ሃዋሬታ ኦሱዋ 27 - ጌሻ ማፃፋ

ጳዉሎስ ሮመ ብስ

¹ ኑኒ ማርካበን ፃለ ባናዉ ቆፋ ቃችዳ ዎደ አዉግስፆሳ ዎታዳረታ ጌተተይሳታፐ እስ ዩልዮሳ ጌተትያ ማቶ ሀላቃስ ጳዉሎሳነ ሀራ ጉ ቃሾ አሳታ አድ እያዉ እምዶሶና።

² ኢሰ ጋፃን ደእያ ቢታታ ብያ አድራምፅዮነ ማርካበን ገልድ ደንድዳ። ማቀዶነ አስ ግድዳ ተሰሎንቀ አርስፅሮኮስ ኑራ ደኤስ።

³ ዎንተ ጋላስ ኑኒ ስዶና ጋክሽን፥ ዩልዮስ ጳዉሎሳስ ኬህድ ባ ላገታኮ ብድ ኮሽያባን ማዳና መላ ኤንታኮ እያ የድስ።

⁴ ያፐ ደንድድ ስንራ ኑ ቦላ ጫርክያ ግሾ ሃን ተቀትዳ ቢታ፥ ቆጵሮሳን ዘምፕድ አዳ።

⁵ ክልቅያነ ጵንፍለ ማታን ደእያ አባ ፕንድ ሊቀን ደእያ ሙራ ጋክዳ።

⁶ ያን ማቶ ሀላቃይ ፃለ ብያ እስክንድረ ማርካበ ደምድ፥ እያን ኑና ገልስስ።

⁷ ኑኒ ዳሮ ጋላስ ሎዳራ ብድ፥ ዳሮ መቶን ቃንዶሳ ካታማ ማት ጋክዳ። ያራ ባናዉ ኑና ጫርኮይ ድግን ሳልሞናራ አድ ሃን ተቀትዳ ቢታ፥ ቃርፄሳን ዘምፕድ አዳ።

⁸ ዳሮ መቶን ጋፃ ጋፃ ኦይክድ ላሳ ካታማ ማታን ደእያ አባ ዶናን “ማርካበይ ዎፑ ግድ ሸምፕያ በሲ” ጌተትያ በሳ ጋክዳ።

⁹ ኑኒ ያን ዳሮ ዎደ ጋምእዳፐ ጉየ ፆም ብለትዳ ግሾ ህዛፐ ማርካበን ቡስ መትያ ግሾ ጳዉሎስ ኤንታ ዞርስ።

¹⁰ “አሳዉ፥ ኑ ቡሳን ግታ ቦሽነ ዳሮ ቆሆይ ደኤይስ ታዉ በንቴስ፤ ቆሆይ ጫና ቦላነ ማርካብያ ቦላ ፃላላ ግዶናሽን ኑ ደኡዋ ቦላካ ጋካና” ያግስ።

¹¹ ሽን ማቶ ሀላቃይ ጳዉሎስ ግዳይሳፈ አድ ማርካብያ ላገይስነ ማርካብያ ጎዳይ ገይሳን አማንስ።

¹² ሄ አባ ዶናን ደእያ ካታማይ ባልጎ አጌና አናዉ ኤንታዉ እንጀቶና ግሾ፥ ዳርያ አሳት ባንታዉ ዳንዳኤትኮ ፍንቀ ካታማ ጋክድ ባልጎ አጌና ያን አናዉ ዞረትዶሶና። ፍንቀይ ፑደሀ-ዉሎሀፐነ ዱገሀ-ዉሎሀፐ ግዶን አባ ዶናን ደእያ ካታማ።

አባ ቦላ ጎተይ ደንድስ

¹³ ካዉሻ ዱገሀ ጫርኮይ ሎዳራ ጫርክዳ ዎደ ባንታ ቆፕዳይሳዳ ሀንዳባ ኤንታዉ ዳንን ደንድድ፥ ማርካበይ ቃፆና መላ ኦይክያ ብራታ ፑደ ኤክድ ቃርፄሳ ማታራ አዶሶና።

¹⁴ ሽን ዳሮ ጋምኦና “አዉራቅስ” ጌተትያ ዎልቃማ ጎተይ ሃን ተቀትዳ ቢታፈ ዱገ ኤንታ ቦላ ደንድስ።

¹⁵ ሄ ጎተይ ማርካብያ ሱግድ ኤፎና ድግዳ ግሾ ጫርኮይ ማርካብያ ባ ዶስዳ ሶ ኤፍስ።

¹⁶ ኑኒ ዩሾይ አባን ተቀትዳ ቢታ፥ ቄዳን ዘምፕድ ብሸ ዳሮ መቶተትድ ማርካብያ ዎጎሉዋ አሻናዉ ዳንዳእዳ።

¹⁷ ኤንቲ ዎጎሉዋ ፑደ ከስዳፐ ጉየ ዎዶሩዋን ማርካብያ ቦላ ፃፅድ፥ ምን ቃችዶሶና። ሱርትሳ ጌተትያ ሻፍያን ባንታና ዶምኤና ግድ ህርግድ፥ ማርካብያ ሻራ ዎስድ ማርካብያ ጮ የድ አግዶሶና።

¹⁸ ጎተይ ዎልቃምሸ ብን ዎንተ ጋላስ ጫናፐ ባጋ አባን ሆሎ ኦይክዶሶና።

¹⁹ ሄን ጋላስ ማርካብያ ሚሽያ ኤክድ ባንታ ኩሸን ሆልዶሶና።

²⁰ ኑኒ ዳሮ ጋላስ አዋ አይፈነ ፆልንቶ በኦና ግሾነ ዎልቃማ ኡሾይ ኑ ቦላ ኡሽዳ ግሾ ስንፈ ኑኒ ሸምፖራ አታና ግድ ቆፕቦኮ።

²¹ ሄ ዎደ ኤንቲ ዳሮ ጋላስ ካ ሞና ጋምእዳ ግሾ ጳዉሎስ ኤንታ ግዶን ደንድ ኤቅድ፥ “አሳዉ፥ ህንተ ታ ዞርያ ኤክድ ቃርፄሳፐ ደንዶና አግዳኮ ሀ መቶይነ ቆሆይ ኑና ጋከና።

²² ሽን ታኒ ህንተና ያዮፍተ ጋዳ ዞራይስ፤ አይስ ጊኮ፥ ሀ ማርካበይ ያናፐ አትሽን፥ ህንተፈ እስ አሳ ሸምፖይካ የና።

²³ ዝነ ቃማ ታ እያባ ግድዳይስነ ታ ጎይንያ ፆሳይ ኪትዳ ኪታንቾይ ታ ማታን ኤቅድ፥

²⁴ ‘ጳዉሎሳ፥ ያዮፋ፤ ኔኒ ሮመ ቢታ ካዋ ቄሳረ ስንን ኤቃናዉ በሴስ። ሄኮ ፆሳይ ነ ግሾ ኔራ ብያ አሳ ኡባ ሸምፑዋ አሽስ’ ያግስ።

²⁵ ሄሳ ግሾ፥ አሳዉ፥ ያዮፍተ። ሄ ኪታንቾይ ታዉ ኦድዳይስ ሀናናይሳ ታኒ አማናይስ።

²⁶ ሽን ጫርኮይ ኑና ኤፍድ እስ ዩሾይ አባን ተቀትዳ ቢታ ጋፃን ሆላና” ያግስ።

ማርካበይ መቅስ

²⁷ ታማነ ኦይዳን ቃማን አድረ አባን ኑና ጫርኮይ ገደነ ሃ ሱግሽን፥ ግድ ብላሄ ግድያ ዎደ ማርካብያን ኦይሳታስ ቢታኮ ማትዳባ ዳንስ።

²⁸ ኤንቲ ጪሞተ ኤራናዉ ኮይድ ዎዶሮ ፄራን ዴፅያባ ቃችድ አባን የግን፥ አባይ ሆስፑን ታሙ ዋ ግድስ። ጉ ጋምእድ፥ ዛር የግን ኡሱፑን ታሙ ዋ ግድስ።

²⁹ ኤንቲ አባ ጋፃን ደእያ ሹቻን ዶምኤቶና መላ ያይድ፥ ማርካበይ ቦና መላ ኦይክያ ኦይዱ ብራታታ ማርካብያፐ ጉየራ አባን የግድ፥ ሳእ ዎንታና መላ ፆሳ ዎሶሶና።

³⁰ ማርካብያን ኦይሳት ማርካብያፐ ባቃታናዉ ኮይድ፥ ማርካበይ ቦና መላ ኦይክያ ብራታታ ማርካብያፐ ስን ባጋራ አባን የግያ ዳንን ዎጎሉዋ አባን የግዶሶና።

³¹ ጳዉሎስ ማቶ ሀላቃኮነ ዎታዳረታኮ፥ “ሀይሳቲ ማርካብያን ሸምፕ ኡቶና እፅኮ ህንተ አታናዉ ዳንዳኤከታ” ያግስ።

³² ሄሳ ግሾ፥ ዎታዳረት ዎጎሎይ ቃሸትዳ ዎዶሩዋ ቃንፅድ የድ አግዶሶና።

³³ ሳአይ ዎንታና ሀንሽን ኡባይ ካ ማና መላ ጳዉሎስ አሳኮ፥ “ህንተ ካ ሞና ናግሸ ሀችራ ታማነ ኦይዱ ጋላስ ጋምእደታ።

³⁴ ሄሳ ግሾ፥ ጉ ካ ህንተ ማና መላ ታኒ ህንተና ዎሳይስ። ህንተ ጋሽትሳና መላ ጉ ካ ማናዉ ኮሼስ፤ ሀር አቶሽን ህንተ ሁጰ ብናናፐ እሶይካ የና” ያግስ።

³⁵ ጳዉሎስ ሄሳ ግድ ኡይ ኤክድ ኡባ ስንን ፆሳ ጋላትስ፤ ኡይ መንድ ሙሱ ዶምስ።

³⁶ ኡባይ ምነትድ ባንታዉ ካ ኤክድ ምዶሶና።

³⁷ ኑኒ ማርካብያን ደኤይሳት ናምኡ ፄታነ ላፑን ታማነ ኡሱፑና።

³⁸ ኤንቲ ምድ ካልዳ ዎደ ጫና ግስትያ አባን የግድ ማርካብያ ዴፁዋ ካዉሽዶሶና።

³⁹ ሳአይ ዎንትዳ ዎደ ማርካብያ ኦሳንቾት አዉ ቢታ ጋክዳኮ ኤሮናሽን፥ አባ ጋፃን ደእያ ሻፈነ ስልሞ በእዶሶና። ባንታዉ ዳንዳኤትኮ ማርካብያ ሄ ሻፍያኮ ሺሻናዉ ቆፕዶሶና።

⁴⁰ ያትድ፥ ማርካበይ ቦና መላ ኦይክያ ብራታታ ብርሽድ አባን የግዶሶና። ሄ ዎደ ላግያ ም ቃችያ ዎዶሩዋ ብርሽዶሶና። ሄሳፈ ጉየ፥ ጫርኮይ ማርካብያ ስን ሱጋና መላ ማርካብያ ኤፍያ ሻራ ስን ባጋራ ቁ ኦድ ቡሱ ዶምዶሶና።

⁴¹ ሽን ማርካበይ ሻፈ ዶረን ዶምኤትድ ምተትስ። ማርካብያስ ስን ባጋይ ፁጉንድ ሻፍያ ጫድ ኦይክድ ቃፆና እፅን፥ ጉየ ባጋይ ዙልያ ሱገን መቀረተ ኦይክስ።

⁴² ዎታዳረት ቃሾ አሳፐ እሶይካ ሃ ዋድ ከስ ኤኮና መላ ኤንታ ዎናዉ ዞረትዶሶና።

⁴³ ሽን ማቶ ሀላቃይ ጳዉሎሳ አሻናዉ ኮይድ ዎታዳረታ ዞረታ እፅስ። ሃ ዋ ኤርያ ኡባይ ማርካብያፐ ሃን ጉፕ ጉፕ ዎድ ካሰትድ ጋፃ ከያና መላ ኪትስ።

⁴⁴ አትዳይሳት ሳንቃ ቦላነ፥ ማርካብያ መኡዋ ቦላ ከያና መላ ኪትስ። ሄሳዳ ሀንድ ኡባይ ጋፃ ሳሮራ ከይዶሶና።