Erata 5 - ጌሻ ማፃፋ

ፆሰ ያያ

¹ ፆሳ ኬ ገልያ ዎደ አኬካዳ ታንጋ። ኤንቲ ባንታ ኢታ ኦሱዋ ኤሮና ግሾ፥ ስአናዉ ሺቆይ ኤያታ ያርሹዋፈ አስ።

² ኦደታናዉ ኤሶቶፓ፤ ፆሳ ስንን ኦደታናዉ ነ ዎዛናን ድርጎፋ። ፆሳይ ሳሎና፥ ኔኒ ሳአና፤ ሄሳ ግሾ፥ ነ ቃላይ ጉ ግዶ።

³ ቆፍ ዳርያ ዎደ አሙሆይ ዳሬስ፤ ኦዳ ዳሮይ ኤያተ ቆንጭሴስ።

⁴ ፆሳስ ገፕዳባ ፖላናዉ ጋምኦፋ፤ ኤያታን ፆሳይ ኡፋይተና። ሄሳ ግሾ፥ ኔኒ ገፕዳባ ኡባ ፖላ።

⁵ እስባ ገፕድ ፖሎና አጋናፐ ኮይሮ ገፖና አጎይ ሎኦ።

⁶ ናጋራን ነና ገልሶና መላ ነ እንፃርሳ የዳ ኦፋ። ፆሳ ኬን ኦይሳኮ፥ “ኮይሮ ሀይሳ ታኒ አኬኮና ገፓስ” ጎፓ። ሄስ ፆሳ ዳሮ ሀንቀያ ግሾ፥ ነ ኩሸ ኦሶ ኡባ እ ባ ሀንቁዋን ይሳናዉ ዳንዳኤስ።

⁷ ዳሮ አሙሆይነ ዳሮ ኦድ ሀዳ። ሄሳ ግሾ፥ ፆሳ ያያ።

ዱረተ ሀዳ

⁸ እስ ቢታን ማንቆት ናቀትሽን፥ ፕርድ ጌላትሽን ኔኒ በእኮ ማላለቶፋ። እስ እስ ሀላቃስ እያፐ ቦላራ ሹመትድ እያ ፄልያ ሀራ ሀላቅ ደኤስ። ቃስ ኤንታፈ ቦላራ ሹመትድ ኤንታ ፄልያ ሀራ ሀላቃት ደኦሶና።

⁹ ቢታፈ በንትያ ዎይ ኡባሳ፤ ሀር አቶሽን፥ ካዎይካ ጎሻፈ ጎኤቴስ።

¹⁰ ብራ ዶስያ ኡራስ ብር ግድ ኤረና፤ ዱረተ ሲቅያ ኡራይ ሚሸ ካል ኤረና፤ ሄ ኡባይ ሀዳ።

¹¹ ዱረተ ዳርያ ዎደ ምያ አስ ዳሬስ። ባ ሻሉዋ ጮ አይፈን ፄልድ፥ “ታኒ ዱረ” ጋናፐ ሀራባ አይ ማዲ?

¹² ኦሶ ኦያ አስ ጉ ምን ዳሮ ምን፥ ሳሮ ስኮ ስኬስ፤ ሽን ዱረይ ባ ዱረተስ ኡባ ዎደ ኡንኤትያ ግሾ ስኮ ይድ ደኤስ።

¹³ ሳሎፐ ጋርሳን ዳሮ አዛንያባ ሀራባ ታኒ በአስ። ሄስካ ኢታ ዎደ ባና አሾ ግድ ምንጅዳ ሻሎ፥

¹⁴ ዎይኮ እስ ኢታባይ ጋክን ይዳ ዱረተ። እ ናአ የልዳባ ግድኮካ ናኣ ላትስያባ ይድ መላ አቴስ።

¹⁵ አስ ኡባይ ካሎ የለትዳይሳዳ መላ ኩሸ ስሚድ ባና። አይ መላ እ ዳቡርድ ኦኮካ ኤክድ ብያባይ ባዋ።

¹⁶ አስ ካሎ የለትድ ካሎ ጉየ ስመይስ ዳሮ አዛንያ ኢታባ። እያ ዳቡራ ኡባይ ጫርኮ ኦይክያባዳ ሀዳ ግድኮ እያ አይ ማዲ?

¹⁷ እ ባ ላይ ኡባ ማ ደኦን፥ አዛኖን፥ ዬላን፥ ሀርገንነ ይሎን ዉርሴስ።

¹⁸ ህዛ፥ ታኒ አኬክዳ እስ ሎኦባይ፥ ሳሎፐ ጋርሳን ፆሲ አሳስ እምዳ ቃን ላይን፥ አስ ባ ዳቡራፐ ምድ ኡይድ ኡፋይተይስ ሎኦነ በሲያባ፤ እያ ቃዳይ ሄሳ።

¹⁹ ፆሲ አሳስ ዱረተነ ሻሎ እመይ፥ ባ ዳቡራ ጋትያ ደምድ፥ ምድ ኡይድ ኡፋይታና መላሳ፤ ሄስካ ፆሳፈ እያዉ እመትዳ እሞታ።

²⁰ ፆሲ እያ ዎዛናን ኡባ ዎደ ኡፋይስ ኩንያ ግሾ እ ባ ደኦ ላይባ ዳሮ ቆፐና።