Ermiyaasa 16 - ጌሻ ማፃፋ

ዮ ጋላስ ጋክስ

¹ ጎዳ ቃላይ፥ ሀይሳዳ ያግሸ ታኮ ይስ፦

² “ኔኒ ማቾ ኤኮፋ፤ ማጫ ናአነ አደ ናአ ሀ በሳን የሎፓ።

³ ሀ በሳን የለትያ ማጫ ናይታባነ አደ ናይታባ፥ ኤንታ የልያ አየታነ አዋታባ ጎዳይ ሀይሳዳ ያጌስ።

⁴ ኤንቲ ኢታ ሀርገን ሀይቃና፤ ኤንታዉ ዬክያ ዎይኮ ኤንታ ሞግያ አስ በንተና። ኤንታ አሀይ ቢታ ቦላ ፕቶ መላ የገታና፤ ኤንቲ ማሻንነ ኮሻን ዉራና፤ ኤንታ አሾይ ሳሎ ካፎታስነ ሳአ ዶአታስ ካ ግዳና” ያግስ።

⁵ “ዬሆ ኬ ገሎፓ፤ ዬካናዉ ዎይኮ ቃታናዉ ቦፓ። ታኒ ሀ አሳ ቦላፈ ታ ሳሮተ፥ ታ ሲቁዋነ ታ ማሮተ ድጋስ።

⁶ ግትነ ጉ ሀ ቢታን ሀይቃና፤ ኤንቲ ሞገቶኮና። ኦንካ ኤንታዉ ዬከና፤ ኦንካ ባና ጋረና ዎይኮ ሁጰ ሜደትድ ካዮተና።

⁷ ዬክያ አሳስ ሾቹ ኤፍድ፥ ኤንታራ እስፈ ምድ ኡይድ፥ ካዩዋ ባለያ አስ እሶይካ ዴና። ሀር አቶሽን፥ አይያ ዎይኮ አው ሀይቅዳ አሳካ ምንያ አስ ባዋ።”

⁸ “ኤንታራ ማናዉነ ኡያናዉ ግብር ደእያ ኬ ገሎፓ።

⁹ ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፦ ‘ታኒ ኡፋይስነ እልልስ፥ ያጋኖ የ ሀ በሳፈ ድጋና። ሄሳ አሳይ ባንታ ላይንነ ባንታ አይፍያን በአና።’ ”

¹⁰ “ነ ሀ ቃላ ኡባ አሳስ ኦድያ ዎደ፥ ኤንቲ፥ ‘ጎዳይ አይስ ሀይሳ መላ ኢታባ ኑ ቦላ አዋጅዴ? ኑ አይ ባልዶ? ጎዳ፥ ኑ ፆሳ ቦላ ኑ አይ ናጋራ ኦዶ?’ ” ያጋና።

¹¹ ሄ ዎደ ነ ኤንታኮ፤ “ህንተ አዋት ታና አግዳ ግሾሳ፥ ኤንቲ ሀራ ፆሳታ ካልዳ ግሾሳ፥ ኤንታዉ ኦዳነ ጎይንዳ ግሾሳ፥ ታና አግድ ታ ህግያ ናጎና እፅዳ ግሾሳ።

¹² ህንተ፥ ህንተ አዋታፐ አድ ኢታ ኦዳ ግሾሳ። ህንተ እሶይ እሶይ ኤሮ ጎና ህንተ ኢታ ዎዛና ካልደታ፤ ታዉ ኪተቶና እፅደታ።

¹³ ሄሳ ግሾ፥ ታ ህንተና ሀ ቢታፈ ደንዳ፥ ህንተ ዎይኮ ህንተ አዋት ኤሮና ቢታ ሆላና። ያን ህንተ ሀራ ፆሳታ ጋላስነ ቃማ ሀጋዛና፤ ታኒ ህንተዉ ቃትከ” ያጌስ ጎዳይ።

¹⁴ አሳይ፥ “እስራኤለ አሳ ግብፀ ቢታፈ ከስዳ ጎዳይ ኤርያ መላ” ያግድ ጫቆና ዎደይ ያና።

¹⁵ ሄሳ አግድ፥ “ ‘እስራኤለ አሳ ፑደሀ ባጋ ቢታፈነ ኤንታ ላልዳ ቢታ ኡባፈ ዛሪድ ኤህዳ ጎዳይ ኤርያ መላ’ ያግድ ጫቃና። ታኒ ኤንታ ካሰ ኤንታ አዋታስ እምዳ ቢታ ዛራዳ ኤሀና” ያጌስ ጎዳይ።

¹⁶ “ታ ሞሎ ኦይክያ ዳሮ አሳ ኪታና፤ ኤንቲ ኤንታ ኦይካና። ሄሳፈ ጉየ፥ ዳሮ ሻንካትያ አሳ ኪታና፤ ደረፐ፥ ዙማፐነ ሹቻ ቆጶፐ ኤንታ ሻንካትድ ከሳና።

¹⁷ ታ አይፈይ ኤንታ ኦግያ ቦላ ደኤስ፤ ኤንቲ ታፐ ቆሰትቦኮና፤ ኤንታ ናጋራይ ታ ስንፈ ጌምቤና።

¹⁸ ታ ኤንታ ኢታተነ ኤንታ ናጋራ ግሾ ኤንታዉ ናምኡ ኩሸ ዛራና። ኤንቲ አሀ ዳንያ ባንታ እፀትዳ ኤቃታን ታ ቢታ ቱንስዶሶና፤ ሻትያ ባንታ ምስለታን ታ ላታ ኩንዶሶና” ያጌስ ጎዳይ።

¹⁹ አቤት ጎዳዉ፥ ታ ዎልቃዉ፥ ታ ሚፃዉ፥ መቶ ጋላስ ታ ባቃታዳ አትያ በሳዉ፥ ካዎተት ሳኣ ጋፃፐ ኔኮ ይድ፥ “ኑ አዋት ፓናነ ማዶና ዎርዶ ፆሳታ ፃላላ ላትዶሶና።

²⁰ አሳይ ባንታዉ ፆሳታ መናዉ ዳንዳኦና? ኤ፥ ኤንቲ መያኮካ ቱማ ፆሳታ ግዶኮና!” ያጋና።

²¹ “ሄሳ ግሾ፥ ታ ኤንታ ታማርሳና፤ ታ ዎልቃነ ታ ግታተ ኤንታ ኤርሳና። ሄ ዎደ ኤንቲ ታ ሱንይ ጎዳ ግደይሳ ኤራና” ያጌስ ጎዳይ።