Astiro 1 - ጌሻ ማፃፋ

ካዋ ግብራ

¹ ካዎይ አርፀክስስ ህንደ ቢታፈ ቶጰ ቢታ ጋካናዉ ደእያ፥ ፄታነ ላታማነ ላፑን ቢታ አይስያ ዎደ ሀንዳባ።

² ካዎይ ባ አራታን ኡትድ አይስያ ዋና ካታማይ ሱሳ ጌተቴስ።

³ እ ካዎትዳ ሄን ላይን፥ ባፐ ጋርሳራ ዳይናታስነ ቢታ አይሰይሳታስ ግታ ግብራ ጊግስስ። ሄ ግብራ በሳን ሜዶናነ ፋርሰ ቶራ ሞጮናት፥ ቢታ ሃረይሳትነ አይሰይሳት በንትዶሶና።

⁴ ካዎይ እስ ፄታነ ሆስፑን ታሙ ጋላስ ኩመ ባ ካዎተ ዱረተነ ባ ያሽያ ቦንቹዋ ኡባ ኤንታ በስስ።

⁵ ሄ ጋላሳታፐ ጉየ፥ ካዎይ ቃስ ሀራ ላፑን ጋላስ ጋምእያ ግብራ፥ ሱሳ ካታማን፥ ዱረፐ ማንቆ ጋካናዉ ደእያ አሳ ኡባስ ጊግስስ። ሄ ግብራይ ካዎ ጋይ ደእያ አታክልተ በሳን ጊግስ።

⁶ ሄ በሳን ደእያ ዳባባይ፥ ሊኖፐ ኦሰትዳ ቦነ ካሎሰ ገሸታን አሌቅስ። ገሸት ኦቻ ቴራ ዳንያ አልኦ ሊኖ ክረን አን፥ እብነባራደ ጌተትያ ሹቻፈ ኦሰትዳ ቱቅያ ቦላ ደእያ ብራ ምግዶታን ካቀትድ ኡትዶሶና። ቃስ ዎርቃፈነ ብራፐ ኦሰትዳ አርሳት፥ ዱማ ዱማ ማል ደእያ አልኦ ሹቻታፐ ኦሰትዳ ባሱዋን ማራን የገትዶሶና።

⁷ እሶይ እሱዋፈ ዱማ ግድዳ ዎርቃ ቡርጩኮን ዎይነ ኡሽ አሳ ኡባስ እመትስ። ካዎይ ዳሮ ኬሀ ግድዳ ግሾ፥ ዎይነ ኡሻስ ዛው ባዋ።

⁸ እስ እስ አስ ባ ኮይዳ መላ ኡዬስ፤ ሄሳ ካዎይ ኮይሮትድ ባ አይለታስ ኦድስ።

⁹ ሄ ዎደ ካውያ አስፂና ማጫሳ ኡባስ ግብራ ካዎ ጋን ጊግሳሱ።

¹⁰ ግብራይ ዶመትዳ ላፑን ጋላስ፥ ካዎይ አርፀክስስ ዎይነ ኡሻ አልድ ኡፋይትዳ ዎደ፥ ባ አይለታ መሁማና፥ ብዝታ፥ ሀርቦና፥ ብግታ፥ አባግታ፥ ዛታራነ ካርካሳ ጌተትያ ላፑን ሹፋታ ፄግድ፥

¹¹ “ካውዉ አስፂኖ ካዎተ ካላቻ ዎድ ሃ ኤክድ ዪተ” ያግድ ኪትስ። እያ ዳሮ ማላ ሎኦ ግድያ ግሾ፥ ሀላቃትነ አሳ ኡባይ እዮ በአና መላ ካዎይ ኮይስ።

¹² ሽን ካዋ ኪታ እዉ ኦድን፥ ካውያ አስፂና ካዋ ስን ዮና እፃሱ። ሄስ ካዋ ዳሮ ሀንቀስ።

¹³ ሄ ቢታ ህግያነ ደኦ ዎጋ ኤርያ አሳ ዞረ ኦይሾይ ካዋ ማታን ሜዘትዳባ ግድያ ግሾ፥ ዎድያባ ሻክድ ኤርያ ጭንጫ አሳታራ ኦደትስ።

¹⁴ ካዎይ ግታ ማት ደእያ ላፑን ፋርሰነ ሜዶና ሹማታ፥ አርቀስዮሳ፥ ሸታራ፥ አድማታ፥ ታርሸሻ፥ ማሬሳ፥ ማርሳናነ መሙካና ፄግስስ።

¹⁵ ካዎይ ኤንታ፥ “ታኒ፥ ካዎይ አርፀክስስ፥ ታ ሹፋታ ኪትን፥ ካውያ አስፂና ታ ኪታ ፖሎና እፃሱ። ሄሳ ግሾ፥ ህገይ ኦድያ ማራን እዮ ዋታናዉ በሲ?” ያግድ ኦይችስ።

¹⁶ ኤንታፈ እሶይ፥ መሙካን ካዋ ስንንነ ሀላቃታ ስንን ሀይሳዳ ያግስ፤ “ካውያ አስፂና ካዋ ፃላላ ግዶናሽን፥ እያ ሀላቃታ ኡባነ እያ ካዎተ ግዶን ደእያ አሳ ኡባ ናቃሱ።

¹⁷ ሀ ካዎተ ግዶን ደእያ ማጫስ ኡባይ ካውያ አስፂና ኦዳይሳ ስእድ፥ ባንታ አዝናታ ካ ዶማና። ኤንቲ፥ ‘ካዎይ አርፀክስስ ባኮ ያና መላ ፄግስን፥ ካውያ አስፂና እፃበከዬ?’ ያጋና።

¹⁸ ሄሳ ፃላላ ግዶናሽን፥ ፋርሰነ ሜዶና ሀላቃታ ማጫሳይ ሄሳ ስእዳ ዎደ፥ ሀች አው ዉላና ጋካናዉ ባንታ አዝናታ ሄሳዳ ግድ ካና። ሄሳ ጋሶን ማቸታ ግዶንነ አዝናታ ግዶን ኦሽ ከያና።

¹⁹ ሄሳ ግሾ ካዋዉ፥ ኔኒ ዶስኮ፥ ካውያ አስፂና ናምአን ነ ስን አና መላ ተቅያ አዋጆ ከሳ። ሄ አዋጆይ ናምአን ላመቶና መላ ፋርሰነ ሜዶና ህግያ ግዶን ፃፈቶ። ሄሳፈ ጉየ፥ ካዎተ ቦንቹዋ ኢፐ ኤካዳ ሀራ ሎኦ ማጫሳስ እማ።

²⁰ ሀ ኔኒ አዳ አዋጆይ ሀ ግታ ካዎተ ኡባን ኦደትያ ዎደ እስ እስ ማጫስ ዱረ ግድን ማንቆ ግድን፥ ሻኮና ባ አዝና ቦንቻና” ያግስ።

²¹ ካዎይነ እያ ሀላቃት ሀ ዞርያን ኡፋይትዶሶና። ሄሳ ግሾ፥ መሙካን ግዳይሳዳ ካዎይ ኦስ።

²² እ ባ ካዎተ ግዶን ደእያ ዱማ ዱማ ቢታታስ ኤንታ ፕዳለንነ ኤንታ ዶናን ፃፍድ፥ ዳብዳበ የድስ። ሄ አዋጆይ፥ እስ እስ አዝን ባ ኬ ኬ አይስያ ሀላቃ ግደይሳ ኦዴስ።