Ermiyaasa 11 - ጌሻ ማፃፋ

ናገትቦና ጫቁዋ

¹ ጎዳፐ ኤርምያሳኮ ይዳ ቃላይ ሀይሳ፦

² “ሀ ጫቆ ቃላ ስአዳ ይሁዳ አሳስነ የሩሳላመ ካታማን ደእያ አሳስ ኦዳ።

³ ጎዳይ እስራኤለ ፆሳይ ሀይሳዳ ያጌስ ጋዳ ኦዳ። ‘ሀ ጫቁዋ ናጎና አስ ኦንካ ባደትዳይሳ ግዶ’።

⁴ ታኒ ካሰ ህንተ አዋታ ግብፀ ቢታፈ፥ ብራታ ሴርስያ ጮጭያፐ ከስያ ዎደ፥ ‘ታዉ ኪተትተ፤ ታ ህንተና ኪትያባ ኡባ ኦተ። ህንተ ታ አሰ ግዳና፤ ታካ ህንተ ፆሰ ግዳና’ ያጋዳ ኦዳስ።

⁵ ሄሳዳካ፥ ማነ ኤስ ጎግያ ቢታ ካሰ ህንተ አዋታስ እማናዉ፥ ታኒ ጫቅዳ ጫቁዋ ፖላና።” ታኒ፥ “ኤሮ፥ ጎዳዉ፥ አምንእ” ያጋስ።

⁶ ጎዳይ ታኮ፥ “ሀ ቃላታ ኡባ ይሁዳ ካታማታንነ የሩሳላመ ኦገታን ሀይሳዳ ያጋዳ አዋጃ፦ ‘ሀ ጫቆ ቃላ ስእተ፤ እያ ካልተ።

⁷ ካሰ ህንተ አዋታ ታ ግብፀ ቢታፈ ከስዳ ዎድያፐ ሀች ጋካናዉ፥ ዛራ ዛራዳ፥ “ታዉ ኪተትተ” ጋዳ ሴራስ።

⁸ ሽን ኤንቲ ታ ቃላ ስእቦኮና ዎይኮ ታዉ ኪተትቦኮና። ኤንቲ ባንታ ኢታ ዎዛና ካልዶሶና። ታ ጫቆ ቃላ ኤንቲ ናጋና መላ ኪታስ፤ ሽን ኤንቲ እፅዶሶና። ሄሳ ግሾ፥ ሄ ጫቁዋ ባደ ኡባ ኤንታ ቦላ ኤሀስ’ ” ያግስ።

⁹ ዛርድካ ጎዳይ ታኮ ሀይሳዳ ያግስ፦ “ይሁዳ አሳይነ የሩሳላመን ደእያ አሳይ ታ ቦላ ማቀትዶሶና።

¹⁰ ኤንቲ ካሰ ታ ቃላ ስኦና እፅዳ ባንታ ማይዛታ ናጋራኮ ጉየ ስምዶሶና። ኤንቲ ሀራ ፆሳታ ጎይንዶሶና፤ ኤንታዉ ኦዶሶና። እስራኤለ አሳይነ ይሁዳ አሳይ ታ ካሰ ኤንታ ማይዛታራ ጫቅዳ ጫቁዋ መንዶሶና።

¹¹ ሄሳ ግሾ፥ ‘ኤንቲ ባቃትድ አታናዉ ዳንዳኦና መቱዋ ኤንታ ቦላ ኤሀና። ኤንቲ ታኮ ዋስንካ ታ ኤንታ ስእከ።

¹² ሄ ዎደ ይሁዳ አሳይነ የሩሳላመ አሳይ፥ እፃነ ጩይስያ ባንታ ፆሳታኮ ዋሳና። ሽን መቶ ዎደ ሄ ፆሳት ኤንታ ማዶኮና።

¹³ ህንተኖ፥ ይሁዳ አሳዉ፥ ህንተ ፆሳት ህንተ ካታማታ መላ ዳሮ። ቃስ ባኣለ ጌተትያ ዬላያ ፆሳስ እፃነ ጩይሳናዉ ህንተ ጊግስያ ያርሾ በሳት የሩሳላመ ኦገታ መላ ዳሮ’ ያጌስ ጎዳይ።

¹⁴ “ኤርምያሳ፥ ሀ አሳስ ታና አይኮካ ዎሶፋ፤ ኤንታ ግሾ ጋናቶፓ ዎይኮ ኦይቾፋ። ኤንቲ ባንታ መቱዋ ጋላስ ታና ፄግያ ዎደ ታ ኤንታ ስእከ።

¹⁵ “ዳሮ አሳራ ባ ኢታ ማቁዋ ማቀታሸ፥ ታ ዶስያ ታ አሳይ፥ ታ ኬን በንታናዉ በሲ? ህንተ ህንተ ኢታ ኦሱዋ ኦሽን፥ ያርሸትዳ መህያ አሾይ ህንተና ሴራፐ አሻኔ? ሄሳ ግድያኮ ህንተ ኡፋይታናሽን” ያግስ።

¹⁶ ጎዳይ ነና፥ ድጭያ፥ ሎኦ አይፈ አይፍያ ሻማሆ ያግድ ሱንስ። ሽን፥ እ ሄ ሻማሁዋ ዎልቃማ ዳዳ ጉንን፥ ታማን ፁጋና፤ እያ ታሸይካ መቃና።

¹⁷ ታኒ፥ ህንተና ቶክዳ ኡባፈ ዎልቃማ ጎዳይ፥ ህንተ ቦላ ኢታባ ኤሀናዉ አዋጃስ። እስራኤለ አሳይነ ይሁዳ አሳይ ባኣለስ እፃነ ጩይስድ ታና ይሎይዶሶና።

ኤርምያሳ ቦላ ማቀትዳ ማቁዋ

¹⁸ ጎዳይ ኤንታ ማቁዋ ታዉ ቆንጭስዳ ግሾ ታ ኤራስ። ሄ ዎደ ኤንቲ ኦያ ኢታ ኦሱዋ ታና በስስ።

¹⁹ ታኒ ሹካስ ጊግዳ ዶርሳዳ ሀናስ። ኤንቲ፥ “አነ ምነ እያ አይፍያ ይሶስ። እያ ሱንይ ሀሳየቶና መላ እያ ፓፃ ደኤይሳታ ግዶፈ ሾድድ ድጎስ” ያግድ ማቀትዳይሳ ታ ኤራብከ።

²⁰ ሽን አቤት ኡባፈ ዎልቃማ ጎዳዉ፥ ፅሎ ፕርደይሶ፥ አሳ ዎዛናነ ቆፋ ሻካዳ ኤረይሶ፥ ነ ኤንታ ቦላ ነ ሃሉዋ ከያዳ ታና በሳ። ታኒ ታ ቆሁዋ ነና በሳስ።

²¹ ሄሳ ግሾ፥ “ጎዳ ሱንን ትንብተ ኦዶፓ ኢኮ ነ ኑ ኮሸን ሃይቃና” ያግድ፥ ነና ዎናው ኮይያ አናቶታ አሳባ ጎዳይ ሀይሳዳ ያጌስ።

²² ኡባፈ ዎልቃማ ጎዳይ ሀይሳዳ ያጌስ፦ “ታ ኤንታ ሴራና፤ ኤንታ ፓንት ማሻን ሀይቃና፤ ኤንታ ማጫ ናይትነ አደ ናይት ኮሻን ሀይቃና፤

²³ ኤንታፈ እሶይነ አተና። አይስ ጊኮ፥ ታኒ ሴርያ ላይ አናቶታ አሳ ቦላ ኢታባ ኤሀና” ያጌስ።