Daanela 9 - ጌሻ ማፃፋ

ዳነላ ዎሳ

¹ ሜዶና አስ ግድዳ አርፀክስሳ ናአይ፥ ዳርዮስ ባብሎነን ካዎትስ።

² እ ካዎትዳ ኮይሮ ላይን፥ ታኒ ዳነል፥ ጌሻ ማፃፋታ ናባባሸ፥ ናበይ ኤርምያስ ኦድዳይሳዳ፥ የሩሳላመይ ላፑን ታሙ ላይ ላለትድ ጋምአናዉ ደኤይሳ አኬካስ።

³ ሄሳ ግሾ፥ ካዮ ማኦ ማአዳ፥ ብዶ ታ ሁጰን ቆላዳ፥ ፆማሸነ ዎሳሸ ታ ጎዳ ፆሳኮ ታ ሶምኡዋ ዛራስ።

⁴ ታ ናጋራ ፓፃሸ፥ ጎዳ፥ ታ ፆሳ ሀይሳዳ ያጋዳ ዎሳስ፦ “አቤት ጎዳዉ፥ ዎልቃማነ ያሽያ ፆሳዉ፥ ነና ዶሰይሳታስነ ነዉ ኪተተይሳታስ ነ መርና ሲቁዋነ ጫቁዋ ናገይሶ፥

⁵ ኑ ናጋራ ኦዳ ባልዳ። ኑ ኢታባ ሀንዳ፤ ማካልዳ፤ ነ ኪታፐነ ነ ህግያፈ ካረ ከይዳ።

⁶ ኑ ካዎታስ፥ ኑ ሀላቃታስ፥ ኑ አዋታስነ ቢታን ደእያ አሳ ኡባስ ነ ሱንን ትንብተ ኦድዳ ነ ናበታ ስኦና እፅዳ።

⁷ “አቤት ጎዳዉ፥ ነ ፅሎ፤ ሽን ኑኒ ሀች ዬላ ማእዳ። ይሁዳንነ የሩሳላመን ደእያ አሳ ኡባይ ነዉ አማነቶና እፅን፥ ነ ሃሆ ቢታንነ ማታ ቢታን ላልዳ እስራኤለ አሳ ኡባይ ዬላትዳ።

⁸ አቤት ጎዳዉ፥ ኑኒ፥ ኑ ካዎት፥ ኑ ሀላቃትነ ኑ አዋት ነና ናቅዳ ግሾ ዬላ ማእዳ።

⁹ ሽን ኑ እያ ቦላ ማካልኮካ፥ ጎዳይ ኑ ፆሳይ ማርያነ አቶ ግያ ፆሲ።

¹⁰ ኑኒ ኑ ጎዳ፥ ኑ ፆሳ፥ ኪተትቦኮ፤ ቃስ ባ ናበታ ባጋራ እምዳ እያ ህግያ ናግቦኮ።

¹¹ እስራኤለ አሳ ኡባይ ነ ህግያ መንድ፥ ካረ ከይዶሶና፤ ነዉ ኪተትቦኮና። “ኑ ነ ቦላ ናጋራ ኦዳ ግሾ፥ ፆሳ አይልያ ሙሰ ህገ ማፃፋን ፃፈትዳ ባደይነ ፕርዳይ ኑ ቦላ ጋክስ።

¹² ቃስ ኑ ቦላነ ኑና ካለይሳታ ቦላ ግታ መቶ ኤሀናዉ ነ ኦድዳ ቃላ ኑ ቦላ ፖላዳሳ። የሩሳላመ ቦላ ጋክዳ መቱዋ መል ሳሎፐ ጋርሳን ሀራ ቢታ ቦላ ጋክቤና።

¹³ ሙሰ ህግያን ፃፈትዳይሳዳ፥ ሀ ዮ ኡባይ ኑ ቦላ ጋክስ። ኑኒ ኑ ናጋራፐ ስምቦኮ፤ ነ ቱማ ስእቦኮ፤ ነና፥ ጎዳ፥ ኑ ፆሳ ማሮታ ኦይችቦኮ።

¹⁴ ጎዳይ ሀ ዩዋ ኑ ቦላ ኤሀናዉ ጉየ ግቤና። ጎዳይ፥ ኑ ፆሳይ ባ ኦያባ ኡባን ፅሎ፥ ሽን ኑ እያዉ ኪተቶና እፅዳ።

¹⁵ “አቤት ጎዳዉ፥ ኑ ፆሳዉ፥ ካሰ ነ አሳ፥ ነ ምኖ ኩሽያን ግብፀፈ ከሳዳ፥ ሀች ጋካናዉ ነ ሱን ፄግሳዳሳ፤ ኑኒ ናጋራ ኦዳ፤ ባልዳ።

¹⁶ አቤት ጎዳዉ፥ ኔኒ ካሰ ነ ፅሎ ኦሶ ኡባ ኦዳይሳዳ፥ ሀእ ነ ሀንቁዋነ ነ ጋዱዋ ነ ካታማፐ፥ የሩሳላመፐ፥ ነ ጌሻ ዙማፐ ደን። ኑኒ ኦዳ ናጋራይነ ኑ አዋት ኦዳ ባላይ የሩሳላመነ ነ አሳ ኑ ዩሹዋን ደእያ ኡባ ስንን ካዉሽስ።

¹⁷ “ህዛ ኑ ፆሳዉ፥ ታኒ ነ አይለይ ዎስያ ዎሳነ ማጋኑዋ ስአ። ጎዳዉ፥ ነ ሱን ግሾ ጋዳ፥ ሀ ላለትዳ ነ ኬ፥ ነ ኬሀ አይፍያን ፄላ።

¹⁸ አቤት ታ ፆሳዉ፥ ነ ሀይ ኑኮ ዛራ፤ ነ አይፍያ ዶያዳ፥ ነ ሱንይ ፄገትዳ ካታማ ዩዋ በአ። ኑኒ፥ ነና ዎሰይ፥ ኑ ፅሎተ ግሾ ግዶናሽን፥ ነ ግታ ማሮተ ግሾሳ።

¹⁹ አቤት ጎዳዉ፥ ስአ! አቤት ጎዳዉ፥ አቶ ጋዳ! አቤት ጎዳዉ፥ ነ ኦሱዋ ቆንጭሳ! ነ ካታማይነ ነ አሳይ ነ ሱንን ፄገትዳ ግሾ፥ አቤት ታ ፆሳዉ፥ ነ ሱን ግሾ ጋምኦፋ።”

ጋብሬለይ ስንፈ ሀናናባ ኦድስ

²⁰ ታኒ ዎሳሸ፥ ታ ናጋራነ ታ አሳ እስራኤለ ናጋራ ፓፃሸነ ታ ፆሳ ጌሻ ዙማባ፥ የሩሳላመባ ጎዳ፥ ታ ፆሳስ ኦዳሸ ጋምአስ።

²¹ ታኒ ዎሳ ቦላ ደእሽን፥ ካሰ ቆንጨን ታ በእዳ ጋብሬለይ፥ ታኮ ኤሶን ፕራሸ፥ ኦማርሳ ያርሾ ያርሽያ ዎደ ፑቱ ግስ።

²² እ ሀይሳዳ ያግድ፥ ታዉ ኦድስ፦ “ዳነላ፥ ታ ነዉ ኤራነ አኬካ እማናዉ ሀእ ያስ።

²³ ኔኒ ቡሮ ዎሳ ዶምዳ ዎደ ነ ዎሳ ዛሮይ እመትስ፤ ታ ሄሳ ነዉ ኦዳናዉ ያስ። ፆሳይ ነና ዳሮ ዶሴስ። ሄሳ ግሾ፥ ታ ኦደይሳ ቆፓ፤ ቆንጨ አኬካ።

²⁴ “ፆሳይ ነ አሳስነ ነ ጌሻ ካታማስ ቃችዳ ዎደይ፥ ላፑን ቶሆ ላፑን ታሙ ላይ። ሄ ዎደ ናቆይ ዉራና፤ ናጋራ ኦሶይ አታና፤ ቆሆይ አቶ ጌተታና፤ መርና ፅሎተ ካዎታና፤ ቆንጨነ ትንብተይ ፖለታና ኡባፈ ጌሻ በሳይ ትየታና።

²⁵ “ሀይሳ ኤራ፤ አኬካ። የሩሳላመ ኦራናዉነ ኬፃናዉ ኪት ከይዳ ጋላሳፐ ብድ ትየትዳ ሀላቃይ ያና ጋካናዉ፥ ላፑን ቶሆ ላፑናነ ኡሱፑን ታማነ ናምኡ ቶሆ ላፑን ላይ አና። ሄ ዎደ የሩሳላመ ካታማይ ኦራፃና፤ ኦገትነ ዩሾ ግምበት ኦሰታና፤ ሽን ግምበትያ ዎደይ፥ መቶ ዎደ ግዳና።

²⁶ ኡሱፑን ታማነ ናምኡ ቶሆ ላፑን ላይፈ ጉየ ትየትዳይስ ሀይቃና፤ እያዉ አይኮይካ አትቤና። ያና ሀላቃ ኦላንቾት ካታማነ ፆሳ ኬ ላላና። ሄ ካታማ ዉርሰይ ድኦዳ አኬኮና ያና። ሄ ዎደፐ ብድ ዉርሰ ጋካናዉ ኦልነ ዮይ አዋጀትስ።

²⁷ ላፑን ላይ ግዶን፥ ሄ ሀላቃይ አሳራ ምኖ ጫቆ ጫቀታና። ሄ ላፑን ላይታ ባጋ ዛዋን ያርሾነ እሞታ ድጋና። አዋጀትዳ ፕርዳይ፥ እያ ቦላ ትገታና ጋካናዉ፥ እ ዮ ኤህያ ቱናተ ፆሳ ኬን ኤሳና” ያግስ።