Efesoona 4 - ጌሻ ማፃፋ

ኑኒ ክርስቶሳን እስኖ

¹ ህዛ፥ ጎዳ ግሾ ቃሸትዳ ታኒ፥ ህንተ ፄገትዳ ፄሳስ በሲያ ደኦ ዳና መላ ህንተና ዎሳይስ።

² ህንተ ኡባ ዎደ አዳታነ ሀዮ ግድተ፤ እሶይ እሱዋ ዳንዳእተነ ሲቆን ደእተ።

³ ሳሮተን ቃሸትድ አያናይ እምያ እስፈተ ናጋናዉ ምንተ።

⁴ ፆሳይ ህንተና ፄግዳ ዎደ እስ ኡፋይሳስ ፄግዳይሳዳ እስ አሳተነ እስ አያን ደኤስ።

⁵ እስ ጎዳይ፥ እስ አማኖይነ እስ ፅንቃተይ ደኤስ።

⁶ ኡባፈ ቦላ ግድዳ፥ ኡባ ባጋራ ኦያነ ኡባ ግዶን ደእያ እስ ፆሳይ፥ ኡባ አዋይ ደኤስ።

⁷ ሽን ክርስቶስ እማናዉ ኮይዳይሳዳ ኑ እሶይ እሶይ ዱማ ዱማ እሞታ ኤክዳ።

⁸ ሄሳ ግሾ፥ ፆሳ ቃላይ፥ “እ ፑደ ከይዳ ዎደ ድኤትዳ ዳሮታ ባራ ኤክድ ብስ፤ አሳስካ እሞታ እሚስ” ያጌስ።

⁹ ያትን፥ “ፑደ ከይስ” ጉሳይ ዎይ ጉሴ? እ ኮይሮ ዱገ፥ ሳኣ ዝቃ በሳ ዎስ ጉሱ ግዶና እፅኮ አይ ጉሴ?

¹⁰ ሀ ዱገ ዎዳይስ፥ ኡባ በሳን በንታናዉ ኡባፈ ቃ ሳሉዋ ከይዳይስ እያ።

¹¹ እ እሶታ እሶታ ሀዋረታ፥ እሶታ እሶታ ናበታ፥ እሶታ እሶታ ዎንገላ ሳባከታ፥ እሶታ እሶታ ዎሳ ኬ ሄመይሳታ፥ እሶታ እሶታ አስታማረታ ኦድ እሚስ።

¹² እ ሄሳ ኦዳይ ክርስቶሳ አሳተ ግድዳ ዎሳ ኬ ድቻናዉነ አማንያ አሳ ፆሳ ኦሶስ ጊግሳናሳ።

¹³ ሄሳዳካ፥ ኑ ኡባይ ፆሳ ናኣ ኤርድ አማኖን በንትያ እስፈተኮ ጋክድ፥ ክርስቶሳ አያና ደኡዋ ኩመ ጋክድ ድጫና መላሳ።

¹⁴ ህዛፐ ጉየ፥ አሳ ገነ ጭሞን ጊግዳ ባለያ ዎርዶ ትምርተ ጫርኮንነ ሆበን ገደነ ሃ ኩሎ ካእያ ናይታ መላ ግዳናዉ በሰና።

¹⁵ ሽን ኑኒ ቱማ ሲቆን ኦድሸ፥ አሳተስ ሁጰ ግድያ ክርስቶሳራ ደእያ እስፈተ ጉጅ ጉጅ ድቾስ።

¹⁶ ኩመ አሳተይ ክርስቶሳ ቦላ ዘምፔስ ቃስ ዱማ ዱማ አሳተ ብልተት እሶይ እሱዋራ ኦይከትድ ኡትስ። እስ እስ አሳተ ክፍለይ ባ ኦሱዋ ኦያ ዎደ ኩመ አሳተይ ሲቆን ድጬስ።

ጋልአ ደኦነ ኦራ ደኦ

¹⁷ ሄሳ ግሾ፥ ታኒ ሀይሳ ህንተዉ ጎዳ ሱንን ኦዳይስነ ማርካታይስ። ጎእ ባይና ቆፋ ቆፕያ አይሁደ ግዶና አሳታዳ ደኦፕተ።

¹⁸ ኤንታ ቆፋይ ምስ፤ ባንታ ዎዛና ሙምስዶሶና። ኤንቲ ኤራተ ዮንነ እፃስ ግድ ፆሳይ እምያ ደኡዋፐ ሃክዶሶና።

¹⁹ ኤንቲ ዬላ ግያባ ኤሮኮና፤ ኤንቲ ላይማተስ ባንታና አድ እምዶሶና፤ ቃስ ቱናባ ኡባ ጉየ ጎና ኦሶና።

²⁰ ሽን ህንተ ክርስቶሳ ኤርዳይ ሄሳ መላ ኦገን ግደና።

²¹ እያባ ቱማ ስእደታ። ቃስ የሱሳን ደእያ ቱማ መላ እያፐ ታማርደታ።

²² ህንተ ካሰ ደእዳ ደኦ ኦግያ አግተ። ቃስ ባ ጭምያ አሞን ይያ ህንተ ጬጋ አሳተ ድግተ።

²³ ህንተ ዎዛና ቆፋን ኦራፅተ።

²⁴ ቱማ ፅሎተንነ ጌሻተን ፆሳ ሌምሶን መትዳ ኦራ አሳተ ማእተ።

²⁵ ህዛ፥ ዎርዶ ኦደቶፍተ። ኑኒ ኡባይ ክርስቶሳ አሳተ ብልተታ ግድያ ግሾ አሳ ኡባራ ቱማ ኦደትተ።

²⁶ ሀንቀትተ፥ ሽን ህንተ ሀንቁዋን ናጋራ ኦፍተ። ህንተ ሀንቀት ደእሽን አው ዉሎፎ።

²⁷ ፃላሄስ በሰ እሞፍተ።

²⁸ ካይሶትያ ኡራይ ህዛፐ ጉየ ካይሶቶፖ። ሽን ማንቆታ ማድያባይ እያዉ ዳና መላ ባ ኩሸን ሎኦባ ኦ።

²⁹ ህንተ ዶናፐ ኢታ ቃል ከዮፖ። ሽን ስኤይሳታ ጎአና መላነ ሀራታ ምንያ ኮሽያ ሎኦ ቃል ህንተ ዶናፐ ከዮ።

³⁰ ፆሳይ ህንተና ዎዝያ ጋላሳስ ህንተና አታምድ ዎዳ ፆሳ አያና አዛንፍተ።

³¹ ጫመተ፥ ይሎ፥ ሀንቆ፥ ዋሶ፥ ጫሸነ ኢታ ኡባ ህንተፈ ሃስተ።

³² አድ እሶይ እሱዋስ ኬሀነ ቃተይሳታ ግድተ። ፆሳይ ክርስቶሳ ባጋራ ህንተዉ አቶ ግዳይሳዳ ህንተካ ዎልስ አቶ ጊተ።