ሃዋሬታ ኦሱዋ 3 - ጌሻ ማፃፋ

ጉንዳ ኡራ

¹ እስ ጋላስ ጰፅሮስነ ዮሃንስ ዎሳናዉ ኡዱፉን ሳተን ፆሳ ኬ ብዶሶና።

² የለቶሶፐ ዶምድ ዎበ ግድዳ እስ አደይ ፆሳ ኬ ገልያ አሳፐ ሚሸ ዎሳና መላ ኡባ ጋላስ ሎኦ ጌተትያ ፆሳ ኬ ፐንገን ኤህድ ዎሶና።

³ ሄ ዎበ አደይ ጰፅሮስነ ዮሃንስ ፆሳ ኬ ገላና ሀንሽን በእድ ኤንታ ሚሸ ዎስስ።

⁴ ኤንትካ እያ ጫድ ፄልድ፥ “ኑኮ ሃ ፄላ” ያግዶሶና።

⁵ ዎበ አደይ ኤንታፈ አይኮ ኤካና ዳንን ኤንታኮ ፄልስ።

⁶ ሽን ጰፅሮስ እያኮ፥ “ታዉ ሚሸይ ባዋ፥ ሽን ታዉ ደእያባ ታኒ ነዉ እማና። ናዝረተ የሱስ ክርስቶሳ ሱንን ደንዳዳ ሄመታ” ያግስ።

⁷ ሄሳፈ ጉየ፥ ዎበ አድያስ ኡሻቻ ኩሽያ ኦይክድ ደንስ። ኤለስድ እያ ቶሆይነ ቅንጫፍለይ ምን አግስ።

⁸ አደይ ጉፕድ ደንድ ኤቅስ። ገደነ ሃ ሄመ ዶምስ። ሄመትሸ፥ ጉፕሸነ ፆሳ ጋላትሸ ኤንታራ እስፈ ፆሳ ኬ ገልስ።

⁹ እ ሄመትሽንነ ፆሳ ጋላትሽን አሳ ኡባይ እያ በእዶሶና።

¹⁰ በእዳ ኡባይ ሚሸ ዎሳናዉ ሎኦ ጌተትያ ፆሳ ኬ ፐንገን ኡትዳይስ፥ እያ ግድዳይሳ ኤርዶሶና፤ እ ሀንዳባ በእድ ማላለትዶሶና።

ጰፅሮሳ ሃሳያ

¹¹ አደይ ጰፅሮሳፐነ ዮሃንሳፐ ዱፅከ ግድ ኦይክድ ደእሽን፥ አሳ ኡባይ ማላለትድ፥ ሶሎሞነ ባራንዳ ጌተትያ በሳን እስፈ ኤንታኮ ዎፅዶሶና።

¹² ጰፅሮስ አሳ በእዳ ዎደ አሳኮ፥ “እስራኤለ አሳዉ፥ አይስ ሀይሳን ማላለተቲ? ዎይኮ አይስ ኑና ጫድ ፄለቲ? ኑኒ ኑ ዎልቃን ዎይኮ ኑ ፅሎተን ሀ አድያ ሄመዳባ ህንተዉ ዳኒ?

¹³ አብራሃመ፥ ይሳቃ፥ ያይቆባ ፆሳይ፥ ኑ አዋታ ፆሳይ፥ ባ ናኣ የሱሳ ቦንችስ። ሽን ህንተ ሀይቆስ አድ እምዳይሳ ጵላፆስ ብላናዉ ኮይንካ ህንተ እያ ስንን፥ ‘ኑኒ እያ ኤሮኮ’ ያግደታ።

¹⁴ ህንተ ጌሻነ ፅሉዋ፥ ‘ኑኒ እያ ኤሮኮ’ ግድ፥ ሸምፖ ዎዳይሳ ህንተዉ ብላና መላ ጵላፆሳ ዎስደታ።

¹⁵ ደኦ እመይሳ ህንተ ዎደታ፥ ሽን ፆሳይ ሀይቆፐ እያ ደንስ። ሄሳስ ኑኒ ማርካ።

¹⁶ ሀ ህንተ በኤይስነ ኤርያ አደይ፥ ፓፅድ ምንዳይ የሱሳ ሱንን አማንዳይሳና። ሀ ህንተ ኡባ ስንን እያ ሀይሳዳ ፓዳይ፥ እ የሱሳ አማንዳ ግሾሳ።

¹⁷ “ሀእካ ታ እሻቶ፥ ህንተካ ህንተና ካለይሳታዳ፥ ኤሮና ኦዳይሳ ታኒ ኤራይስ።

¹⁸ ሽን ፆሳይ በን ናበታ ኡባ ዶናን፥ ‘ክርስቶስ ዋየ ኤካናዉ በሴስ’ ያግዳይስ ሀይሳዳ ፖለታና መላ ኦስ።

¹⁹ ህዛ፥ ፆሳይ ህንተ ናጋራ አቶ ጋና መላ ጎዳኮ ስምተ።

²⁰ ጎዳ ማታፐ ምን ዎደይ ህንተዉ ያና። ፆሳይ ክርስቶሳ ግዳና መላ ስንትድ ዶርዳ የሱሳ ህንተዉ የዳና።

²¹ ፆሳይ ባ ጌሻ ናበታ ዶናን በን ኦድዳይሳ መላ ኡባባይ ኦራፅያ ዎደይ ጋካናዉ የሱሲ ሳሎን ጋምአናዉ በሴስ።

²² ሙሰይ፥ ‘ጎዳ ፆሳይ ታና ደንዳይሳ መላ ህንተ ግዶፈ ህንተዉ ናበ ደንና። ህንተ እ ገይሳ ኡባ ስእተ።

²³ ሄ ናበይ ኦደይሳ ስኦና አስ ኦንካ አሳ ግዶፈ ሻከትድ ዮ’ ያግስ።

²⁴ “ቃስ ሳሜላፐ ዶምድ ደእያ ናበት ኡባይ ሀ ዎድያባ ኦድዶሶና።

²⁵ ህንተ ናበታ ናይታ፤ ቃስ ፆሳይ አብራሃመስ፥ ‘ሳአን ደእያ አሳ ኡባ ታኒ ነ ሼሻ ባጋራ አንጃና’ ያግድ ኑ አዋታስ ገልዳ ቃላ ላትያ ናይታ።

²⁶ ፆሳይ ህንተና ኡባ ህንተ ኢታ ኦገፐ ዛሪድ አንጃና መላ ባ ናአ ደንድ ህንተዉ ኮይሮ የድስ” ያግስ።