ሃዋሬታ ኦሱዋ 6 - ጌሻ ማፃፋ

ላፑን አሳታ ዶረተ

¹ ሄ ዎደ ካለይሳታ ታይቦይ ዳር ዳርድ ብሽን፥ ግርከ ዶና ኦደትያ አይሁደት ይሁዳን የለትድ ደእያ አይሁደታ ቦላ ዙዙምዶሶና። አይስ ጊኮ፥ ግርከ ዶና ኦደትያ አይሁደት፥ “ጋላስ ጋላስ እመትያ ካን ኑ አምኤት ናቀቶሶና” ያግዶሶና።

² ታማነ ናምኡ ሀዋረት ዎሳ ኬ አሳ ኡባ ፄግድ፥ “ኑኒ ፆሳ ቃላ ኦደይሳ አግድ ካ ግሻናዉ በሰና።

³ ህዛ፥ እሻቶ፥ ሎኦ አሳታ፥ ጌሻ አያናንነ ጭንጫተን ኩምዳ ላፑን አሳታ ህንተ ግዶፈ ዶርተ፤ ኑኒ ኤንታ ሀ ኦሱዋስ ሹማና።

⁴ ሽን ኑኒ፥ ኑ ኩመ ዎድያ ዎሳንነ ቃላ ታማርሶን ፔሻና” ያግዶሶና።

⁵ ሀዋረት ኦድዳ ኦዳይ አሳ ኡባ ኡፋይስስ። ሄሳ ግሾ፥ አማኖይነ ጌሻ አያን ኩምዳ እስፅፋኖሰ፥ ፍልጶሳ፥ ጵሮኮሮሳ፥ ንቃሮና፥ ፅሞና፥ ጳርመናነ አይሁደ አማኖ ገል ስምዳ አንፆከ አድያ ንቆላዎሳ ዶርዶሶና።

⁶ ኤንታ ሀዋረታ ስንን ኤስን፥ ሀዋረት ኤንታ ቦላ ኩሸ ዎድ ዎስዶሶና።

⁷ ፆሳ ቃላይ ዳልግ ዳልግ ብስ። የሩሳላመን ደእያ አማነይሳታ ታይቦይ ዳር ዳርድ ብስ፤ ዳሮ ካህነትካ አማንዶሶና።

እስፅፋኖሰይ ኦይከትስ

⁸ እስፅፋኖሰይ አ ኬሀተንነ ዎልቃን ኩምድ አሳ ግዶን ኦራባታነ ማላታታ ኦስ።

⁹ አይለተፈ ከይዳ አይሁደ ዎሳ ኬ አሳይ ቀሬናፐነ እስክንድረፐ ክልቀፈነ ኢሰፐ ይዳ እስ እስ አሳት ደንድድ እስፅፋኖሰራ ፓላምዶሶና።

¹⁰ ሽን እስፅፋኖሰይ አያና ዎልቃን ኦደትያ ጭንጫተ ኤንቲ ኤቀታናዉ ዳንዳእቦኮና።

¹¹ ሄ ዎደ ኤንቲ፥ “ሙሰነ ፆሳ እ ጫይሽን ስእዳ” ግያ ዎርዶ አሳታ ሻምዶሶና።

¹² ሄሳዳ ኦድ ቢታ ጭማታነ ህገ አስታማረታ እያ ቦላ ደንዶሶና። እስፅፋኖሰ ኦይክድ ሻንጉዋ ስን ኤፍዶሶና።

¹³ እያ ቦላ ፓይድዳ ዎርዶ ማርካት፥ “ሀ ኡራይ ሀ ፆሳ ኬነ ሙሰ ህግያ ዛር ዛር ጫዬስ።

¹⁴ እ፥ ‘ሀይስ ናዝረተ የሱሲ፥ ሀ ፆሳ ኬ ላላና፤ ቃስ ሙሰይ ኑስ እምዳ ህግያ ላማና’ ያግሽን ኑኒ ስእዳ” ያግዶሶና።

¹⁵ ሻንጎ ሺቆን ኡትዳ አሳ ኡባይ እስፅፋኖሰ ሎይድ ፄልያ ዎደ እያ ሶምኦይ ኪታንቾ ሶምኦ ዳኔስ።