ሃዋሬታ ኦሱዋ 28 - ጌሻ ማፃፋ

ጳዉሎስ ዩሾይ አባን ተቀትዳ ቢታ ማልታን

¹ ኑኒ ጋፃ ሳሮ ከይዳ ዎደ ጋክዳ በሳይ ዩሾይ አባን ተቀትዳ ቢታ፥ ማልታ ግደይሳ ኤርዳ።

² ማልታ አሳይ ኑስ ዳሮ ኬሀ ኬህዶሶና። እር ቡክያ ግሾነ ሜግያ ግሾ ታማ ኤድ ኑና ኡባ ሞክዶሶና።

³ ጳዉሎስ ዳሮ አፍራ ሺሽድ ታማን ዎሽን፥ ሾሽ ሴላ ግሾ ከይድ እያ ኩሽያ ቦላ ፃፀትድ እያ ዱክስ።

⁴ ማልታ አሳይ ሾሽ ጳዉሎሳ ኩሸን ፃፀትዳይሳ በእዳ ዎደ እሶይ እሱዋኮ፥ “ቱማ ሀ ኡራይ ሸምፖ ዎዳ አስ፤ ሀር አቶሽን አባፈ እ አትንካ ፆሳ ፕርዳፈ አትድ ፓፃ ዳናዉ ዳንዳእቤና” ያግዶሶና።

⁵ ሽን ጳዉሎስ ባ ኩሽያፐ ሾሻ ዉፃርክድ፥ ታማን የግስ፤ እያ አይኮካ ቆህቤና።

⁶ ኤንቲ፥ “እያ አሳተይ ክፄስ፥ ዎይኮ አኬኮና ኩንድድ ሀይቄስ” ግድ እያ ናጎሶና። ሽን ዳሮ ዎደ ናግድ እያ አሳተን አይብካ ዱማትዳባይ ይን፥ “ሄስ ፆሰ” ያግድ ባንታ ቆፋ ላምዶሶና።

⁷ ሄ ሄራን ዩሾይ አባን ተቀትዳ ቢታ ሀላቃ፥ ፑፕልዮሳ ጌተተይሳስ ጋደይ ደኤስ፤ ሄ ጋላስ ጋካናዉ እ ኑና ሲቆን ሞክስ።

⁸ ፑፕልዮሳ አዋይ ቆፆ፥ ምሻነ ኡሎ ኡትሶን ሀርገትድ ዝንእድ ደኤስ። ጳዉሎስ እያ ሶ ገልድ እያዉ ፆሳ ዎስስ፤ ባ ኩሽያ እያ ቦላ ዎድ ፓስ።

⁹ ሄሳፈ ጉየ፥ ዩሾይ አባን ተቀትዳ ቢታ፥ ማልታን ደእያ ሀርግያ ሀራ አሳትካ ይድ ፓፅዶሶና።

¹⁰ ኤንቲ ኑና ዳሮ ቦንቾ ቦንችዶሶና፤ ኑኒ ማርካበን ባናዉ ደንድዳ ዎደ ኦገስ ኮሽያባ ኑስ እምዶሶና።

ጳዉሎስ ሮመ ጋክስ

¹¹ ሄ አጌናፐ ጉየ፥ ማልታን ባልጎ አድ ማርካበን ገልድ እስክንድረ ባናዉ ደንድዳ። ሄ ማርካብያ ቦላ ድዮስቆሮሳ ጌተትያ መንተ ኤቃታ ምስለይ ደኤስ።

¹² ስራኩሰ ካታማ ገልድ ያን ሄ ጋላስ ኡትዳ።

¹³ ያፐ ደንድድ ረግዩመ ካታማ ጋክዳ። እስ ጋላሳፐ ጉየ፥ ዱገሀ ባጋ ጫርኮይ ጫርክን፥ ዎንተ ጋላስ ፑትዮላ ካታማ ጋክዳ።

¹⁴ ያን ኑኒ እስ እስ አማንያ አሳታ ደምን፥ ባንታራ ሳምንታ ጋምአና መላ ኑና ዎስዶሶና። ሄሳፈ ጉየ፥ ሮመ ብዳ።

¹⁵ ሮመን ደእያ አማንያ አሳት ኑባ ስእድ፥ አፍዮሳ ግያን፥ ሄ እማ ኬ ጋካናዉ ኑና ሞካናዉ ይዶሶና። ጳዉሎስ ኤንታ በእዳ ዎደ ፆሳ ጋላትድ ምነትስ።

¹⁶ ኑኒ ሮመ ገልዳ ዎደ ጳዉሎስ ባና ናግያ ዎታዳርያራ ባርካ ደኦ ጌተትስ።

¹⁷ ሄ ጋላሳፐ ጉየ፥ ጳዉሎስ አይሁደታ ሀላቃታ ባኮ ፄግስስ። ኤንቲ ሺቅዳ ዎደ ኤንታኮ፥ “ታ እሻቶ፥ ታኒ ኑ አሳ ዎይኮ ኑ አዋታ ዎጋ ቦላ አይብ ቆሆካ ኦብከ፥ ሽን ታና የሩሳላመን ቃችድ ሮመ አሳስ አድ እምዶሶና።

¹⁸ ኤንቲ ታ ሞቱዋ በእድ ሀይቆስ ጋያባ ታ ቦላ አይብባካ ደምቦና ግሾ ታና ብላናዉ ቆፕዶሶና።

¹⁹ ሽን አይሁደት ሄሳ እፅዳ ዎደ፥ ‘ታባ ቄሳረይ ፕርዶ’ ያጋስፐ አትሽን፥ ታኒ ታ ደርያ ሞትያባይ ደእን ግደና።

²⁰ ታኒ ህንተና ፄግስዳይ ህንተና በአናዉነ ህንተዉ ሀይሳ ኦዳናሳ። ታኒ ሀ ሳንላታን ቃሸትዳይ እስራኤለ አሳይ ናግያ ኡፋይሳ ግሾሳ” ያግስ።

²¹ አይሁደ ሀላቃት ጳዉሎሳኮ፥ “ኑስ ይሁዳፐ ነባ ፃፈትዳ ዳብዳበይ ጋክቤና። ያፐ ይዳ አሳታፐ እሶይካ ነባ ኢታ ኦድዳይ ባዋ።

²² ሽን ሀ ነ ካልያ አማኑዋ ዱማ ዱማ በሳን አሳይ እፀይሳ ኑኒ ኤርያ ግሾ ነ ቆፋ ስአናዉ ኮዮስ” ያግዶሶና።

²³ ኤንቲ ባንታ ያና ጋላስ ጳዉሎሳስ ቃፃርድ፥ ሄ ጋላስ ዳርድ እ ደእያሱዋ ይዶሶና። እ ዎንታፈ ኦማርስ ጋካናዉ ፆሳ ካዎተባ ኤንታዉ ማርካትስ። ቃስ ኤንቲ የሱሳባ አማናና መላ ሙሰ ህግያፈነ ናበታ ማፃፋፐ ቆንጭስድ ኤንታ ታማርስስ።

²⁴ እሶት እሶት ጳዉሎስ ግዳይሳ አማንዶሶና፥ ሽን ሀራት አማንቦኮና።

²⁵ ኤንቲ ባንታ ግዶን ኦዳ ማኦና እፅዳ ዎደ ጳዉሎስ እስባ ግዳፐ ጉየ ብዶሶና። እ ሀይሳዳ ያግስ፦ “ጌሻ አያናይ ኑ አዋታስ ናብያ እሳያሳ ዶናን ኦድዳይስ ቱማ።

²⁶ “ ‘ኔኒ ሄ አሳኮ ባዳ፥ ህንተ ስስ ስኤታ፥ ሽን ህንተዉ ገለና፤ ህንተ በኦ በኤታ፥ ሽን ደመከታ።

²⁷ አይስ ጊኮ፥ ሀ ደርያ ዎዛናይ ሙምስ፤ ኤንታ ሀይይ ቱልስ፤ ኤንታ አይፈይካ ጎዘትስ። ሄስ ባይነኮ፥ ኤንቲ ባንታ አይፍያን በእድ፥ ባንታ ሀይን ስእድ፥ ባንታ ዎዛናን አኬክድ፥ ታኮ ስማናሽን፤ ታካ ኤንታ ፓናሽን’ ያጋ” ያግስ።

²⁸ “ህዛ፥ ሀይስ ፆሳ አቶተ ኪታይ አይሁደ ግዶናይሳታስ ግደይሳ ኤሬታ። ኤንትካ ስአና” ያግስ።

²⁹ ጳዉሎስ ሄሳ ግዳፐ ጉየ፥ አይሁደት ባንታ ግዶን ዳሮ ፓላምሸ ከይድ ብዶሶና።

³⁰ ጳዉሎስ ከራ ኬን ናምኡ ላይ ኩመ ደእስ፤ ያን ደእሸ ባኮ ያ ኡባ ሞኬስ።

³¹ ያሽ ባይናነ ኦንካ ድጎናሽን ፆሳ ካዎተባ ሳባክስ፤ ጎዳ የሱስ ክርስቶሳባ ቆንጭስድ ታማርሴስ።