Daanela 8 - ጌሻ ማፃፋ

ዳነል በእዳ ዶርሰነ ዴሸ

¹ ብልፃሶር ካዎትዳ ሄን ላይን፥ ታኒ፥ ዳነል፥ ካሰ በእዳ ቆንጨፈ ሀራ ቆንጨ በአስ።

² ሄ ቆንጨን፥ ኤላማ ቢታን፥ ሱሳ ካታማን፥ ኡባላ ሻፋ ማታን ኤቃዳ ታና ደማስ።

³ ሄ ሻፋ ማታን ናምኡ አዱሳ ካጨት ደእያ ዶርስ ኤቅስ። ናምኡ ካጨታፐ እሶይ ጉየፐ ዶልስ፤ ሽን ኮይሮ ዶልዳይሳፈ አዱሰ።

⁴ ሄ ዶርሳይ ባ ካጭያን ቃይጫናዉ፥ ዉሎሀ፥ ፑደሀነ ዱገሀ ባጋ ኮልሽን በአስ። እያራ ኤቀታናዉነ እያ ዎልቃፈ ከስ ኤካናዉ አይ መሄይካ ዳንዳእቤና። እ፥ ባ ኮይዳባ ኦስ፤ ያትድ ግታ ግድስ።

⁵ ታኒ ሀ ቆንጨባ ቆፕሽን፥ እስ ዴሽ ዉሎሀ ባጋፈ ከይድ፥ ቢታ ካንድ፥ ቶሆይ ሳአ የና ይስ። እያ ናምኡ አይፈታፐ ግዶን እስ ግታ ካጨይ ደኤስ።

⁶ እ፥ ዳሮ ይሎራ፥ ሻፋ ማታን ታኒ በእዳ ናምኡ ካጨራ ደእያ ዶርሳኮ ይስ።

⁷ እ፥ ዳሮ ይሎትድ፥ ታ በእሽን፥ ዶርሳ ካጨት ናምአይ መቃና ጋካናዉ፥ ኢታ ዶምኤ ዶምእስ። ዶርሳይ እያራ ኤቀታናዉ ዎልቅ ይስ፤ ዴሻይ እያ ሳአን የግድ የድ ኤቅስ። ዴሻ ዎልቃፈ ሄ ዶርሳ አሽያባይ ባዋ።

⁸ ሄ ዴሻይ ዳሮ ዎልቃምስ፤ ሽን እያ ዎልቃይ ዳርሸ ብን፥ እያ ግታ ካጨይ መቅስ። እያ በሳን ኦይዱ ግታ ካጨት ቢታ ኦይዱ ባጋ ስሚድ ድጭዶሶና።

⁹ ሀ ኦይዱ ካጨታፐ እሱዋ ቦላ ሀራ ጉ ካጨይ ዶልድ፥ ዱገሀ፥ ዶሎሀነ እስራኤለ ቢታኮ ስሚድ ዎልቃራ ድጭስ።

¹⁰ እ፥ ብድ ሳሎን ደእያ ኦላንቾታ ጋካናዉ ድጭድ፥ ሳሎ ፆልንቶታፐ ጉታ ሳአን የግድ ኤንታ የስ።

¹¹ ሳሎ ቶራ ሞጮና ግድዳ ፆሳራ ባና ልክሳና ጋካናዉ ቁ ቁ ግስ። እያዉ ጋላስ ጋላስ ያርሸትያ ያርሹዋ ድግስ፤ እያ ኬካ ቱንስስ።

¹² ናጋራ ጋሶን ኦላንቾትነ ጋላስ ጋላስ ያርሸትያ ያርሾይ ሄ ካጭያስ እመትስ። ቱም ሳአን ሆለትስ፤ ሄ ካጨይ ኦያባ ኡባይ እያዉ እንጀትስ።

¹³ ሄሳፈ ጉየ፥ እስ ጌሻ ኪታንቾይ፥ ሀራ ጌሻ ኪታንቹዋራ ኦደትሽን ታኒ ስአስ። እሶይ እሱዋ፥ “ጋላስ ጋላስ ያርሸትያ ያርሹዋባ፥ ዮ ኤህያ ማካላተባ፥ ሳሎ ኦላንቾትነ ፆሳ ኬይ የትሸ ዳናባ ኦድያ፥ ቆንጨይ አዉደ ፖለታኔ?” ያግድ ኦይችስ።

¹⁴ እ ዛሪድ፥ “ናምኡ ሙኩሉነ ሄ ፄቱ ዎንታነ ኦማርስ ጋካናዉ ጋምአና፤ ሄሳፈ ጉየ፥ ፆሳ ኬይ ጌያና” ያግድ ኦድሽን ስአስ።

ቆንጨ ብርሸ

¹⁵ ታኒ፥ ዳነል፥ ሀ ቆንጨ በአሸነ እያ ብርሸ ኤራናዉ ቆፓሸ ደእሽን፥ እስ አሰ ዳንያባይ ታ ስንን ኤቅዳይሳ በአስ።

¹⁶ ኡባላ ሻፋፐ፥ “ጋብሬላ፥ ሀ አድያስ ሀ ቆንጨ ብርሸ ኦዳ” ግያ ግርስ ስአስ።

¹⁷ እ፥ ይድ ታ ማታን ኤቅዳ ዎደ፥ ታኒ ዳጋማዳ፥ ሳአን ኩንዳስ። እ ታኮ፥ “አሳ ናአዉ፥ ሀ ቆንጨይ ዉርሰ ዎድያባ ኦደይሳ አኬካ” ያግስ።

¹⁸ እ ታራ ኦደትያ ዎደ፥ ታኒ ሳአን ታ ሶምኡዋራ ጉፋናዳ፥ ታና ባላ አጋስ። እ ታና ሳኣፐ ደንድ፥ ታ ቶሁዋን ኤስስ።

¹⁹ እ ታኮ፥ “ሀ ቆንጨይ ዉርሰ ዎድያባ በሲያ ግሾ፥ ጎዳ ሀንቆ ጋላሳን ሀናናዉ ደእያባ ታ ነዉ ኦዳና።

²⁰ ኔኒ በእዳ ናምኡ ካጨራ ደእያ ዶርሳይ፥ ሜዶናነ ፋርሰ ካዎታ ሌምሶ።

²¹ ዴሻይ ግርከ ካዋ ሌምሶ፤ እያ ናምኡ አይፍያፐ ግዶን ደእያ ግታ ካጨይ ግርከ ካዋ።

²² ካጨ መቅን እያ በሳን ዶልዳ ኦይዱ ካጨት እያ ካዎተፈ ሻከትድ ከያና ኦይዱ ካዎተታ ሌምሶ። ሽን ኤንታ ዎልቃይ ኮይሮ ካዋ ዎልቃ ጋከና።

²³ “ኤንታ ካዎተ ዉርሰን፥ ኤንታ ናጋራይ ዛዋ ጋክያ ዎደ፥ ኢታነ ጭምያ ካዎይ ደንዳና።

²⁴ እ ዳሮ ምኖ ግዳና፤ ሽን ባ ዎልቃን ግደና። እ ዳጋንያ ዮ ይሳና፤ እ ኦያባ ኡባይ እያዉ እንጀታና። እ ምኖ አሳታነ ጌሻ አሳታ ይሳና።

²⁵ እ ጭምያ ግሾ እያዉ እንጀታና፤ እ ባና ኡባፈ ቁ ቁ ኦና። ኤንቲ ሳእ ሳሮ ግድ ደእሽን፥ ኤንታፈ ዳሮታ ዎና። እ ሀላቃታ ሀላቃራ ኤቀታና፥ ሽን እ፥ አስ ቦቾና ባዉ ያና።

²⁶ “ነዉ ኦደትዳ ናምኡ ሙኩሉነ ሄ ፄቱ ዎንታነ ኦማርሳ ቆንጨይ ቱማ። ሽን ሀ ቆንጨይ ዳሮ ዎደፐ ጉየ ፖለታናዉ ደእያ ግሾ፥ ማታመ እያ ቦላ ዎዳ ጎርዳዳ ናጋ” ያግስ።

²⁷ ታኒ ዳነል፥ ዳሮ ዳቡርዳ ግሾ፥ ሳከታዳ ዳሮ ጋላስ ዝንአስ። ሄሳፈ ጉየ ደንዳዳ፥ ካዋ ኦሶስ ባስ። ሀ ቆንጨን ታኒ ዳሮ ዳጋማስ፤ አኬካናዉ ዳንዳአብከ።