Efesoona 1 - ጌሻ ማፃፋ

¹ ፆሳ ሸነን ክርስቶስ የሱሳ ሀዋረ ግድዳ ጳዉሎሳፐ፥ ኤፈሶናን ደእያ ጌሻታስነ ክርስቶስ የሱሳ አማነይሳታስ ፃፈትዳ ኪታ።

² ፆሳ ኑ አዋፐነ ጎዳ የሱስ ክርስቶሳፐ አ ኬሀተይነ ሳሮተይ ህንተዉ ግዶ።

ክርስቶሳን ደእያ አያና አንጁዋ

³ ሳሎን ደእያ አያና አንጆ ኡባን ክርስቶሳ ባጋራ ኑና አንጅዳ፥ ኑ ጎዳ የሱስ ክርስቶሳ አዋይ፥ ፆሳይ ጋላተቶ።

⁴ ኑኒ እያ ስንን ጌሻታነ ቦረይ ባይናይሳታ ግዳና መላ ፆሳይ አላመይ መታናፐ ካሰ ክርስቶሳ ባጋራ ባ ሲቁዋን ኑና ዶርስ።

⁵ ፆሳይ ባ ሸንያን ባ ዶስዳይሳዳ የሱስ ክርስቶሳ ባጋራ ኑና ባ ናይታ ኦናዉ ካሰትድ ቆፕ ዎስ።

⁶ ፆሳይ ባ ሲቅያ ናኣ ባጋራ ኑስ ጮ እምዳ አ ኬሀተይ ቦንቸታና መላ ሄሳ ኦስ።

⁷ ፆሳ አ ኬሀተ ዱረተዳ ክርስቶሳ ሱን ዎዘትድ ናጋራ አቶተ ደምዳ።

⁸ ባ አ ኬሀተ ጭንጫተንነ ኤራተን ኩንድ ኑስ እሚስ።

⁹ ፆሳይ ባ ዶስዳይሳዳ ክርስቶሳ ባጋራ እያ ሸንያ ፁራ ኑ ኤራና መላ ኦስ።

¹⁰ ዎደይ ጋክያ ዎደ ፆሳይ ፖላናዉ ቆፕዳ ቆፋይ፥ ሳሎንነ ሳአን ደእያ መተ ኡባይ ክርስቶሳፐ ጋርሳን ግዳና መላሳ።

¹¹ ኡባባ ባ ሸንያዳ ኦያ ፆሳይ፥ ካሰትድ ሀልችዳይሳ ክርስቶሳ ባጋራ ኑኒ እያባ ግዳና መላ ኑና ዶርስ።

¹² ሄሳ እ ኦዳይ፥ ክርስቶሳን ኡፋይስ ዎድ ናጎን ኮይሮ ግድዳ ኑኒ ፆሳ ቦንቹዋ ጋላታን ቆንጭሳና መላሳ።

¹³ ህንተካ ህንተ አቶተ ዎንገላ፥ ሄስካ ቱማ ቃላ ስእዳ ዎደ ክርስቶሳ አማንደታ። ፆሳይ ህንተዉ እማና ግዳ ጌሻ አያናን ህንተ አታመትደታ።

¹⁴ ፆሳ ቦንቾይ ጋላተታና መላ ፆሳይ ባ አሳ ዎዛና ጋካናዉ ጌሻ አያና ኑስ ኦይ ኦድ እሚስ።

ጳዉሎሳ ዎሳ

¹⁵ ሄሳ ግሾ፥ ጎዳ የሱሳ ህንተ አማነይሳነ ጌሻታ ኡባ ህንተ ሲቀይሳ ታ ስእዳ ዎደ

¹⁶ ታ ዎሳን ህንተና ቆፓሸ ህንተ ግሾ ፆሳ ጋላተይሳ አጋብከ።

¹⁷ ጎዳ የሱስ ክርስቶሳ ፆሳይ፥ ቦንቾ አዋይ፥ ፆሳ ህንተ አድ ኤራናዳ ጭንጫተነ ቆንጨ አያና ህንተዉ እማናዳ ታኒ ፆሳ ዎሳይስ።

¹⁸ ፆሳይ ህንተና ፄግዳ ኡፋይሳይነ ጌሻት ላትያ ቦንቾ ላታይ አይ መላ ዳሮኮ ህንተ ኤራና መላ ፆሳይ ህንተ ዎዛና አይፍያ ዶያና መላ ታኒ ፆሳ ዎሳይስ።

¹⁹ ቃስ እያ አማንያ ኑናን ኦያ እያ ዎልቃይ አይ መላ አዳ ግቴኮ ህንተ ኤራና መላ ዎሳይስ። ሄ ዎልቃይ ፆነቶናነ ዳቡሮና ዎልቃ። ሀ ኑናን ደእድ ኦያ ዎልቃይነ፥

²⁰ ክርስቶሳ ሀይቆፐ ደንድ፥ ሳሎን ፆሳፈ ኡሻቻ ባጋራ ኡትስዳ ግታ ዎልቃይ እስኖ።

²¹ እያ ሱንይ፥ አይሰይሳታፐነ ማታ አዋታፐ፥ ሃረይሳታፐነ ጎዳታፐ፥ ቦላ ግድድ ሀ አላምያ ፃላላን ግዶናሽን፥ ስንፈ ያና አላምያንካ ሀራ ሱንታ ኡባፈ ቃ።

²² ፆሳይ ኡባ ክርስቶሳ ቶሆፐ ጋርሳን ሃርስስ፤ ቃስ ዎሳ ኬን፥ ኡባባን ጎዳ ግዳና መላ እያ ሹምስ።

²³ ዎሳ ኬ ክርስቶሳ ኩመ ኦያ እያ አሳተ። መተይ ደእያ በሳ ኡባን ክርስቶስ ባ ሁጰን ኡባባ ኩንይሳ።