ሃዋሬታ ኦሱዋ 26 - ጌሻ ማፃፋ

ጳዉሎሳ ዛሩዋ

¹ አግርጵ ጳዉሎሳኮ፥ “ኔኒ ነባ ኦዳናዉ ዳንዳኣሳ” ያግስ። ሄ ዎደ ጳዉሎስ ባ ኩሽያ ደንድ ሀይሳዳ ያግስ፦

² “ካዋዉ፥ አግርጳ፥ አይሁደት ታና ሞትዳባስ ዛሮ እማናዉ ሀች ነ ስንን ኤቃሸ ታ ቃዳይ ሎኦ ጋዳ ቆፓይስ።

³ ኔኒ አይሁደ ዎጋነ ፓላማ ሎይዳ ኤርያ ግሾ ታና ሳለቶና ስአና መላ ነና ዎሳይስ።

⁴ “ታኒ ናአተፈ ዶማዳ ታ አሳ ግዶንነ የሩሳላመን ደእዳ ታ ደኡዋ አይሁደ ኡባይ ኤሮሶና።

⁵ ታኒ ኮይሮፐ ዶማዳ፥ ኑ ሀይማኖተ ህግያ ምንድ ናግያ ፋርሳወታ ያራፐ ግደይሳ ኤንቲ ማርካታናዉ ኮይኮ ኤሮሶና።

⁶ ሀእካ ታኒ ፆሳይ ኑ አዋታስ እማና ግዳ ኡፋይሳ ናግያ ግሾ ሞተታዳ ሀይሳን ኤቃስ።

⁷ ቃስ ታማነ ናምኡ ኑ አዋታ ሼሻይ ፆሳ ቃማነ ጋላስ ምንድ ጎይንሸ ፆሳይ እማና ግዳይሳ ኤካናዉ ኡፋይሳን ናጎሶና። ካዋዉ አግርጳ፥ አይሁደት ታና ሞተይ ታኒ ኡፋይሳን ሄሳ ናግያ ግሾሳ።

⁸ አይሁደቶ፥ ፆሳይ ሀይቅዳይሳታ ደንይሳ አይስ አማነከቲ?

⁹ “ካሰ ታኒ ታ ሁጰንካ ናዝረተ የሱሳ ሱን ተቃናዉ ዳንዳኤትዳባ ኡባ ኦናዉ በሴስ ጋዳ ቆፓስ።

¹⁰ ታኒ የሩሳላመን ኦዳይ ሀይሳ። ካህነ ሀላቃታፐ ማታ ኤካዳ ፆሳ አሳታፐ ዳሮታ ቃሽሳስ። ኤንታ ዎያ ዎደካ ኤንታ ሀይቁዋ ዶሳስ።

¹¹ ዳሮ ዎደ አይሁደ ዎሳ ኬ ኡባን ኤንቲ ሴረታና መላነ የሱሳ ጫይድ ካዳና መላ ኡንኤስ። ታኒ ዎግ ባይና ኤንታ ሀንቀታዳ ሀር አቶሽን፥ ሀራ ቢታ ካታማታ ጋካናዉ ኤንታ ጎዳስ።

¹² “ታኒ ሀ ኦዳስ ካህነ ሀላቃታፐ ማታነ ኪታ ኤካዳ ዳማስቆ ባይስ።

¹³ ካዋዉ፥ ታኒ ሴታ ጋላስ ኦገን ደእሽን አዋ ፖኦፐ ዳሮ አያ ፖኦይ ታ ዩሹዋንነ ታራ በይሳታ ዩሹዋን ሳሎፐ ፖእስ።

¹⁴ ኑኒ ኡባይካ ሳአን ኩንድዳ ዎደ እብራወ ዶናን፥ ‘ሳኦላ፥ ሳኦላ፥ ታና አይስ ጎዳይ? ኔኒ፥ ነና ጫድያ ብራታ ፃምአ ቃክኮ ነና ቆሃሳ’ ያግድ ታዉ ኦድሽን ስአስ።

¹⁵ “ታኒ፥ ‘ጎዳዉ፥ ኔኒ ኦኔ?’ ያጋስ። “ጎዳይ፥ ‘ታኒ፥ ኔኒ ጎድያ የሱሳ፤

¹⁶ ሽን ደንዳ ኤቃ። ሀች ኔኒ ታና በእዳይሳንነ ስንፈ ታ ነዉ በሳናይሳ ሀራታስ ማርካታና መላ ታ ኦሳንቾ ኦዳ ነና ሹማናዉ ነዉ በንታስ።

¹⁷ እስራኤለ አሳታፐነ ታኒ ነና ኤንታኮ ኪትያ አይሁደ ግዶናይሳታፐ ነና አሻና።

¹⁸ ኔኒ ኤንታ አይፍያ ዶያና፥ ማፐ ፖኦኮ፥ ፃላሄ ኩሸፐ ፆሳኮ ኤንታ ዛራና። ኤንቲ ታናን አማንድ ናጋራ አቶተ ኤካና። ፆሳይ ዶርዳ አሳ ግዶን ባንታ ላታ ደማና’ ያግስ።

¹⁹ “ካዋዉ አግርጳ፥ ሄሳ ግሾ፥ ታዉ ሳሎፐ በንትዳ ቆንጨስ ኪተታናይሳ እፃብከ።

²⁰ ሽን ታኒ ኮይሮታዳ ዳማስቆን ሄሳፈ ጉየ የሩሳላመንነ ይሁዳ ቢታ ኡባን ደኤይሳትነ አይሁደ ግዶናይሳት ባንታ ናጋራፐ ፆሳኮ ስማና መላነ ናጋራፐ ስሙዋ በሲያ ኦሶ ኦና መላ ቃላ ኦዳስ።

²¹ ሄሳ ግሾ፥ አይሁደት ታና ፆሳ ኬን ኦይክድ ዎናዉ ኮይዶሶና።

²² ሀች ጋካናዉ ፆሳ ማደይ ታፐ ሻከትቤና፤ ያንያ ግሾ፥ ጉስነ ግታስ ማርካታሸ ሀይሳን ኤቃስ። ናበትነ ሙሰይ ሀናና ግድ ኦድዳይሳፈ ሀራ እስባካ ታኒ ኦድዳባይ ባዋ።

²³ ሄስካ፥ ‘ክርስቶስ ዋየ ኤካናዉ በሴስ፤ ቃስ ሀይቆፐ ኮይሮ ደንድድ አይሁደታስነ አይሁደ ግዶናይሳታስ አቶተ ፖኦ ኦዳናዉ በሴስ’ ግዳይሳ” ያግስ።

²⁴ ጳዉሎስ ሄሳ ያግድ ዛርሽን፥ ፍስፆስ ባ ቃላ ቁ ኦድ፥ “ጳዉሎሳ፥ ነ ጎያዳሳ፤ ነ ዳሮ ትምርተይ ነና ጎሻተስ ጋስ” ያግስ።

²⁵ ሽን ጳዉሎስ፥ “ቦንቾ ፍስፆሳ፥ ታኒ ቱማባነ በሲያባ ኦዳይስፐ አትሽን፥ ጎያብከ።

²⁶ ታኒ ቆንጨን ኦድያ ኦዳ ካዎይ ኤሬስ። ሀ ኦዳይ ጌማን ኦሰትቦና ግሾ እሶይካ እያፐ ጌሞናይሳ ታኒ ጌሻዳ ኤራይስ።

²⁷ “ካዋዉ አግርጳ፥ ኔኒ ናበታ አማናሳ ግድኪ? ኔኒ አማነይሳ ታኒ ኤራይስ” ያግስ።

²⁸ ካዎይ አግርጵ፥ ጳዉሎሳኮ፥ “ሀ ጉ ሳተን ታና ክርስታነ ኦናዉ ኮያይ?” ያግስ።

²⁹ ጳዉሎስ፥ “ዳሮ ዎደ ግድን ጉ ዎደ ነ ፃላላ ግዶናሽን ሀች ታና ስእያ ኡባይ ሀ ቃሹዋፐ አትሽን፥ ታ መላ ግዳና መላ ፆሳ ዎሳይስ” ያግስ።

³⁰ ሄሳፈ ጉየ፥ ካዎይ ፍስፆስ፥ ባርንቀይነ ኤንታራ ኡትዳ ኡባይካ ደንድዶሶና።

³¹ ያፐ ከይድ ብሸ እሶይ እሱዋራ፥ “ሀ ኡራይ ሀይቆስ ዎይኮ ቃሾስ ጋያባ አይኮካ ኦቤና” ያግድ ኦደትዶሶና።

³² አግርጵ ፍስፆሳኮ፥ “ሀ ኡራይ ‘ቄሳረይ ታባ ፕርዶ’ ጎናኮ ብለታናዉ ዳንዳኤስ ሽን” ያግስ።