Efesoona 5 - ጌሻ ማፃፋ1 ህዛ፥ ፆሳይ ዶስያ ናይታዳ እያ ዳንተ። 2 ክርስቶስ ኑና ዶስድ ባና ኑ ግሾ ፆሳስ ሳውያ እሞነ ያርሾ ኦድ እምዳይሳዳ ህንተካ ሲቆን ደእተ። 3 ሽን ላይማተ፥ ቱናተነ ኡዘተ አማንያ አሳስ በሶና ግሾ ህንተ ግዶን ኡባራካ ስኤቶፎ። 4 ፆሳ ጋላትተፐ አትሽን፥ ዬላያባይነ ኤያ ኦድ ዎይኮ ቅይ ህንተዉ በሶና ግሾ ህንተ ግዶን ኡባካ ደኦፖ። 5 ሀይሳ ኤርተ፤ ኦንካ ላይማተይ ዎይኮ ቱናባ ኦይ ዎይኮ ኡዘተይ ክርስቶሳ ካዎተነ ፆሳ ካዎተ ላታናዉ ዳንዳኤና። ኡዘተ ኤቃ ጎይኖ መላ። 6 ሀይሳታ ጋሶን ፆሳ ሀንቆይ ኪተቶና አሳ ቦላ ያና ግሾ ኦንካ ህንተና ፓና ኦዳን ጭሞፎ። 7 ሄሳ መላ አሳራ እስፈተ ኦፍተ። 8 ካሰ ህንተ ማን ደእደታ፥ ሽን ሀእ ጎዳ ባጋራ ፖኦን ደኤታ። ህዛ፥ ፖኦ አሳዳ ፖኦን ስመረትተ። 9 ፖኦይ ሎኦተ፥ ፅሎተነ ቱማተ አይፌስ። 10 ጎዳ ኡፋይስያባ ኦናዉ ኮይተ። 11 ጎእ ባይና ማ ኦሶ ቆንጭስተፐ አትሽን፥ እያራ እስፎፕተ። 12 ኤንቲ ጌማን ኦያ ኦሱዋ ሀር አቶሽን ኦዳናዉካ ዬላዬስ። 13 ሽን ኡባባይ ፖኦን ከይያ ዎደ ቆንጨን በንቴስ። 14 ፖኦይ ኡባባ ቆንጨን በሴስ። ሄሳ ግሾ፥ “ነኖ ስከይሶ ባርካ፤ ሀይቆፐ ደንዳ፤ ክርስቶስ ነ ቦላ ፖአና” ያገትስ። 15 ህዛ፥ ህንተ ዋንድ ደእያኮ አኬክ በእተ። ጭንጫታ ግድተፐ አትሽን፥ ኤያታ ግዶፕተ። 16 ላይይ ኢታ ግድያ ግሾ እንጀትያ ዎደ ኡባ ጎኤትተ። 17 ሄሳ ግሾ፥ ጎዳ ሸነይ አይበኮ አኬክተፐ አትሽን፥ ኤዮፕተ። 18 ጌሻ አያናን ጋላስ ጋላስ ኩምተፐ አትሽን፥ ዮኮ ህንተና ካለያ ግሾ ዎይነ ኡሻን ማቶፍተ። 19 ማዝሙረን፥ ሳባንነ አያና የን፥ እሶይ እሱዋራ ኦደትተ። ቃስ ህንተ ዎዛናን የፅሸነ ሳቢሸ ጎዳ ጋላትተ። 20 ኑ ጎዳ የሱስ ክርስቶሳ ሱንን ኡባ ዎደ ፆሳ አዋ ኡባባስ ጋላትተ። 21 ክርስቶሳ ቦንቹዋስ ግድ እሶይ እሱዋስ ሃረትተ። አዝናባነ ማችባ 22 ማቸቶ፥ ጎዳስ ሃረተይሳዳ ህንተ አዝናታስ ሃረትተ። 23 ክርስቶስ ዎሳ ኬስ ሁጰ ግደይሳዳ አዝንካ ባ ማቼስ ሁጰ። ቃስ ክርስቶስ ባ አሳተ ግድዳ ዎሳ ኬ አሸይሳ። 24 ሽን ዎሳ ኬይ ክርስቶሳስ ሃረተይሳዳ ማቸት ባንታ አዝናታስ ኡባባን ሃረታናዉ በሴስ። 25 አዝናቶ፥ ክርስቶስ ዎሳ ኬ ዶስድ ባና እዉ እምዳይሳዳ ህንተካ ህንተ ማቸታ ዶስተ። 26 እ ዎሳ ኬ ባ ቃላ ባጋራ ሃን ሜጭድ ጌሽስ። 27 ክርስቶስ ዎሳ ኬ ቅት ዎይኮ ሶምኦ ቱስ ዎይኮ ሄሳ መላባይ ባይና እ ኩመ ቦንቹዋራ ጌሽነ ቦረቶናሮ ኦድ ባኮ ሺሻናዉ ኮይድ ሄሳ ኦስ። 28 ሄሳዳካ፥ አዝናት ባንታና ዶሰይሳዳ ባንታ ማቸታ ዶሳናዉ በሴስ። ባ ማችዉ ዶሰይስ ባና ዶሴስ። 29 ባና እፅያ አስ ኦንካ ባዋ፥ ሽን ክርስቶስ ዎሳ ኬስ ኦይሳዳ ባ አሳተ ሙዜስነ ናጌስ። 30 ኑኒ ክርስቶሳ አሳተ ብልተታ። 31 ፆሳ ቃላይ፥ “ሄሳ ግሾ፥ አስ ባ አዋነ ባ አይዉ አግድ፥ ባ ማቸራ እስፈ ዳና፤ ኤንቲ ናምአይካ እስ አሾ ግዳና” ያጌስ። 32 ሀይስ ግታ ፁራ፥ ሽን ታኒ ሄሳ ክርስቶሳባነ ዎሳ ኬባ ሌምሶ ኦዳ ኦዳይስ። 33 ግዶሽን፥ ህንተ እሶይ እሶይ ህንተ ማቸታ ህንተ፥ ህንተና ዶሰይሳዳ ዶስተ። እስ እስ ማቻ ባ አዝና ቦንቻናዉ በሴስ። |
The Word for the World International and The Word for the World Ethiopia