ሃዋሬታ ኦሱዋ 24 - ጌሻ ማፃፋ

አይሁደት ጳዉሎሳ ሞትዶሶና

¹ እቻሹ ጋላሳፐ ጉየ ካህነ ሀላቃይ፥ ሀናን፥ ጭማታራነ ፀርፀሉሳ ጌተትያ እስ ፃባቃራ ቅሳረ ብስ። ኤንቲ ደርያ አይሰይሳ ቦላ ጳዉሎሳ ሞትዶሶና።

² ጳዉሎስ ፄገትድ ገልዳ ዎደ፥ ፀርፀሉስ እያ ሀይሳዳ ያግድ ሞትስ፦ “ቦንቾ ፍልክሳ፥ ኑኒ ነ ባጋራ ዳሮ ሳሮተ ደምዳ፥ ነ ሎኦ አይሱዋን ኑ ቢታይ ዳሮ ላመትስ።

³ ቦንቾ ፍልክሳ፥ ኑኒ አዉንካ አዉደ ግድን ዳሮ ጋላታን ሄሳ ኤኮስ።

⁴ ታኒ ነና ጋምእሶናሽን ኔኒ ነ ኬሀተን ኑባ ቃንን ስአና መላ ነና ዎሳይስ።

⁵ ሀ ኡራይ በ ግድድ ቢታ ኡባን ደእያ አይሁደታ ግዶን ቡቀ መድ ናዝራወታ ባጋ አሳ ካለይሳ ግዶይሳ ኤርዳ።

⁶ ሀር አቶሽን፥ ፆሳ ኬ ቱንሳና ሀንሽን ኑኒ እያ ኦይክዳ፤ ኑ ህግያዳ እያ ቦላ ፕርዳናዉ ቆፕዳ።

⁷ ሽን ሻላቃ ሉስዮስ ይድ፥ ዎልቃን ኑ ኩሸፐ እያ ዎ ኤክስ።

⁸ እያ ሞተይሳት ኔኮ ያና መላ ኪትስ። ኔኒ ነ ሁጰን ሀ ኡራ ፕልጋዳ ኑኒ እያ ሞትያ ሞቱዋ ኡባ ኤራናዉ ዳንዳኣሳ” ያግስ።

⁹ አይሁደትካ፥ “ሀ ኦዳይ ቱማ” ግድ እያ ቆፋ ማእዶሶና።

¹⁰ ደርያ አይሰይስ ጳዉሎሳ ኦዳ ግድ ማልስ። ጳዉሎስ ሀይሳዳ ግድ ዛርስ፦ “ኔኒ ዳሮ ዎደፐ ዶማዳ፥ ሀ አሳስ ፕርዳሸ ደኤይሳ ኤራዳ ታ ኦዳስ ኡፋይሳን ዛሮ እማይስ።

¹¹ ታኒ የሩሳላመ ጎይናናዉ ከይን ታማነ ናምኡ ጋላሳፐ አናይሳ ኔኒ ነ ሁጰን ኤራናዉ ዳንዳኣሳ።

¹² አይሁደት ታና ፆሳ ኬን ግድን አይሁደ ዎሳ ኬን ግድን ካታማን ግድን ኦደራካ ፓላምሽን ዎይኮ አሳ ሺሻዳ ማቅሽን እስ አስካ ደምቤና።

¹³ ሀእካ ኤንቲ ታና ሞትያባስ ማርካ ደማናዉ ዳንዳኦኮና።

¹⁴ “ሽን ታኒ ሀይሳ እስባ አማናይስ፤ ታኒ ህገን ደእያባነ ናበት ፃፍዳ ኡባባ አማናዳ፥ ኑ አዋታ ፆሳ፥ ኤንቲ ዎርዶ ግያ ኦግያን ጎይናይስ።

¹⁵ ኤንቲ ባንታ ሁጰን አማነይሳ መላ ፅሎትነ ናጋራንቾት ሀይቆፐ ደንዳናይሳ ታካ አማናይስ።

¹⁶ ሄሳ ግሾ፥ ታኒ ፆሳ ስንንነ አሳ ስንን ኡባ ዎደ ሎኦ ካህ ታዉ ዳና መላ ምናይስ።

¹⁷ “ታኒ የሩሳላመፐ ከዮሳፐ ዳሮ ላይፈ ጉየ ታ ቢታ ማንቆታስ ማደ እማናዉነ ያርሾ ያርሻናዉ የሩሳላመ ባስ።

¹⁸ ታኒ ፆሳ ኬን ሄሳ ኦዳ ጌሻ ዎጋ ፖላ ስምን ታና ደምዶሶና። ሄ ዎደ ታራ አስ ባዋ፥ ኦሽካ ከይቤና።

¹⁹ ሽን ኢሰፐ ይዳ እስ እስ አይሁደት ሄሳን ደኦሶና፤ ኤንቲ ታ ቦላ ኦዳ ኮይኮ ይድ ታና ነ ቦላ ሞታናዉ ዳንዳኦሶና።

²⁰ ዎይኮ ታኒ ሻንጉዋ ስን ሺቅዳ ዎደ ኦዳ ባል ደእኮ ሀይሳቲ ነ ስንን ደኤይሳት ኦዶና።

²¹ ታኒ ኤንታ ግዶን ኤቃዳ፥ ‘ሀይቅዳይሳት ደንዳና ጋዳ ዋሳዳ ኦድዳ ግሾ ሀች ህንተ ስንን ታ ቦላ ፕርዶሶና’ ጋስ፤ ሄሳፈ ሀራባ ኦብከ” ያግስ።

²² ሽን ፍልክስ ፆሳ ኦግያባ ጌሽ ኤርዳ ግሾ፥ “ታኒ ህንተ ኦዳ ሻላቃ ሉስዮስ ያ ዎደ ፕርዳና” ያግድ ሞይዝስ።

²³ ፍልክስ ቃስ ጳዉሎሳ ቃቾና ናጋና መላነ እያ ዳቦታፐ ኦንካ እያ ኦይቻናዉ ይሽን ድጎና መላ ማቶ ሀላቃ ኪትስ።

²⁴ ጉ ጋላሳፐ ጉየ፥ ፍልክስ አይሁደ ባጋ ግድዳ ባ ማቸ ድሩስላራ ይድ ጳዉሎሳ ኪት ኤህስድ የሱስ ክርስቶሳን አማኖባ እያፐ ስእስ።

²⁵ ጳዉሎስ ፅሎተባ፥ ባ ሁጰ ሃሮባነ ያናዉ ደእያ ፕርዳባ ኦድሽን፥ ፍልክስ ያይድ፥ “ኔኒ ሀእስ ባ፤ ታዉ እንጀትዳ ዎደ ነና ፄግሳና” ያግስ።

²⁶ ሄ ዎደ ጳዉሎሳፐ ዎፈ ኤካናዉ ቆፕድ፥ እያ ዛር ዛር ፄግስድ እያራ ኦደቴስ።

²⁷ ናምኡ ላይፈ ጉየ፥ ፍልክሳ በሳ ጶርቅዮስ ፍስፆስ ኤክስ። ፍልክስ አይሁደታ ኡፋይሳናዉ ኮይድ ጳዉሎሳ ብሎና አጋግስ።