Efesoona 2 - ጌሻ ማፃፋ

ክርስቶሳን ሀይቆፐ ደኦ ፕነ

¹ ሀይሳፈ ካሰ ህንተ፥ ህንተ ናጋራነ ህንተ ቆሁዋ ጋሶን ሀይቅዳይሳታ።

² ሄ ዎደ ህንተ ሀ አላምያ ኢታ ኦግያ ካልደታ። ጫርኩዋ ቦላ ደእያ አያና ዎልቃታ ሀላቃስነ ሀእካ ፆሳስ ኪተቶና አሳ ሃርያ አያናስ ኪተትደታ።

³ ኑ ኡባይካ ካሰ ሄ አሳታ ግዶን ኑ አሾ አሙዋነ ኑ ዎዛና ሸንያ ካልድ ደእዳ። ኑካ ሀራታ መላ ኑ መተን ፆሳ ሀንቁዋ ኤካናዉ ደኤይሳታ።

⁴ ሽን ፆሳ ግታ ማሮተፈነ ኑስ ደእያ ግታ ሲቁዋፐ ደንድዳይሳን፥

⁵ ሀር አቶሽን ኑኒ ኑ ቆሁዋን ሀይቅድ ደእሽን ክርስቶሳ ባጋራ ኑስ ደኦ እሚስ። ህንተካ አትዳይ ፆሳ አ ኬሀተና።

⁶ ፆሳይ ኑና ክርስቶሳራ እስፈ ሀይቆፐ ደንድ ሳሎን እያራ እስፈ ዎስ።

⁷ እ ሄሳ ኦዳይ፥ ክርስቶስ የሱሳ ባጋራ ኑስ ቆንጭስዳ ባ ኬሀተነ ዛው ባይና ባ አ ኬሀተ ዱረተ ያና ላይን ኑና በሳናሳ።

⁸ ህንተ አ ኬሀተን አማኖን አትደታ። ሄስካ፥ ፆሳ እሞታፐ አትሽን፥ ህንተ ኦሶን በንትዳባ ግደና።

⁹ ኦንካ ጬቀቶና መላ አቶተይ በንትዳይ ኦሶን ግደና።

¹⁰ ኑኒ ፆሳ መተ፤ እ ኑስ ካሰትድ ጊግስ ዎዳ ሎኦ ኦሶታ ኦና መላ ክርስቶስ የሱሳ ባጋራ ኦራ መትዳ።

ክርስቶሳራ ደእያ እስፈተ

¹¹ ሄሳ ግሾ፥ ህንተኖ የለታን አይሁደ ግዶናይሳቶ፥ አይሁደት ባንታዉ አሳ ኩሸን ቃፃረትድ፥ ህንተና ቃስ ቃፃረትቦናይሳታ ግድ ፄገይሳ አኬክተ።

¹² ሄ ዎደ ህንተ ክርስቶሳፐ ሻከት ደእዳይሳ፥ እስራኤለ አሳስ አላጋ ግድድ ደእዳይሳ፥ ፆሳ ኡፋይሳ ቃላፐ ሃክድ ደእዳይሳነ ሀ አላምያን ኡፋይስነ ፆሲ ባይና ደእዳይሳ አኬክተ።

¹³ ሽን ህንተ ካሰ ሃክድ ደእዳይሳት፥ ሀእ ክርስቶስ የሱሳን ደእድ ክርስቶሳ ሱን ማታ ሺቅደታ።

¹⁴ ክርስቶስ ኑ ሳሮተ፤ እ አይሁደነ አይሁደ ግዶና አሳ ትምድ፥ ናምኣ ሻክ ዎዳ ሞርከተ ጎዳ ላልስ።

¹⁵ እ ባናን ሀ ናምኡ ኮቻታፐ እስ ኦራ አሰ መድ፥ ህግያ እያ ኪታራነ ዎጋታራ እስፈ ባ አሳተን ይስድ ሳሮተ እሚስ።

¹⁶ ክርስቶስ ማስቃልያ ቦላ ሀይቅድ ሞርከተ ይስስ፤ ቃስ ናምኡ ኮቻታ እስ አሳተ ኦድ ፆሳራ ስገስ።

¹⁷ ክርስቶስ ይድ፥ ፆሳፈ ሃክድ ደእያ ህንተዉ፥ ቃስ ማትድ ደእያ ኤንታዉ ሳሮተ ዎንገላ ኦድስ።

¹⁸ ኑ ኡባይ እያ ባጋራ እስ አያናን አዋ ስን ሺቃናዉ ዳንዳኦስ።

¹⁹ ህዛፐ ህንተ አላጋ ዎይኮ እማ ግደከታ፥ ሽን ህንተ ሀእ ጌሻታ ቢታ አስነ ፆሳ ሶ አስ።

²⁰ ህንተ ሀዋረትነ ናበት ባስዳ ባሱዋ ቦላ ኬፀትደታ። ጎዳ ፃጱዋ ምንያ ሹቻይ ክርስቶስ የሱሳ።

²¹ እያን ኬ ኡባይ እስፈ ኦይከትድ ጎዳን ጌሻ ፆሳ ኬ ግዳናዉ ድጬስ።

²² ህንተ ቃስ ፆሳይ ባ አያናን ደእያ ኬ ግዳናዉ ክርስቶሳን እስፈ ኬፀተታ።