መንይሳ ግደይሳ ቆንጭሳይስ። 19 ታኒ ፆሳስ ዳና መላ ህገ ባጋራ ህገስ ሀይቃስ። 20 ታኒ ክርስቶሳራ ማስቃልያ ቦላ ካቀታስ። ታኒ ህዛፐ ታዉ ደእከ፥ ሽን ክርስቶስ ታናን ደኤስ። ታ ሀእ ደእያ ደኦይ፥ ታና ዶስድ ታ ግሾ ባና አድ እምዳ ፆሳ ናኣ አማናዳ ደአይስ። 21 ታኒ ፆሳ አ ኬሀተ ሀዳ ኦከ። ፅሎተ አሳስ ህገ ባጋራ በንትያባ ግድያኮ፥ ክርስቶስ ጮ ሀይቅስ ጉሱ። |
The Word for the World International and The Word for the World Ethiopia