ሃዋሬታ ኦሱዋ 5 - ጌሻ ማፃፋ

ሀናንያነ ሳፕሂሮ

¹ እስ ሀናንያ ጌተትያ አደይ ባ ማቸ ሳጵርራ ጋደ ባይዝስ።

² ሄ ባይዝዳ ሚሽያፐ ባ ማችያ ኤርሽን ባጋ አሽድ፥ አትዳይሳ ኤህድ ሀዋረታስ እሚስ።

³ ሽን ጰፅሮስ ሀናንያኮ፥ “ኔኒ ጌሻ አያና ጭማና መላነ ጋድያ ባይዝዳ ሚሽያፐ ሻካዳ አሻና መላ ፃላሄይ ነ ዎዛናን አይስ ገልዴ?

⁴ ኔኒ ባይዛናፐ ካሰ ጋደይ ነባ ግደነዬ? ቃስ ኔኒ ባይዛ ስምንካ ሚሸይ ነባ ግደነዬ? ያትን፥ ሄሳ መላባ ኦናዉ አይስ ነ ዎዛናን ቆፓዲ? ኔኒ ፆሳ ቦላ ዎርዶታዳሳፐ አትሽን፥ አሳ ቦላ ዎርዶታባካ” ያግስ።

⁵ ሀናን ሄ ቃላ ስእዳ መላ ኩንድድ ሀይቅስ፤ ሄሳ ስእዳ ኡባይ ዳሮ ያይስ።

⁶ ናአተ አሳት ሶ ገልድ እያ አሀ ፃፅድ ኤፍድ ሞግዶሶና።

⁷ ሄ ሳተፐ ጉየ ሀናንያ ማችያ ሄሳ ኤሮና ደአሸ ጰፅሮስ ደእያሱዋ ገላሱ።

⁸ ጰፅሮስ ኢኮ፥ “ህንተ ጋድያ ሀይሳ መላ ሚሸስ ባይዝደቲ? አነ ታዉ ኦዳ” ያግስ። እያካ፥ “ኤ፥ ሀይሳ መላ ሚሸስ ባይዝዳ” ያጋሱ።

⁹ ጰፅሮስ ማጫስዉ፥ “ኔራነ ነ አዝናራ ጎዳ አያና ፓጫናዉ አይስ ዞረትደቲ? ሄኮ፥ ነ አዝና ሞግዳ አሳት ካረን ደኦሶና፤ ነናካ ኤንቲ ካረ ከሳና” ያግስ።

¹⁰ ማጫስያ ኢራካ ጰፅሮሳ ቶሁዋ ማታን ኩንዳዳ ሀይቃ አጋሱ፤ ናአተት ገልያ ዎደ ሀይቅዳሮ ደምድ ካረ ከስድ፥ እ አዝና ማታን ሞግዶሶና።

¹¹ ኩመ ዎሳ ኬይነ ሄሳ ስእዳ ሀራ አሳ ኡባይ ዳሮ ያይዶሶና።

ማላልስያባታነ ማላታታ

¹² ሀዋረት ዳሮ ማላታታነ ኦራባታ አሳ ግዶን ኦሶና። አማንያ ኡባይ ሶሎሞነ ባራንዳን እስፈ ሺቆሶና።

¹³ ሀራ አሳፐ ኤንታራ ጋሄታናዉ እስ አስካ ምንቤና፥ ሽን አሳይ ኤንታ ቦንቼስ።

¹⁴ አማንያ አደታነ ማጫሳታ ታይቦይ ካሰይሳፈ ዳርሸ ብስ።

¹⁵ ሄሳ ግሾ፥ አሳይ ሀርጋንቾታ ሀላንነ አልጋን ቶክድ ጰፅሮስ አያ ዎደ እያ ኩያይ ኤንታፈ እሶታ እሶታ ቦላ ሸምፓና መላ ኦገ ዶናን ከስድ ዎሶና።

¹⁶ ቃስ ዳሮ አሳይ የሩሳላመ ማታን ደእያ ካታማታፐ ሀርጋንቾታነ ቱና አያን ዋይስያ አሳታ ኤክድ ዮሶና፤ ኡባይካ ፓፅዶሶና።

ሀዋረታ ቦላ ጎድ ደንድስ

¹⁷ ካህነ ሀላቃይነ እያራ ደእያ ሳዱቃወት ኡባይ ቃናተን ኩምድ ሀዋረታ ቦላ ደንድዶሶና።

¹⁸ ሀዋረታ ኦይክድ ደርያ ቃሾ ኬን የግዶሶና።

¹⁹ ሽን ጎዳ ኪታንቾይ ቃማ ቃሾ ኬ ፐንግያ ዶይድ ሀዋረታ ካረ ከስድ፥

²⁰ “ብድ፥ ፆሳ ኬን ኤቅድ ሀ ኦራ ደኦ ቃላ አሳ ኡባስ ኦድተ” ያግስ።

²¹ ሀዋረት ሄሳ ስእዳ ዎደ ዎንታ ጉራ ፆሳ ኬ ገልድ ታማርሶ ዶምዶሶና። ካህነታ ሀላቃይነ እያራ ደኤይሳት ይድ፥ እስራኤለ ጭማታ ኡባ ፄግ ሺሽድ ሀዋረታ ባንታ ስን ኤሀና መላ ዎታዳረታ ቃሾ ኬ ኪትዶሶና።

²² ሽን ዎታዳረት ቃሾ ኬ ብድ ሀዋረታ ደምቦኮና። ጉየ ስም ይድ ደርያስ፥

²³ “ኑኒ ብያ ዎደ ቃሾ ኬ ፐንገይ ምን ጎርደትን፥ ናገይሳት ፐንገን ኤቅዳይሳታ ደምዳ። ሽን ኑኒ ካርያ ዶይያ ዎደ ግዶን ሀር አቶሽን እስ አስካ ባዋ” ያግዶሶና።

²⁴ ሄሳ ግሾ፥ ፆሳ ኬ ዎታዳረታ ኪተይስነ ካህነ ሀላቃት ሄሳ ስእዳ ዎደ፥ “ሀዋረታ ቦላ አይብ ሀንዴ?” ያግድ ህርግዶሶና።

²⁵ ሄ ዎደ እስ አደይ ኤንታኮ ይድ፥ “ሄኮ፥ ቃሾ ኬ ህንተ ገልስዳ አሳት ፆሳ ኬን ኤቅድ አሳ ታማርሶሶና” ያግድ ኤንታዉ ኦድስ።

²⁶ ፆሳ ኬ ዎታዳረታ ኪተይስ ባ ዎታዳረታራ ብድ ሀዋረታ ኤህስ። ሽን ኤንቲ ባንታና አሳይ ሹቻን ጫዳና ግድ ያይዳ ግሾ ኤንታ አዳሽድ ኤህዶሶና።

²⁷ ኤንቲ ሀዋረታ ኤህድ፥ ሺቅዳ ሻንጉዋ ስንን ኤስን ካህነ ሀላቃይ ኤንታኮ፥

²⁸ “ህንተና ኑኒ ሄ ኡራ ሱንን ታማርሶና መላ ምንድ ኪትቦኮ? ሄኮ፥ ህንተ ትምርትያ የሩሳላመ ካታማ ኡባ ጋደታ። ሄ ኡራ ሸምፑዋስ ኑና ኦይናዉ ቆፔቲ?” ያግድ ኦይችስ።

²⁹ ጰፅሮሳራነ ሀንኮ ሀዋረታራ ኤንታዉ ዛርሸ፥ “ኑኒ አሳስ ኪተታናፐ ፆሳስ ኪተታናዉ በሴስ።

³⁰ ማስቃልያ ቦላ ህንተ ካቅድ ዎዳ የሱሳ፥ ኑ አዋታ ፆሳይ ሀይቆፐ ደንስ።

³¹ እስራኤለት ናጋራፐ ስማና መላነ ኤንታ ናጋራይ አቶ ጌተታና መላ ፆሳይ የሱሳ ሃረይሳነ አሸይሳ ኦድ ቦንቾን ባፐ ኡሻቻ ባጋን ኡትስስ።

³² ሄሳስ ኑኒ ማርካ፤ ቃስ ፆሳይ ባና አማነይሳታስ እምዳ ጌሻ አያናይካ ማርካ” ያግዶሶና።

³³ ሺቅዳ አሳይ ሄሳ ስእዳ ዎደ ዳሮ ይሎትድ፥ ሀዋረታ ዎናዉ ቆፕዶሶና።

³⁴ ሽን አሳ ኡባን ዳሮ ቦንቸትዳ ጋማልያለ ጌተተይስ፥ እስ ህገ አስታማረይነ ፋርሳወይ ደንድ ኤቅድ ሀዋረታ ጉ ዎደስ ካረ ከሳና መላ ኪትስ።

³⁵ ሄሳፈ ጉየ፥ ሺቅዳ አሳኮ፥ “እስራኤለ አሳዉ፥ ሀ አሳታ ቦላ ህንተ ኦናዉ ቆፕያባፐ ናገትተ።

³⁶ አይስ ጊኮ፥ ሀይሳፈ ካሰ ተዎዳስ ባና፥ ‘ታኒ ግታ’ ግድ ደንድን፥ ኦይዱ ፄቱ ግድያ አሳት እያራ እስፍዶሶና። ሽን እያ ዎን እያ ካልዳ ኡባይ ላለትን ፓና አስ ግድድ አትዶሶና።

³⁷ ሄሳፈ ጉየ፥ አሳይ ታይበትያ ዎደ ጋልላ ይሁድ ደንድድ ዳሮ አሳ ፓንጋይድ ካለስ፥ ሽን እያካ ዎን እያ ካልዳ አሳ ኡባይ ላለትስ።

³⁸ ሀእካ ታ ህንተዉ ኦዳይስ፤ ሀ አሳታፐ ሻከትተ፤ ኤንታ ቦቾፍተ። አይስ ጊኮ፥ ሀ ቆፋነ ሀ ኦሱዋ አስ ኦያባ ግድኮ ያና።

³⁹ ሽን ሀ ቆፋይነ ሀ ኦሶይ ፆሳፈ ይዳባ ግድኮ፥ ህንተ ኤንታ ይሳናዉ ዳንዳኤከታ። ሄሳዳ ሀንሸ ህንተ ፆሳራ ካጨታና” ያግድ ኦድስ። ሄሳ ግሾ፥ ሺቅዳ አሳይ ጋማልያለ ዞርያ ኤክዶሶና።

⁴⁰ ሀዋረታ ሶ ፄግድ ልሶን ጋራፍስስ። ሄሳፈ ጉየ፥ ኤንታኮ፥ “የሱሳ ሱን ናምአን ደንፍተ” ግድ ብርሽድ የድዶሶና።

⁴¹ የሱሳ ሱን ግሾ፥ ኤንቲ ካዉያናይስ በሲያባ ግደይሳ ኤርዳ ግሾ ሻንጉዋ ስንፈ ኡፋይትሸ ከይዶሶና።

⁴² ኤንቲ ኡባ ጋላስ ፆሳ ኬንነ አሳ ሶን የሱሲ እ ክርስቶሳ ግደይሳ ታማርሶነ ሳባኮ አግቦኮና።