ሃዋሬታ ኦሱዋ 9 - ጌሻ ማፃፋ

ሳኦል ክርስቶሳ አማንስ

¹ ሄ ዎደ ሳኦል ጎዳ ካለይሳታ ዎናዉ ማንድድ ካህነ ሀላቃኮ ብስ።

² ጎዳ ኦግያ ካልያ አደነ ማጫ ደምኮ፥ ቃችሸ የሩሳላመ ኤሀናዉ፥ ዳማስቆን ደእያ አይሁደ ዎሳ ኬታስ ዳብዳበ ባዉ ፃፋና መላ ዎስስ።

³ እ ብድ፥ ዳማስቆ ካታማ ጋካናዉ ማትሽን፥ ቆፖና ሳሎፐ ዎልቃማ ፖኦይ እያ ዩሾን ፖእስ።

⁴ እ ሳአን ኩንድዳሽን፥ “ሳኦላ፥ ሳኦላ፥ አይስ ታና ጎዳይ?” ግያ ቃላ ስእስ።

⁵ ሳኦል፥ “ጎዳዉ፥ ኔኒ ኦኔ?” ያግድ ኦይችስ። “ታኒ፥ ኔኒ ጎድያ የሱሳ” ያግስ።

⁶ ሽን ሳኦል ኮኮርሸነ ማላለትሸ፥ “ጎዳዉ፥ ታኒ አይ ኦና መላ ኮያይ?” ያግስ። ጎዳይ እያኮ፥ “ደንዳዳ ካታማ ገላ፤ ኔኒ ኦናዉ በሲያባይ ያን ነዉ ኦደታና” ያግስ።

⁷ ሳኦላራ ኦገ ብያ አሳት አይኮካ ኦደቶና ኤቅ አትዶሶና። ቃላ ስኦሶና፥ ሽን ኦናካ በእቦኮና።

⁸ ሳኦል ኩንድዳ በሳፈ ደንድድ ፄልያ ዎደ እያ አይፈይ ደሞና እፅስ። ሄሳ ግሾ፥ ኤንቲ እያ ኩሽያ ኦይክድ ካለድ ዳማስቆ ገልስዶሶና።

⁹ ሄ ጋላስ ጋካናዉ እ ፄላናዉ ዳንዳእቤና፤ አይኮካ ምቤና፤ ኡይቤና።

¹⁰ ዳማስቆን እስ ሀናንያ ጌተትያ የሱሳ ታማረይ ደኤስ። ጎዳይ ቆንጨን፥ “ሀናንያ” ያግድ ፄግስ። ሀናን ዛሪድ፥ “ታ ጎዳዉ፥ ሀይሳን ደአይስ” ያግስ።

¹¹ ጎዳይ እያኮ፥ “ደንዳዳ ሱረ ጌተትያ ኦግያ ባዳ፥ ይሁዳ ሶን ሳኦላ ጌተትያ ታርሰሳፐ ይዳ ኡራ ኮያ፤ ሳኦል ዎሴስ።

¹² ቃስ ሀናንያ ጌተትያ አደይ ገልድ፥ ሳኦል ናምአን ፄላና መላ ባ ኩሽያ እያ ቦላ ዎሽን ቆንጨን በእስ” ያግስ።

¹³ ሀናን ዛሪድ፥ “ጎዳዉ፥ የሩሳላመን ነ ጌሻ አሳ ቦላ ሄ ኡራይ አይ መላ ኢታባ ኦዳኮ ታኒ ዳሮ አሳፐ ስአስ።

¹⁴ ቃስ ዳማስቆን ነ ሱን ፄገይሳታ ኡባ ቃቻናዉ፥ ካህነ ሀላቃት እያዉ ማታ እምዶሶና” ያግስ።

¹⁵ ሽን ጎዳይ እያኮ፥ “ሳኦል አይሁደ ግዶና አሳ ስንን፥ ካዎታ ስንንነ እስራኤለ አሳ ስንን፥ ታ ሱን ኤርሳናዉነ ታዉ ኦናዉ ዶረትዳ ሚሸ ግድያ ግሾ ኔኒ እያኮ ባ።

¹⁶ አይስ ጊኮ፥ ታ ሱን ግሾ፥ እ አይ መላ ዋየ ኤካናዉ በሲያኮ ታኒ እያ በሳና” ያግስ።

¹⁷ ሀናን ብድ፥ ሶ ገልድ፥ ባ ኩሽያ ሳኦላ ቦላ ዎድ፥ “ታ እሻ ሳኦላ፥ ኔኒ ያ ኦግያን ነዉ በንትዳ የሱሲ፥ ኔኒ ፄላና መላነ ጌሻ አያናን ኩማና መላ ጎዳይ ታና ኪትስ” ያግስ።

¹⁸ ኤለስድ፥ ሳኦላ አይፈፐ እስ ፖቆ መላባይ ዎን፥ ሳኦል ናምአን ፄልስ። ቃስ ደንድድ ፃማቀትስ።

¹⁹ ካ ምድ ፃልድ፥ ዳማስቆን ደእያ አማነይሳታራ ጉ ጋላስ ጋምእስ።

²⁰ ኤለስድ ሳኦል፥ “የሱሲ ፆሳ ናአ” ያግድ ዳማስቆን ደእያ አይሁደ ዎሳ ኬታን ቃላ ታማርስስ።

²¹ ሄሳ ስእዳ ኡባይ ማላለትድ፥ “ሀይስ የሩሳላመን የሱሳ ሱን ፄገይሳታ ቃቸይሳ ግደነዬ? ቃስ ሃ ይዳይ ኤንታ ቃችድ፥ ካህነ ሀላቃታ ስን ኤፋናሳ ግደኔ?” ያግዶሶና።

²² ሽን ሳኦል ቃላ ኦዶን ምን ምንድ ብስ። የሱሲ፥ እ ክርስቶሳ ግደይሳ ቆንጭስድ ኦድዳ ግሾ ዳማስቆን ደእያ አይሁደት እያዉ ዛርያባ ይዶሶና።

²³ ዳሮ ጋላሳፐ ጉየ፥ አይሁደት ሺቅድ፥ ሳኦላ ዎናዉ ዞረትዶሶና።

²⁴ ሽን አይሁደት ባና ዎናዉ ቆፕዳይሳ ሳኦል ስእስ። ኤንቲ እያ ዎናዉ ቃማነ ጋላስ ካታማ ፐንገን ናጎሶና።

²⁵ ሽን እያ ታማረት እያ ቃማ ኤፍድ፥ ግምበ ድርሳ ማስኮተራ ዳቾራ ዎስዶሶና።

²⁶ ሳኦል የሩሳላመ ጋክዳ ዎደ አማነይሳታራ ጋሄታናዉ ኮይስ። ሽን እ ክርስቶሳ አማንዳይስ ኤንታዉ ቱማ ዳኖና እፅን እያዉ ያይዶሶና።

²⁷ ሽን ባርናባስ ሳኦላ ሀዋረታኮ ኤፍስ። ኦገን ጎዳይ ዋንድ ቆንጭዳኮነ ኦድስዳኮ፥ ቃስ ሳኦል ዳማስቆን የሱሳ ሱንን ያዮና ዋትድ ቃላ ኦድዳኮ ኤንታዉ ጌሽድ ኦድስ።

²⁸ ሳኦል የሩሳላመን ዩይድ ጎዳ ሱንን ያዮና ቃላ ኦድሸ፥ ሀዋረታራ እስፈ ደእስ።

²⁹ ቃስ ሳኦል ግርከ ዶናን ሃሳያ አይሁደታራ ኦደትሸ ፓላሜስ። ሽን ኤንቲ እያ ዎናዉ ኮይዶሶና።

³⁰ አማንያ አሳት ሄሳ ስእድ፥ ሳኦል ቅሳረ ኤፍድ ታርሰሳ የድዶሶና።

³¹ ይሁዳን፥ ጋልላንነ ሳማረ ኡባን ደእያ ዎሳ ኬት ሳሮተን ደእዶሶና። ቃስ ምንዶሶና፤ ጎዳስ ያይሸ ጌሻ አያና ምንን ዳር ዳርድ ብዶሶና።

ጰፅሮስ ሊደንነ ዮጰን

³² ጰፅሮስ ቢታ ኡባ ዩይሸ ሊዳን ደእያ አማንያ አሳታኮ ጋክስ።

³³ ያን ሆስፑን ላይ ኩመ ጉንድድ አርሳን ዝንእድ ደእያ ኤንያ ጌተትያ አድያ ደምስ።

³⁴ ጰፅሮስ፥ “ኤንያ፥ የሱስ ክርስቶሲ ነና ፓና፤ ደንዳዳ ነ ሂፃ ደን” ያግስ። እካ ኤለስድ ደንድ ኤቅስ።

³⁵ ሊዳንነ ሳሮናን ደእያ አሳ ኡባይ ኤንያ በእድ፥ ጎዳኮ ስምዶሶና።

³⁶ ዮጰ ካታማን እስ ፃብቶ ጌተትያ አማንያራ ደአዉሱ። እ ሱንይ አራምከ ዶናን፥ “ፃብቶ”፤ ግርከ ዶናን፥ “ዶርቃ”፤ ሄ ናምኡ ሱን ብርሸይ “ገንኤ” ጉሱ። እያ ባ ደእዳ ዎደ ኡባን ሎኦባ ኦሸነ ማንቆታ ማዳሸ ደአሱ።

³⁷ ሄ ዎደ እያ ሀርጋዳ ሀይቅን፥ አሳይ እ አሀ ሜጭድ፥ ፖቀ ቦላ ከስድ ዝንእስዶሶና።

³⁸ ሊደይ ዮጰስ ማታ። አማነይሳት ጰፅሮስ ሊዳን ደኤይሳ ስእድ፥ “ሀያና ኑኮ ኤለሳዳ ያ” ያግድ ናምኡ አሳታ እያኮ ኪትዶሶና።

³⁹ ሄሳ ግሾ፥ ጰፅሮስ ደንድድ፥ ኤንታራ ብስ። ያ ጋክን፥ ፖቀ ቦላ ደእያ ክፍለ እያ ገልስዶሶና። አምኤት ጰፅሮሳ ዩሾን ኤቅድ ዬክሸ ዶርቃ ኤንታራ ፓፃ ደአሸ ኦዳ ቃምሰታነ አፍላታ ኡባ ጰፅሮሳ በስዶሶና።

⁴⁰ ጰፅሮስ ኤንታ ኡባ ካረ ከስድ፥ ጉልባትድ ዎስስ። ቃስ አሃኮ ስሚድ፥ “ፃብተ፥ ደንዳ” ያግስ። ፃብታ ባ አይፍያ ዶያዳ ጰፅሮሳ በአዳ፥ ደንዳ ኡታሱ።

⁴¹ ጰፅሮስ እዮ ባ ኩሸን ማድድ ደንድ ኤስስ። ሄሳፈ ጉየ፥ አማነይሳታነ አምኤታ ፄግድ፥ ደንድዳሮ ኤንታ ስን ሺሽስ።

⁴² ሀ ኦዳይ፥ ዮጰ ካታማ ኡባ ጋክስ፤ ዳሮ አሳይ ጎዳ አማንዶሶና።

⁴³ ጰፅሮስ ዮጰን ስሞና ጌተትያ ጋልባ ሃሸይሳ ሶን ዳሮ ጋላስ ጋምእስ።