Amoxe 1 - ጌሻ ማፃፋ

¹ ኦዝያን ይሁዳ ቢታን፥ እዮኣሳ ናአይ እዮርባም እስራኤለ ቢታን ካዎትዳ ላይን ታቆሀ ቢታን መሄ ሄመይሳታፐ እሶይ፥ አሞፀይ፥ ቢት ቃፃናፐ ናምኡ ላይፈ ስን እስራኤለባ ኦድዳ ትንብተይ ሀይሳ፦

² እ፥ “ጎዳይ ፅዮነ ዙማ ቦላ ጉዴስ፤ የሩሳላመ ካታማን ደቼስ። መሄ ሄምያ በሳት መሎሶና፤ ቃርመሎሳ ዙማ ቦላ ደእያ እርፃይ ሹሌስ” ያግስ።

እስራኤለ ሾሮ ካዎተት ፕርደታና ሶረ

³ ጎዳይ፥ “ዳማስቆ አሳይ ዛር ዛር ኦዳ ናጋራ ግሾ፥ ታኒ ኤንታ ሴሮና አግከ። ኤንቲ ጋላዳ ቢታ አሳ ብራታ አች ደእያ ጋረን ጎንዶርስድ የዶሶና።

⁴ ሄሳ ግሾ፥ ታኒ ካዋ ሀዛኤላ ኬን ታማ የዳና፤ ሄ ታማይ ካዋ በን-ሀዳዳ ሚፃታ ማና።

⁵ ታኒ ዳማስቆ ካታማ ፐንግያ መንና፤ አዌና ዛንጋራን ደእያ አሳ የደናነ ካዎታ ፃምኣ ኦይክዳይሳታ ቤት-ኤደናፐ ይሳና፤ ሶረ አሳይ ደኤትድ፥ ቂራ ባና” ያጌስ።

ፍልስፄመ

⁶ ጎዳይ፥ “ጋዛ ካታማ አሳይ ዛር ዛር ኦዳ ናጋራ ግሾ፥ ታ ኤንታ ሴሮና አግከ። ኤንቲ ቢታን ደእያ አሳ ኡባ ድእድ፥ ኤዶመ ቢታ አሳስ ባይዝዶሶና።

⁷ ሄሳ ግሾ፥ ታኒ ጋዛ ካታማ ድርሳን ታማ የዳና፤ ሄ ታማይ ካታማ ሚፃታ ማና።

⁸ አሽዶዳን ደእያ አሳ ታኒ የደናነ ካዎታ ፃምኣ ኦይክዳይሳታ አስቃሎናፐ ይሳና። ኤቅሮና ካታማን ደእያ አሳ ሴራና፤ ፍልስፄመ አሳፐ አትዳይሳት ሀይቃና። ታኒ ኡባ ሃርያ ጎዳይ ሄሳ ኦዳይስ” ያጌስ።

ፅሮሳ

⁹ ጎዳይ፥ “ፅሮሳ ካታማ አሳይ ዛር ዛር ኦዳ ናጋራ ግሾ፥ ታኒ ኤንታ ሴሮና አግከ። ኤንቲ ጫቅዳ እሻተ ጫቁዋ መንድ፥ ደኤትዳ አሳ ኡባ ኤዶመ አሳስ ባይዝዶሶና።

¹⁰ ሄሳ ግሾ፥ ታኒ ፅሮሳ ካታማ ድርሳን ታማ የዳና፤ ሄ ታማይ ካታማ ሚፃታ ማና” ያጌስ።

ኤዶመ

¹¹ ጎዳይ፥ “ኤዶመ አሳይ ዛር ዛር ኦዳ ናጋራ ግሾ፥ ታኒ ኤንታ ሴሮና አግከ። ኤንቲ ባንታ እሻ እስራኤለ ማሻን የደዶሶና፤ ኤንቲ ኤንታዉ ቃትቦኮና፤ ኤንታ ይሎይ መርናዉ እርፀና።

¹² ሄሳ ግሾ፥ ታኒ ተማና ካታማ ቦላ ታማ የድን፥ ሄ ታማይ ቦሶራ ካታማ ሚፃታ ማና” ያጌስ።

አሞነ

¹³ ጎዳይ፥ “አሞነ አሳይ ዛር ዛር ኦዳ ናጋራ ግሾ፥ ታኒ ኤንታ ሴሮና አግከ። ኤንቲ ባንታ ዛዋ አሳናዉ ጋላዳ ቢታን ደእያ ቃንትዳ ማጫሳታ ኡሉዋ ዳክዶሶና።

¹⁴ ሄሳ ግሾ፥ ታኒ ራባ ካታማ ድርሳን ታማ የዳና፤ ሄ ታማይ ካታማ ሚፃታ ማና። ሄሳፈ ጉየ፥ ኦላ ጋላስ ዋሶይ ዳራና፤ ኦላንቾት ጎተዳ ዎልቃማና።

¹⁵ ኤንታ ካዎይነ እያራ ኦያ ሀላቃት ኡባይ ደኤትድ ባና” ያጌስ።