Daanela 10 - ጌሻ ማፃፋ

ዳነል አሙሆን በእዳ አድያ

¹ ፋርሰ ካዎይ ቅሮስ ካዎትዳ ሄን ላይን፥ ብልፃሶራ ጌተትያ ዳነል ሀራ ቆንጨ በእስ። ሄ ቆንጨይ ቱማ፤ ቆንጭዳባይ ዎልቃማ ኦላባ። ሄ ቆንጨ ኤራና መላ አኬክ እያዉ እመትስ።

² ሄ ዎደ ታኒ፥ ዳነል፥ ሄ ሳምንታ ዬካስ።

³ ሄ ሳምንታይ ዉራና ጋካናዉ ካ ማብከ፤ አሾይ ዎይኮ ዎይነ ኡሽ ታ ዶናኮ ሺቅበና፤ ታ ሁጵያ ትየታብከ

⁴ ኮይሮ አጌናን ላታማነ ኦይዳን ጋላሳን፥ ግታ ፀግሮሳ ሻፋ ማታን ኤቃስ።

⁵ ታኒ ፄልያ ዎደ ሊኖ ማኦ ማእዳ እስ አድያ በአስ። እ ባ ፄሳን አፌዛ ዎርቃፈ ኦሰትዳ ዳንጮ ዳንጭስ።

⁶ እያ አሳተይ ጶልያ አልኦ ሹቹ ዳኔስ፤ እያ ሶምኦይ ዎልአን መላ ዎልአሜስ፤ እያ አይፈይ ታማ ላጮ ዳኔስ፤ እያ ኩሸይነ እያ ቶሆይ ቁሸትዳ ናሰ ብራታዳ ፖኤስ፤ እያ ቃላይ ዳሮ አሳ ግርሳዳ ኮሽሜስ።

⁷ ሀ ቆንጨ ታኒ፥ ዳነል ታርካ በአስ። ታራ ደእያ አሳይ በእቦኮና፤ ኤንቲ ዳሮ ዳጋምዳ ግሾ ባቃትድ ቆሰትዶሶና።

⁸ ታኒ ሀ ግታ ቆንጨ በአሸ፥ ታርካ አታስ። ታዉ ዎልቅ እፅን ዳቡራስ፤ ታ ሶምኦይ ቡላትስ።

⁹ ታኒ እያ ኮሽንቻ ስእዳ ዎደ ሳአን ታ ሶምኡዋራ ጉፋናዳ፥ ታና ባላ አጋስ።

¹⁰ ሄሳፈ ጉየ፥ እስ ኩሸይ ታና ቦችስ፤ ታኒ ኮኮራሽን፥ ታ ኩሽያንነ ታ ጉልባታን ታና ደንድ ኤስስ።

¹¹ እ ታኮ፥ “ዳሮ ዶሰትዳ ዳነላ፥ ታኒ ነዉ ኦድያ ቃላ ሎይዳ አኬካ፤ ደንዳ ኤቃ። ታኒ ኪተታዳ ኔኮ ያስ” ያግስ። እ ታኮ ሀይሳዳ ግን፥ ታኒ ኮኮራሸ ደንዳ ኤቃስ።

¹² ቃስካ፥ “ዳነላ፥ ያዮፋ! ኔኒ አኬካ ደማናዉ ቆፓዳ፥ ነ ፆሳ ስንን ነናተ ካዉሽዳ ኮይሮ ጋላሳፐ ዶምድ፥ ነ ዎሳይ ስኤትስ፤ ታ ነዉ ዛሮ ኤካዳ ያስ።

¹³ ሽን ፋርሰ ካዎተ ሀላቃ ግድዳ አያናይ ላታማነ እስ ጋላስ ታና ተቅስ። ታኒ፥ ታርካ ፋርሰ ካዎተ ሀላቃራ ያን አትዳ ግሾ፥ ኪታንቾታ ሀላቃታፐ እሶይ፥ ምካኤል፥ ታና ማዳናዉ ይስ።

¹⁴ ሀ ቆንጨይ ስንፈ ሀናናባ በሲያ ግሾ፥ ታኒ ኔኮ ይዳይ፥ ዉርሰ ጋላሳን ነ አሳ ቦላ ሀናናዉ ደእያባ ነዉ ቆንጭሳናሳ” ያግስ።

¹⁵ እ ሄሳ ታዉ ኦድያ ዎደ፥ ታኒ ሳአን ጉፋናዳ፥ ጋናባ ያስ።

¹⁶ ሄሳፈ ጉየ፥ አሰ ዳንያ እሶይ ታ መተርሻ ቦችስ፤ ታ ዶናይ ዶየትን፥ ኦደተ ዶማስ። ታ ስንን ኤቅዳይሳኮ፥ “ታ ጎዳዉ፥ ሀ ቆንጨይ ታና ዳሮ ዳጋንዳ ግሾ ዳሮ ዳቡራስ።

¹⁷ ታኒ ነ አይለይ፥ ኔራ፥ ታ ጎዳራ ዋናዳ ኦደታናዉ ዳንዳአይና? ታ ዎልቃይ ዉርስ፤ ሸምፓናዉካ ታዉ እፀትስ” ያጋስ።

¹⁸ ሄ አሰ ዳንያ እሶይ ናምአን ታና ቦችድ፥ ታዉ ዎልቃ እሚስ።

¹⁹ እ ታኮ፥ “ዳሮ ዶሰትዳ አድያዉ ያዮፋ! ሳሮይ ነዉ ግዶ። ምና፤ ፃላ” ያግስ። እ ሄሳ ግድ ታና ምንን፥ ታኒ ምናዳ፥ “ታ ጎዳዉ፥ ኔኒ ታና ምንዳ ግሾ ታዉ ኦዳ” ያጋስ።

²⁰ እ ዛሪድ፥ “ታኒ ኔኮ አይስ ይዳኮ ነ ኤራይ? ሀእ ታ ስማዳ ፋርሰ ሀላቃ ግድዳ አያናራ ኦለታናዉ ባና፤ ታኒ ቢኮ ግርከ ሀላቃ ግድዳ አያናይ ያና።

²¹ ሽን ቱማ ማፃፋን ፃፈትዳባ ታኒ ነዉ ኦዳና። ታኒ ኤንታራ ኦለትያ ዎደ፥ ህንተ ሀላቃ ምካኤላፐ አትሽን፥ ታና ማድያ ሀር ባዋ።”