Erata 7 - ጌሻ ማፃፋ

ጭንጫተ

¹ አልኦ ሽቶፈ ሎኦ ሱን አስ፤ የለትያ ጋላሳፐ ሀይቆ ጋላስ ሎኦ።

² አሳ ኡባ ዉርሰይ ሀይቆ ግድዳ ግሾ፥ ግብራ ኬ በይሳፈ ዬሆ ኬ በይስ ሎኦ፤ ደኦን ደእያ አስ ሄሳ ባ ዎዛናን ዎናዉ ኮሼስ።

³ አዛኖይ ሶምኦ ካሬኮካ፥ ዎዛና ፖእስያ ግሾ ሚቻፈ አዛኖይ ሎኦ።

⁴ ጭንጫ አሳ ዎዛን ዬሆ ሶን ደኤስ፤ ሽን ኤያ አሳ ዎዛን ኡፋይሳ ሶን ደኤስ።

⁵ ኤያታ የ ስአናፐ ጭንጫታ ሴራ ስስ ሎኦ።

⁶ ኤያ አሳ ሚች አጉንን ታማ የድን ቀይሳ መላ፤ ሄስካ ሀዳ።

⁷ ገነ ኦሶይ ጭንጫ አስ ኤያ ከሴስ፤ ዎፈ ኤኮይ ዎዛና ኢሴስ።

⁸ ዶመፈ ዉርሰ ሎኦ፤ ኦቶሮፐ ዳንዳእ ሎኦ።

⁹ ኤያታ ሀንቆይ ኤንታ ክኦን ደእያ ግሾ፥ ኔኒ ነ ሸምፑዋን ሀንቆስ ኤለሶፓ።

¹⁰ “ሀእ ዎድያፐ ካሰ ዎደይ አይስ ሎኦ ግድዴ?” ጋዳ ኦይቾፋ፤ ሄሳ መላ ኦይሾይ ጭንጫ አስ ኦይችያ ኦይሾ ግደና።

¹¹ ሀ ሳአን ደእያ አስ ኡባይ ጭንጫ ግዳናዉ ኮሼስ፤ ጭንጫተ ደሞይ ላታፐ ሎኦ።

¹² ሚሸይ አሰ ኢታፐ ካምድ አሸይሳዳ ጭንጫተካ አሼስ። ሽን ጭንጫተ ሚሸፐ አይ አሳ ደኦ ናጋናዉ ዳንዳእያ ግሾሳ።

¹³ አነ ፆሲ ኦዳባ አኬካ! ፆሲ ጌላይዳባ ኦን ሱርሳናዉ ዳንዳኢ?

¹⁴ ሳእ ጊግዳ ዎደ ኡፋይታ፤ መቶይ ጋክያ ዎደ አኬካ። ኡፋይስ ግድን መቶ ግድን ፆሲ የድያ ዎደን ዬስ። ሽን አዉስ ኮይሮትድ ያነኮ ኔኒ ኤራካ።

¹⁵ ሀ ሀዳ ግድዳ ታ ላይን ዳሮባ በአስ። ሄስካ፥ ጌላይ ባ ጌላተን አዱሳ ላይ ደእያ ዎደ ፅሎይ ቃን ላይን ሀይቄስ።

¹⁶ ሄሳ ግሾ፥ ኔኒ ኤለ ዮናዳ ዳሮ ፅሎ ዎይኮ ዳሮ ጭንጫ ግዶፓ።

¹⁷ ኔኒ ዎደይ ጋኮና ሀይቆናዳ አዳ ኢታ ግዶፓ፤ አዳ ኤያ ግዶፓ።

¹⁸ ሀ ኡባን ፆሰ ያያ፤ አስ መቶ ኡባ ፆኖን ከያናዉ ዳንዳእያ ግሾ ኔኒ ዳሮ ኢታ ዎይኮ ዳሮ ፅሎ ግዶናሽን ግዶ አስ ግዳ።

¹⁹ ጭንጫተ ጭንጫስ እምያ ዎልቃይ እስ ካታማ ሃርያ ታሙ አሳታ ዎልቃፈ አስ።

²⁰ ፅሎባ ፃላላ ኦድ ናጋራ ኦና ደእያ አስ ሀ ሳኣ ቦላ ባዋ።

²¹ አስ ሃሳያ ቃላ ኡባ ስአዳ ፖላና ጎፓ፤ ኔኒ ኡባ ስአና ጊኮ ነ አይለይ ነና ባድሽን ስአና።

²² ቃስ ኔኒ ነ ሁጰን ሀራታ ባድያባ ነ ዎዛናይ ኤሬስ።

²³ ሄሳ ኡባ ታኒ ጭንጫተን ፕልጋዳ በአስ። ያታዳ፥ “ታኒ ጭንጫ ግዳና” ያጋስ። ሽን ታኒ ግዳይሳዳ ሀንቤና።

²⁴ ጭንጫተ ኡባ ዎደ ሃሆን ደእያባነ ጪሞባ፤ ያትን፥ እያ ኮይድ ደማናዉ ዳንዳኤይ ኦኔ?

²⁵ ታኒ ፕልጋዳ ፄላናዉ ጭንጫተነ ኦዳ ኡባ ዉርሰ ኤራናዉ ቆፓስ። ናጋር ኤያተ፥ ኤያተ ጎሻተ ግደይሳ ኤራናዉ ጋካስ።

²⁶ ታኒ ሀይቆፐ አድ ጫምያ ሀራባ ደማስ። ሄስካ፥ እ ዎዛናይ ግተ፥ እ ኩሸይ ሳንላታ ግድድ ፅሄዳ ኦይክያ እስ ማጫስ በአስ። ፆሰ ያይያ አስ ኢፐ ከስ ኤካና፤ ሽን ናጋራንቹዋ እያ ባ ፅህያን ፃፃዳ ኦይካና።

²⁷ አስታማረይ ሀይሳዳ ያግስ፤ “ታኒ ፕልጋዳ ደምዳባይ ሀይሳ።

²⁸ ሄስካ፥ ታኒ ሀች ጋካናዉ ኮያዳ ደማቦናባ። ሙኩሉ አደ አሳ ግዶፈ ቦንቾይ በሲያ እስ አደ ፃላላ ደማስ፤ ሽን ማጫ አሳ ግዶፈ እስኖካ ደማናዉ ዳንዳአብከ።

²⁹ ታኒ ፕልጋዳ ደምዳ ሀራባይ፥ ፆሲ አሰ ሱረ ቆፋራ መስ፤ ሽን አስ ዳሮ ገነ ኦገ ኮይድ ብስ” ያግስ።