Efesoona 6 - ጌሻ ማፃፋ

ናይታነ ኤንታ የልዳይሳታ

¹ ናይቶ፥ ህንተ ጎዳባ ግድያ ግሾ ህንተና የልዳይሳታስ ኪተትተ። ሄስ ህንተዉ በሲያባ።

² “ነ አይዉነ ነ አዋ ቦንቻ።” ሄስ ኡፋይሳ ቃል ደእያ ኮይሮ ኪታ።

³ “ነ ሄሳ ፖልያባ ግድኮ ኡባይ ነዉ እንጀታና፤ ነ ላይይ ሳአ ቦላ አዱቃና።”

⁴ አዋቶ፥ ህንተ ናይታ ጎዳ ቃላ ታማርሶንነ ኤንታ ካለሶን ድችተፐ አትሽን፥ ኤንታና ጫምሶፕተ።

ጎዳታነ አይለታ

⁵ አይለቶ፥ ክርስቶሳስ ኪተተይሳዳ ህንተ ሳአ ጎዳታስ ያሻን፥ ቦንቾንነ ሱረ ዎዛናን ኪተትተ።

⁶ ኤንታ ስንን ሳባ ደማናዉ ኤንቲ በእያ ዎደ ፃላላ ኦፍተ። ሽን ክርስቶሳ አይለታዳ ፆሳ ሸንያ ዎዛናፐ ፖልተ።

⁷ አሳስ ግዶናሽን፥ ጎዳስ ግድ ህንተ ኩመ ዎዛናፐ ኦተ።

⁸ አይለ ግድን ዎይኮ ጎዳ ግድን እሶይ እሶይ ባ ኦዳ ሎኦ ኦሱዋስ ጎዳፐ ዎይቶ ኤካናይሳ ኤሬታ።

⁹ ጎዳቶ፥ አሳ ሶምኦ በእድ ማዶና ጎዳይ፥ ሳሉዋን ደኤይሳ ኤሬታ። ሄሳ ግሾ፥ ህንተ አይለታ ማንደይሳ አግድ ኤንቲ ህንተዉ ቦንቾን ኪተተይሳ መላ ህንተ ኤንታዉ ሎኦባ ኦተ።

ፆሳ ኦላ ሚሸ

¹⁰ ዉርሰን፥ ጎዳንነ እያ ግታ ዎልቃን ምንተ።

¹¹ ፃላሄ ጭሙዋ ኤቀታናዉ ዳንዳአና መላ ፆሳይ ህንተዉ እምዳ ኦላ ሚሽያ ኡባ ማእተ።

¹² ኑ ኦላይ አሳራ ግዶናሽን፥ ሳሎን ደእያ ቱና አያና ኦላንቾታራ፥ ማታ አዋታራ፥ ሃረይሳታራነ ሀ ማ አላምያ ዎልቃታራ።

¹³ ሄሳ ግሾ፥ ኢታ ጋላሳ ተቃናዉነ ኡባ ፖልድ፥ ምንድ ኤቃናዉ ህንተ ዳንዳአና መላ ፆሳ ኦላ ሚሸታ ኡባ ማእተ።

^14-15 ቱማ ፄሳን ዳንጮዳ ዳንጭድ፥ ፅሎተ ፁሩረዳ ትራን ዎድ፥ ሳሮተ ዎንገላ ህንተ ቶሁዋን ጫማዳ አድ ምንድ ኤቅተ።

¹⁶ ሄ ኡባፈ አድ፥ ፃላሄይ የድያ ላፅያ ታማ ዶንገ ኡባ ቶይሳናዉ ዳንዳእያ አማኑዋ ኡባ ዎደ ጎንዳለዳ ኦይክተ።

¹⁷ ፆሳ አቶተ ብራታ ባርኔፃዳ ህንተ ሁጰን ዎተ፤ ቃስ ጌሻ አያና ማሻ እካ፥ ፆሳ ቃላ ኦይክተ።

¹⁸ ዎሳ አጎፍተ፤ ሀራታስካ ጋናትተ፤ ኡባ ዎደ አያናን ዎስተ። ሄሳን፥ ጌሻታስ ሳለቶና ምንድ ኡባ ዎደ ዎስተ።

¹⁹ ታኒ ዎንገላ ፁራ ያሽ ባይና ቆንጭሳዳ ኦዳና መላ ፆሳይ ታዉ ቃላ እማና መላ ዎስተ።

²⁰ ታኒ ሄሳ ኦናዉ ኪተታስ ሀእካ ቃሾን ደኤይ ሄ ዎንገላ ግሾሳ። ያንያ ግሾ፥ ታኒ ያሽ ባይና በሰይሳዳ ኦዳና መላ ታዉ ዎስተ።

ሳሮ

²¹ ታኒ ዋና ደእያኮነ አይ ኦያኮ ህንተ ኤራና መላ ኑ ሲቆ እሻይ፥ ጎዳ ኦሱዋን አማነትዳ ኦሳንቾይ፥ ትክቆስ፥ ታባ ኡባ ህንተዉ ኦዳና።

²² ኑኒ ኡባይ ዋንድ ደእያኮ ህንተዉ ኦዳና መላነ ህንተና ምንና መላ ታኒ እያ ህንተኮ ኪታስ።

²³ ፆሳ አዋፐ፥ ጎዳ የሱስ ክርስቶሳፐ ሳሮተይነ ሲቆይ አማኖራ እስፈ አማንያ ኡባስ ግዶ።

²⁴ እርፆና ሲቆን ኑ ጎዳ የሱስ ክርስቶሳ ሲቅያ ኡባራ ፆሳ አ ኬሀተይ ግዶ።