Ermiyaasa 2 - ጌሻ ማፃፋ

እስራኤለይ ፆሳ አግስ

¹ ጎዳ ቃላይ ታኮ ሀይሳዳ ያግሸ ይስ፦

² “ባዳ የሩሳላመ አሳ ሀይን ሀይሳዳ ያጋዳ አዋጃ። ነ ናአተን ታዉ አይ መላ አማነትዳኮ፥ ነ ቡሮ መዳን ደእያ ዎደ ታና አይ መላ ሲቅዳኮ፥ ታ አኬካይስ። ኔኒ መላ ቢታን ዘረ ዘረት ኤሮና ቢታን ታና ካላዳሳ።

³ ሄ ዎደ እስራኤለይ ጎዳስ ጌሽ፤ እያዉ ባይራ ካ መላ። እያፐ ምዳ ኡባይ ባላ ግዶሶና፤ ኤንታ ቦላ ዮይ ይስ። ሄሳ ኦደይ ጎዳ” ያጌስ።

⁴ ህንተኖ፥ ያይቆባ ናይቶ፥ እስራኤለ ዛረ፥ ኡባይ ጎዳ ቃላ ስእተ!

⁵ ጎዳይ ያጌስ፤ ካሰ ህንተ አዋት ታፐ አይ ባላ ደምድ ታፐ ሃክድ ብዶና? ኤንቲ ፓና ኤቃታ ጎይንድ ፓናባ ግድዶሶና።

⁶ ኤንቲ፥ “ኑና ግብፀፈ ከስዳ፥ መላ ቢታን ካለዳ፥ አፎራነ መላ ቢታራ አዳ፥ ኮሽነ ሳካና ም ደእያ ቢታራ ፕንዳ፥ ኦንካ አናነ ደኦና በሳራ ካለዳ ጎዳይ አዉን ደኢ?” ያግድ ኦይችቦኮና።

⁷ ህንተ ሄ ቢታ አይፍያፐ ሎኡዋ ማና መላ ታ ህንተና አራዳ ቢታ ኤሀስ። ሽን ህንተ ይድ፥ ታ ቢታ ቱንስደታ፤ ታ ላታ ኢስደታ።

⁸ ካህነት፥ “ጎዳይ አዉኔ?” ያግድ ኦይችቦኮና። ታ ህገይ ኤንታ ኩሸን ደእያ አሳት ታና ኤርቦኮና። ደርያ አይሰይሳት ታ ቦላ ማካልዶሶና። ናበት ባኣለ ኤቃ ሱንን ትንብተ ኦድድ ፓና ኤቃታ ጎይንዶሶና።

⁹ “ሄሳ ግሾ፥ ታ ህንተራ ቡሮ ሞተታና፤ ህንተ ናይታ ናይታራ ሞተታና።

¹⁰ አነ ዉሎሀ ባጋ ብድ፥ ዩሾይ አባን ተቀትዳ ቢታ ቆጵሮሳ ፄልተ፤ ዶሎሀ ባጋ ብድ ቀዳረ ቢታ አሰ ኪትድ ፆሞስተ። ሀይሳ መላባይ ሀይሳፈ ካሰ ሀንዳኮ በእተ።

¹¹ ኤንቲ ቱማ ፆሳታ ግዶና እፅኮካ ባ ፆሳታ ላምዳ ደረይ ኦኔ? ሽን ታ አሳይ ኤንታዉ ቦንቾ ግድዳ ታና ፓና ኤቃታራ ላምስ።”

¹² “ሳሎቶ፥ ሀይሳን ማላለትተ፤ ዳጋምድ ኮኮርተ” ያጌስ ጎዳይ

¹³ ታ አሳይ ናምኡ ናጋራ ኦዶሶና፤ ሄስካ፥ ደኦ ፑልቶ ግድዳ ታና አግስ። ሃ ኦይካናዉ ዳንዳኦና፥ ፆኤ ኦላታ ባንታዉ ቦክዶሶና።

¹⁴ “እስራኤለይ ሻመትዳ አይለዬ? ዎይኮ ሶን የለትዳ አይለዬ? ያትን፥ ሞርከት አይስ ዶኦዳ ሻንካቶና?

¹⁵ እያ ሞርከት ጋሞዳ እያ ቦላ ጉዶሶና። ኤንቲ ባንታ ቃላ ቁ ኦድ ዳሮሶና። ኤንቲ እያ ቢታ ካይስ ከስዶሶና፤ እያ ካታማት ላለትድ አስ ባይና ሶ ግድዶሶና።

¹⁶ ሄሳ ቦላካ መምፕሳነ ፃፍናሳ አሳት እያ ሁጵያ ሜድዶሶና።

¹⁷ ነኖ እስራኤለ፥ ኦገ ኡባን ነና ካለያ፥ ጎዳ ነ ፆሳ አጋዳ ሀይሳ ነ ቦላ ኤህዳይ ነና ግድኪ?

¹⁸ ናይለ ሻፋፐ ሃ ኡያናዉ ግብፀ ቡስ ነና አይ ማዳኔ? ኤፍራፂሳ ሻፋፐ ሃ ኡያናዉ አሶረ ቡስ ነና አይ ማዳኔ?

¹⁹ ህዛ ነ ኢታተይ ነና ሴራና፤ ነ ታና ካድዳይስ ነ ቦላ ፕርዳና። ነ ታና ጎዳ ነ ፆሳ አግዳይስ አይ መላ ኢታነ ጫሞ ግድያኮ አኬካ በአ። ነ ታዉ ያይያ ያሻይ ባዋ” ያጌስ ጎዳይ፥ ኡባፈ ዎልቃማ ፆሳይ።

²⁰ “ታ ነ ቃምባራ ዳሮ ዎደፐ ካሰ መንስ፤ ነ ቃሹዋ ዱስ። ኔኒ፥ ‘ታ ነና ጎይንከ’ ያጋዳሳ። ደረ ቦላነ ዳሻ ም ጋርሳን ላይማታናዉ ዝንአዳሳ።

²¹ ታ ነና ዶረትዳ ዘረፈ ኤካዳ፥ ሎኦ ዎይነ ጋደን ቶካስ። ያትን፥ ዋናዳ፥ ጉየ ስማዳ፥ ዎራን ዶልዳ፥ ኢታ ዎይነ ግዳዲ?” ያጌስ ጎዳይ።

²² “ነ ሳንጌኖራ ሜጨትያኮካ፥ ሳሙናን ጎርፐትያኮካ ነ ቅታይ ታ ስንና።

²³ ኔኒ ዋናዳ፥ ‘ታ ቱናብከ፤ ባኣለ ኤቃ ጎይናብከ’ ጋይ? ኔኒ ዛንጋራን ሀንዳባ ፄላ፤ ነ ኦዳባ አኬካ። ኔኒ ያነ ሃነ ዎፅያ ዚታ ከይዳ ግማለ መላ።

²⁴ ኔኒ ባዞ ሜዘትዳ፥ ዚታ ዎደ ጫርኮ ስንገያ ሀረ መላ። እ አሞይ ደንድን፥ ኦን እዮ ተቃናዉ ዳንዳኢ? እያ ባዉ ኮያዳ ጋክያ ግሾ አይ አደ ሀረይካ እዮ ደማናዉ ዳቡረና።

²⁵ ነኖ፥ እስራኤለ፥ ነ ጫማይ ዉራና ጋካናዉ ነ ኮቶኖይ መላና ጋካናዉ ሀራ ፆሳታ ጌዶ ዎፆፋ። ሽን ኔኒ፥ ‘አቶ፥ ሄስ ታና ማደና። ታኒ እማ ፆሳታ ዶሳስ፤ ታኒ ኤንታ ጎይናና’ ያጋዳሳ።

²⁶ “ካይሶይ ኦይከትዳ ዎደ ዬላተይሳዳ እስራኤለ አሳይ ዬላትዶሶና፤ ኤንቲ፥ ኤንታ ካዎት፥ ኤንታ ሀላቃት፥ ኤንታ ካህነትነ ኤንታ ናበት ኡባይ ዬላታና።

²⁷ ኤንቲ ምኮ፥ ‘ነ ታ አዋ’ ያጎሶና፤ ሹቻ፥ ‘ታና ነ የላዳሳ ያጎሶና። ኤንቲ ባንታ ሶምኡዋ አግድ፥ ባንታ ዞኩዋ ዛርዶሶና። ሽን ኤንቲ መቶ ዎደ ኑና አሻ!’ ያጎሶና።

²⁸ ሽን ህንተ፥ ህንተዉ መዳ ፆሳት አዉን ደኦና? ህንተ መቶን ገልያ ዎደ ህንተና አሻናዉ ዳንዳእኮ ደንድድ ህንተና አሾ። ህንተኖ፥ ይሁዳ አሳዉ፥ ህንተ ፆሳት ህንተ ካታማታ መላ ዳሮ” ያጌስ ጎዳይ።

²⁹ “ህንተ ታራ አይስ ሞተተቲ? ህንተ ኡባይ ታዉ ማካልደታ።

³⁰ ታ ህንተና ጮ ሴራስ፤ ህንተ ህንተ ኦሱዋፐ ስምያባ ግደከታ። ኮሻትዳ ጋሞዳ ህንተ ማሻይ ህንተ ናበታ ምስ” ያጌስ ጎዳይ።

³¹ ህንተኖ፥ ሀ ዎድያ የለታዉ፥ ጎዳ ቃላ ስእተ። ታ እስራኤለታስ ባዞ ዎይኮ ሳካና ማን ደእያ ቢታ ግዳድናዬ? ያትን፥ አይስ ታ አሳይ፥ “ኑኒ ኑ ሸነዳ ባና፤ ኔኮ ስሞኮ” ያግዶና?

³² ጌላእያ ባ አሌቁዋ፥ ሙሹርያ ባ ማኡዋ ዶጋይ? ሽን ታ አሳይ ታና ታይቦይ ባይና ጋላስ ዶግዶሶና።

³³ ኔኒ ነ ላገታ ጌዶ ዎ ዋናዳ ሜዘታዲ? ዳሮ ኢታ ማጫሳት ነ ኦግያ ታማሮሶና።

³⁴ መንድ ገልሽን ኦይክዳ አሳ ሱን ግዶናሽን ፅሎ ማንቆታ ሱን ነ ማኦይ ኢትስ። ኔኒ ሄሳ ኡባ ኦዳካ፥

³⁵ ኔኒ፥ “ ‘ታኒ ፅሎ፤ ቱማ ጎዳይ ታ ቦላ ሀንቀተና፤ ታኒ ናጋራ ኦብከ’ ግያ ግሾ ታ ነ ቦላ ፕርዳና።

³⁶ ኔኒ ነ ኦግያ ላማሸ አይስ ዎፃይ? ነና አሶረይ ዬላይዳይሳዳ ግብፀይ ዬላያና።

³⁷ ጎዳይ ነ አማነተይሳታ ካዉሽዳ ግሾነ ነ ኤንታፈ ማደ ደሞና ግሾ ነ ሁጵያ ኦይካዳ ያፐ ከያና” ያጌስ ጎዳይ።