ሃዋሬታ ኦሱዋ 4 - ጌሻ ማፃፋ

ጰፅሮስነ ዮሃንስ ሻንጎ ስንን

¹ ጰፅሮስነ ዮሃንስ አሳስ ኦድሽን ካህነ ሀላቃት፥ ፆሳ ኬ ናገይሳታ ሀላቃይነ ሳዱቃወት ኤንታኮ ይዶሶና።

² ኤንቲ የሱሲ ሀይቆፐ ደንዶይሳነ እያ ጋሶን ሀይቆፐ ደንዶይ ደኤይሳ አሳ ታማርስዳ ግሾ ይሎትዶሶና።

³ ሄሳ ግሾ፥ ኤንታ ኦይክድ ሳእ ኦማርስዳ ግሾ ዎንታና ጋካናዉ ቃሾ ኬ ገልስዶሶና።

⁴ ሽን ቃላ ስእዳይሳታፐ ዳሮት አማንዶሶና። አማንዳ አደ አሳ ታይቦይ እቻሹ ሙኩሉኮ ብስ።

⁵ ዎንተ ጋላስ ደርያ ሃረይሳት፥ ጭማትነ፥ ህገ አስታማረት የሩሳላመን ሺቅዶሶና።

⁶ ሄ አሳ ግዶን ካህነ ሀላቃይ ሃን፥ ቃያፍ፥ ዮሃንስ፥ እስክንድረይነ ካህነ ሀላቃ ሶ አሳት ኡባይ ደኦሶና።

⁷ ሀዋረታ ባንታ ስንን ኤስድ፥ “አይብ ዎልቃን ዎይኮ ኦደ ሱንን ሀይሳ ህንተ ኦደቲ?” ያግድ ኦይችዶሶና።

⁸ ሄ ዎደ ጰፅሮስ ጌሻ አያናን ኩምድ፥ “ደርያ ሃረይሳቶ፥ ጭማቶ፥

⁹ ሀች ሀ ዎበ አድያስ ኦሰትዳ ሎኦ ኦሱዋስነ እ ዋንድ ፓፅዳኮ ህንተ ኑና ኦይችኮ፥

¹⁰ ማስቃልያ ቦላ ህንተ ካቅን፥ ፆሳይ ሀይቆፐ ደንዳ ናዝረተ የሱስ ክርስቶሳ ሱንን ሀ አደይ ፓፅድ ህንተ ስንን ኤቅዳይስ ህንተዉነ እስራኤለ አሳ ኡባስ ኤረቶ።

¹¹ “ ‘ግምበይሳት ቦርድ እፅዳ ሹቻይ፥ ጎዳ ፃጱዋ ምንያ፥ ኡባፈ አያ ሹቹ ግድስ። ሄ ሹቻይ የሱሳ።’

¹² ሄሳ ግሾ፥ አቶተ እያ ባጋራፐ አትሽን፥ ሀራ ኦደ ባጋራካ ባዋ። ኑኒ እያ ሱንን አታና መላ አሳ ኡባስ ፆሳይ ሳሎፐ ጋርሳን እምዳ ሀራ ሱን ባዋ” ያግስ።

¹³ ሺቅዳ አሳይ ጰፅሮስነ ዮሃንስ ምንዳ ምኖተ በእዳ ዎደ ኤንቲ ታማርቦና ጮ አስ ግድዳይሳ አኬክድ፥ ማላለትዶሶና፤ ኤንቲ የሱሳራ ደኤይሳ ኤርዶሶና።

¹⁴ ቃስ ፓፅዳ አደይ ጰፅሮሳራነ ዮሃንሳራ ኤቅዳይሳ አሳይ በእድ ግያባ ይዶሶና።

¹⁵ ሽን ጰፅሮሳነ ዮሃንሳ ካረ ከያና መላ ኦድ ባንታ ግዶን፥

¹⁶ “ሀ አሳታ ኑ አይ ኦኖ? ኤንታ ኩሸን ኦሰትዳ ግታ ማላታይ የሩሳላመን ደእያ ኡባስ በንቴስ። ኑኒ ሄሳ ኤሮኮ ጋናዉ ዳንዳኦኮ።

¹⁷ ሽን ሀ ኦዳይ አሳ ግዶን ላለቶና መላ ህዛፐ ጉየ፥ ሀ አሳት የሱሳ ሱንን ኦደስካ ኦዶና መላ ምንድ ናግሳና” ያግድ ዞረትዶሶና።

¹⁸ ኤንታ ፄግድ፥ የሱሳ ሱንን ህዛፐ ኦዶና መላ ዎይኮ ታማርሶና መላ ኪትዶሶና።

¹⁹ ሽን ጰፅሮስነ ዮሃንስ ኤንታኮ ዛሪድ፥ “ፆሳስ ኪተታናይሳፈነ ህንተዉ ኪተታናይሳፈ ፆሳ ስንን አዉስ ሎኦኮ? አነ ህንተ ፕርድተ።

²⁰ ኑኒ በእዳባነ ስእዳባ ኦዶና አጋናዉ ዳንዳኦኮ” ያግዶሶና።

²¹ ቢታ ጭማትነ ደርያ ሃረይሳት ካሰፐ ምን ናግስድ ኤንታ የድ አግዶሶና። አሳይ ሀንዳባስ ፆሳ ጋላትያ ግሾ ኤንታ ሴራናዉ ዳንዳእቦኮና።

²² ሄ ማላታን ሀርገፈ ፓፅዳ አድያስ ላይ ኦይታማፐ አስ።

አማንያ አሳ ዎሳ

²³ ጰፅሮስነ ዮሃንስ ብርሸትድ ባንታ ዳቦታኮ ብድ፥ ካህነ ሀላቃትነ ጭማት ባንታኮ ግዳባ ኡባ ኤንታዉ ኦድዶሶና።

²⁴ ኤንቲ ሄሳ ስእዳ ዎደ እስ ዎዛናን ግድድ ፆሳ ሀይሳዳ ያግድ ዎስዶሶና፦ “ኡባ ሃርያ ጎዳዉ፥ ሳሉዋ፥ ሳኣ፥ አባነ ኤንታ ግዶን ደእያ ኡባባ መዳይሶ፥

²⁵ ኔኒ ነ አይልያ፥ ኑ አዋ ዳዊታ ዶናን ጌሻ አያናን፥ “ ‘ደረይ አይስ ይሎትዶና? አሳይ አይስ ጮ ማቀትዶና?

²⁶ ሳኣ ካዎትነ ደርያ ሃረይሳት እስፈ ጎዳ ቦላነ ክርስቶሳ ቦላ ደንድዶሶና’ ያጋዳሳ።

²⁷ “ቱማካ፥ ሄሮዲስነ ጰንፀ ጵላፆስ አይሁደ ግዶና አሳራነ እስራኤለ አሳራ ነ ዶርዳ ነ ጌሻ ናኣ የሱሳ ቦላ ደንዳናዉ ሀ ካታማን ሺቅዶሶና።

²⁸ ቃስ ኔኒ ነ ዎልቃንነ ነ ሸንያን ኦና ጋዳ ቆፓ ኡትዳባ ኡባ ፖልዶሶና።

²⁹ ሀእካ ጎዳዉ፥ ኤንታ ማንደ በአ፤ ኑኒ ነ አይለት ነ ቃላ ኩመ ዎዛናን ኦዳና መላ ኑና ዳንዳእሳ።

³⁰ ነ ጌሻ ናኣ የሱሳ ሱንን ሀርጋንቾታ ፓናዉ፥ ኦራባይነ ማላታት ኦሰታና መላ ነ ኩሽያ ምጫ” ግድ ዎስዶሶና።

³¹ ኤንቲ ፆሳ ዎስዳፐ ጉየ፥ ሄ ኤንቲ ሺቅዳ በሳይ ቃፅስ። ኤንታ ኡባን ጌሻ አያን ኩምን ፆሳ ቃላ ምኖተን ኦድዶሶና።

ኮይሮ አማንዳ አሳ እስፈተ

³² አማነይሳት ኡባይ ቆፋንነ ዎዛናን እስኖ ግድዶሶና። ኤንቲ ባንታዉ ደእያባ ታባ ጎናሽን እስፈ ሻከቶሶና።

³³ ሀዋረት፥ ጎዳ የሱሲ ሀይቆፐ ደንድዳይሳ ግታ ዎልቃን ማርካቶሶና። ፆሳይ ኤንታ ኡባስ አ ኬሀተ ዳርስድ እሚስ።

³⁴ ቢት ዎይኮ ኬ ደኤይሳት ኡባይ ባይዝ ኤክዳ ሚሽያ ኤህያ ግሾ፥ አማነይሳታ ግዶን መቶታንቾይ እሶይካ ባዋ።

³⁵ ሚሸ ኤህድ ሀዋረታስ እሞሶና፤ ሄ ሚሽያ አሳስ ኮሽዳይሳዳ እሱዋስ እሱዋስ ሻክ ሻክ እሜስ።

³⁶ ቆጵሮሳ ጌተትያ በሳን የለትዳ ዮሰፋ ጌተትያ ሌወ ሼሻፐ ግድዳ እሶይ ደኤስ። እያ ሱን ሀዋረት ባርናባሳ (ምን ናአ) ግዶሶና።

³⁷ ባርናባስ ባዉ ደእያ ቢታ ባይዝድ ሚሽያ ኤህድ ሀዋረታስ እሚስ።