Ermiyaasa 3 - ጌሻ ማፃፋ

¹ “እስ አስ ባ ማችዉ የድን፥ እያ ባዳ ሀራ አዝና ገልኮ፥ ሄ አደይ እዮ ዛሪ? ዛርኮ ሄ ቢታይ ቱና ግደኔ? ሽን ነ ላይማታናዉ ኮያዳ ዳሮ ላገታራ ደአዳሳ፤ ሀእ ኔኒ ታኮ ስማኔ? ያጌስ ጎዳይ

² ቁ ጋዳ አይኮይ ባይና ደረታ ፄላ። ላይማታናዉ ነ ዝንአቦና በሲ ደኢ? አራበ አስ መላ ቢታን ኡተይሳዳ፥ ኔኒ ላገታ ናጋዳ ኦገ ዶናን ኡታዳሳ። ነ ላይማተንነ ነ ኢታተን ቢታ ቱንሳዳሳ።

³ ሄሳ ግሾ፥ ቶርቸ እራይ ተቀትስ፤ ስላ እራይካ ቡኮና እፅስ። ሄስ ሀንንካ፥ ነዉ ላይማተ መይ ደኤስ፤ ነ ዬላቶና እፃዳሳ።

⁴ ሀእ ኔኒ፥ ‘ታ አዋዉ፥ ታ ናአተ ላግያዉ ነ ታና ሲቃሳ።

⁵ ነ ኡባ ዎደ ይሎታይ? ነ ሀንቆይ መርናዉ አገኔ?’ ያጋሳ። ሽን ነ ኦናዉ ዳንዳእያ ኢታ ኡባ ኦሳ” ያጌስ ጎዳይ።

አማነቶና እስራኤለ

⁶ ካዋ እዮስያሳ ዎደ ጎዳይ ታኮ ሀይሳዳ ያግስ፦ “አማኖይ ባይና እስራኤለይ ኦዳባ ነ በአዲ? እያ ደረ ቦላነ ዳሻ ም ኡባ ጋርስ ባዳ ያን ላይማታሱ።

⁷ እያ ሀይሳ ኡባ ኦንካ ታኮ ስማንደ ጋዳ ቆፓስ፥ ሽን ስማቡኩ። እ ምችያ፥ አማነቶና ይሁድካ ሄሳ በአሱ።

⁸ አማኖይ ባይና እስራኤለይ ዳሮ ዎደ ላይማትዳ ግሾ ፕርማ እማዳ እዮ የዳስ። ሄስ ሀንንካ እስራኤለ ምችያ፥ አማነቶና ይሁድ፥ ያዮናይሳ ታ በአስ፤ እያካ ከያዳ ላይማታሱ።

⁹ ላይማተይ እዉ ላፋባ ግድያ ግሾ፥ ምራነ ሹቻራ ላይማታዳ ቢታ ቱንሳሱ።

¹⁰ ሄ ኡባን እ ምችያ፥ አማነቶና ይሁድ ስምዳባ ዳናዉሱፐ አትሽን፥ ኩመ ዎዛናፐ ታኮ ስማቡኩ” ያጌስ ጎዳይ።

¹¹ “አማነቶና ይሁዳፐ አማኖይ ባይና እስራኤለይ ፅሎ።

¹² ባዳ ፑደሀ ባጋን ደእያ አሳስ ሀይሳዳ ያጋዳ አዋጃ፦ ‘አማኖይ ባይና እስራኤለ፥ ስማ! ታኒ ማሮት ኩምዳ ጎዳ ግድያ ግሾ ነና ኢታ አይፈን ፄልከ። መርናዉ ሀንቀትከ’።

¹³ ግዶሽን፥ ‘ታኒ ጎዳ፥ ታ ፆሳ ቦላ ማካላስ። አላጋ ፆሳታራ ዳሻ ም ጋርሳን ላይማታስ። ነ ቃላ ኪተታብከ’ ጋዳ ነ ቆሁዋ አማና” ያጌስ ጎዳይ።

¹⁴ “ህንተኖ፥ አማነቶና አሳዉ፥ ታ ህንተዉ አዝና ግድያ ግሾ ስምተ። ታኒ እስ ካታማፐ እስኖ፥ እስ ያራፐ ናምአ ዶራ ኤካዳ ፅዮነ ኤሀና።

¹⁵ ታ ዎዛናዳ ህንተና ሄምያ ሄንንቾታ ህንተዉ እማና። ኤንቲ ህንተና ኤራተንነ አኬካን ሄማና” ያጌስ ጎዳይ።

¹⁶ “ሄ ጋላሳታን ህንተ ሄ ቢታን ዳርያ ዎደ አሳይ፥ ‘ጎዳ ጫቆ ታቦትያ’ ግድ ኦደቶኮና። እ ኤንታዉ ቆፈተና፤ ሀሳየተና፤ ባይናይስ ኤንታዉ ኤረተና፤ ሀርካ ኦሰተና።

¹⁷ ሄ ዎደ ኤንቲ የሩሳላመ፥ ‘ጎዳ አራታ’ ግድ ፄጋና። ካዎተ ኡባፈ አሳይ ጎዳ ሱን ቦንቻናዉ የሩሳላመ ሺቃና። ሄሳፈ ጉየ፥ ኤንቲ ባንታ ዎዛና ኢታተ ካሎኮና።

¹⁸ ሄ ዎደ ይሁዳ አሳይነ እስራኤለ አሳይ ጋሄትድ ፑደሀ ባጋ ቢታፈ ታ ህንተ አዋታ ላትስዳ ቢታ እስፈ ያና” ያጌስ ጎዳይ።

¹⁹ “ታ ህንተና ናአ ኤካዳ፥ ቢታ ኡባፈ ሎእያነ አራዳ ቢታ ህንተዉ እማናዉ ኮያስ። ‘ታ አዋዉ’ ግድ ፄጋናነ ታና ካላና ጋዳ ቆፓስ።

²⁰ ሽን እስራኤለ አሳዉ፥ ህንተ ባ አዝናስ አማነቶና ማችዳ ታዉ አማነትበከታ” ያጌስ ጎዳይ።

²¹ ኤንቲ ባንታ ኦግያ ጌላይዳ ግሾነ ባንታ ፆሳ አግዳ ግሾ ማንቆ ዙማታፐ እስራኤለ አሳ ዋሶይነ ዬሆይ ስኤቴስ።

²² “ህንተኖ፥ አማኖይ ባይና አሳዉ፥ ታኮ ስምተ። ህንተ አማነታና መላ ታ ህንተና ፓና” ያጌስ ጎዳይ። ህንተ፥ “ኔኒ፥ ኑ ጎዳ ፆሳ ግድያ ግሾ ኔኮ ስማና።

²³ ደረታ ቦላነ ዙማታ ቦላ ኤቃ ጎይኖይ ቱማ ጭሞ። ቱማ እስራኤለ አቶተይ ጎዳ፥ ኑ ፆሳ።

²⁴ ኑ ናአተፈ ዶምን፥ ኑ አዋት ዳቡርድ ደምዳ፥ ኤንታ ዶርሳነ መህያ፥ ኤንታ ማጫነ አደ ናይታ ዬላይያ ኤቃት ምድ ይስዶሶና።

²⁵ ናአተፈ ሀች ጋካናዉ፥ ኑነ ኑ አዋት ጎዳ ኑ ፆሳ ቦላ ናጋራ ኦዳ። ጎዳ ኑ ፆሳ ቃላ ኪተትቦኮ። ሄሳ ግሾ፥ ኑኒ ዬላን ጉፋናናዉ ቃስ ካዉሻተ አፍላዳ ኑና ካሞ” ያጎሶና።