Daanela 6 - ጌሻ ማፃፋ

ዳነል ጋሞ ኦላን

¹ ካዎይ ዳርዮስ ባ ካዎተ ኡባ ግዶን ባፐ ጋርሳራ ቢታ ሃርያ ፄታነ ላታሙ አሳታ ሹማናዉ ቆፕስ።

² ካዋስ አይብካ ፓጮና መላ ሹማታ አዋተን ፄላና መላ ሄ አሳታ ሀላቃ ኦድ ዶርስ፤ ዶረትዳይሳታፐ እሶይ ዳነላ።

³ ዳነል ኦሶ ኦናዉ ባዉ ደእያ ዱማ ኤራን ሀራ ሀላቃታፐነ ሹማታፐ አድ በንትስ። ሄሳ ግሾ፥ ካዎይ እያ ባ ኩመ ካዎተ ቦላ ሹማናዉ ቆፕስ።

⁴ ቢታ ሹማትነ ሀላቃት ዳነላ ሞታናዉ፥ እ አይስያ አይሱዋ ቦላ ባላ ደማናዉ ኮይዶሶና። ሽን እ፥ ባና ናግያነ አማነትዳ አስ ግድያ ግሾ፥ እያ ሞታናዉ እያ ቦላ አይ ባላካ ደምቦኮና።

⁵ ዉርሰን ኤንቲ፥ “እያ ፆሳ ህግያ ባጋራ ግዶና እፅኮ፥ ሀራ ባጋራ ዳነላ ሞትያባ ደሞኮ” ያግዶሶና።

⁶ ሄሳፈ ጉየ፥ ቢታ ሹማትነ ሀላቃት እስፈ ካዋኮ ብድ፥ ሀይሳዳ ያግዶሶና፦ “ካዋዉ ዳርዮሳ፥ መርናዉ ካዎታ!

⁷ ኑኒ ነ ካዎተ ኦሶ ኦያ ሀላቃት፥ ሹማት፥ አይሰይሳት፥ ዞረይሳትነ ቢታ ሃረይሳት ኡባይ ዞረትዳ እስ ዞረይ ደኤስ። ሄስካ ሀስታሙ ጋላስ ጋካናዉ፥ አይ አስካ ካዋ ዎሳናፐ አትሽን፥ ሀራ አይ አስ ዎይኮ አይ ፆሰ ዎሶናዳ፥ ኔኒ አዋጆ ከሳና መላሳ። ሄ አዋጁዋ ኤኮናይ ጋሞ ኦላን የገታና መላ ኔኒ ኪታ።

⁸ ህዛ ካዋዉ፥ ሀ አዋጆይ ሻረቶና ሜዶናነ ፋርሰ ህገዳ ምኖነ ላመቶናይሳ ግዳና መላ ፓራማ” ያግዶሶና።

⁹ ሄሳ ግሾ፥ ካዎይ ዳርዮስ አዋጁዋ ፃፍድ ፓራምስ።

¹⁰ ዳነል አዋጆይ ፓራመትድ ከይዳይሳ ኤርዳ ዎደ ባ ሶ ብስ፤ ፖቀ ቦላ ደእያ ክፍልያ ገልስ። ሄ ክፍልያ ማስኮተይ የሩሳላመ ባጋ ስሚድ ዶየትድ ደእሽን፥ ካሰ ዎሰይሳዳ ጉልባትድ፥ ባ ፆሳ ጋላትሸ፥ እስ ጋላሳን ሄ ቶሆ ዎሴስ።

¹¹ ሄ አሳት እስፈ ብድ፥ ዳነል ባ ፆሳ ዎስሽንነ ባ ጎዳ ማዶ ኦይችሽን ደምዶሶና።

¹² ኤንቲ ካዋኮ ብድ፥ “ካዋዉ፥ ሀስታሙ ጋላሳታ ግዶን ነ አትሽን፥ ሀራ አይ አሰ ዎይኮ አይ ፆሰ ዎስያ ኦንካ ጋሞ ኦላን የገታና መላ አዋጆ ከሳብኪ?” ያግዶሶና። ካዎይ ዛሪድ፥ “ኤ አዋጃይ ከይስ፤ ሻረቶና ሜዶናነ ፋርሰ ህገዳ ምንዳይሳ” ያግስ።

¹³ ኤንቲ፥ “ካዋዉ፥ ሄኮ ይሁዳፐ ድኤትድ፥ ይዳ አሳፐ እሶይ፥ ዳነል፥ ነዉ ግድን ነ ፓራማዳ ከስዳ ነ አዋጁዋካ ኪተተና። እ ሀእ ጋካናዉ ጋላሳን ሄ ቶሆ ባ ፆሳ ዎሴስ” ያግዶሶና።

¹⁴ ካዎይ ሄሳ ስእዳ ዎደ ዳሮ አዛንስ፤ ዳነላ አሻናዉ ቆፕድ፥ አው ዉላና ጋካናዉ እያ አሻና ኦገ ኡባ ኮይስ።

¹⁵ ሄ ዎደ አሳት እስፈ ካዋኮ ብድ፥ “ካዋዉ፥ ሜዶናነ ፋርሰ ህግያዳ፥ ካዎይ አዋጅዳ አዋጆይ ዎይኮ ኪታይ ላመቶናይሳ ኤራ” ያግዶሶና።

¹⁶ ካዋ ኪታን፥ ዳነላ ኤህድ፥ ጋሞ ኦላን የግዶሶና። ካዎይ ዳነላኮ፥ “ነ ኡባ ዎደ ጎይንያ ፆሳይ ነና አሾ” ያግስ።

¹⁷ ኤንቲ ሹቹ ኤህድ፥ ኦላ ዶና ጎርድዶሶና። ኦንካ ዳነላ ቦላ ኦሰትዳባይ ላመቶና መላ፥ ካዎይ ባ ማታመነ ባ ሞርናታ ማታመ ሹቻ ቦላ ዎስ።

¹⁸ ካዎይ ባ ጋ ስሚድ፥ ካ ሞናነ ኡፋይስያባ ባኮ ሺሾና፥ ስኮ ይድ አቅስ።

¹⁹ ካዎይ ዎንታ ጉራ ደንድድ፥ ኤለስድ ጋሞ ኦላኮ ብስ።

²⁰ እ አዛንሸ ያ ጋክድ፥ “ደኦ ፆሳ አይልያዉ፥ ዳነላ፥ ኔኒ ኡባ ዎደ ጎይንያ ነ ፆሳይ፥ ነና ጋሞታፐ አሻናዉ ዳንዳእዴ?” ያግድ ፄግስ።

²¹ ዳነል ዛሪድ፥ “ካዋዉ፥ መርናዉ ካዎታ!

²² ታ ፆሳይ ባ ኪታንቹዋ ኪትድ፥ ጋሞታ ዶና ጎርድስ፤ ኤንቲ ታና ቦችቦኮና። ታኒ እያ ስንን ፅሎ፤ ቃስ ካዋዉ፥ ነ ስንንካ ባላ ኦብከ” ያግስ።

²³ ካዎይ ዳሮ ኡፋይትድ፥ ዳነላ ኦላፈ ከሳና መላ ኪትስ። ዳነል ኦላፈ ከይስ፤ እ ባ ፆሳን አማነትዳ ግሾ፥ እያ አሳተ ቦላ ቆሆይ በንትቤና።

²⁴ ካዎይ ዳነላ ሞትዳ አሳታ ኤሀና መላ ኪትስ። ኤንቲ ኦይከትድ፥ ባንታ ማቸታራነ ባንታ ናይታራ ይድ፥ ኡባይ ጋሞ ኦላን የገትዶሶና። ኤንቲ ኦላ ዉርሰ ጋኮና ደእሽን፥ ጋሞት ጉፕ ኤክድ፥ ኤንታ መቀ መንረ አግዶሶና።

²⁵ ካዎይ ዳርዮስ አሳስ፥ ካዎተታስነ ዱማ ዱማ ዶናን ኦደትያ ኮቻታስ ሀይሳዳ ያግድ ፃፍስ፦ “ሳሮይ ህንተዉ ግዶ!

²⁶ “ታ ካዎተን ደእያ አሳ ኡባይ ዳነላ ፆሳ ያያና መላነ ኮኮራና መላ ታኒ አዋጆ ከሳስ። “እ መርናዉ ደእያ ደኦ ፆሳ፤ እያ ካዎተይ ፖሎ የና፤ እያ ካዎተስ ዛው ባዋ።

²⁷ እ፥ አሼስ፤ መቶፐ ከስድ ኤኬስ፤ ሳሎንነ ሳአን ማላታነ ማላታታ ኦስ፤ እ፥ ዳነላ ጋሞታ ዶናፐ አሽስ” ያግስ።

²⁸ ዳነል ዳርዮሳ ካዎተ ዎደነ ፋርሰ ካዋ ቅሮሳ ካዎተ ዎደ ኡባን እንጀትን ደእስ።