ሃዋሬታ ኦሱዋ 22 - ጌሻ ማፃፋ

¹ “ታ እሻቶ፥ ታ አዋቶ፥ ታኒ ሀእ ህንተዉ እምያ ዛሩዋ ስእተ።”

² ጳዉሎስ ኤንታዉ እብራወ ዶናን ኦደይሳ ስእድ ካሰይሳፈ አድ ስእ ግዶሶና። እ ካልድ፥

³ “ታኒ ክልቅያን ደእያ ተርሰሴ የለታዳ ሀ ካታማን ድጫስ። ታ አስታማረይካ ጋማልያለ፤ ታኒ ኑ አዋታ ህግያ ምን ታማርዳ፥ ሀች ህንተ ኡባይ ሀነይሳዳ ፆሳስ ምሸትያ አይሁደ አስ።

⁴ ታኒ ሀ ኦግያ ካልያ ማጫታነ አደታ ኦይካዳ ቃሾ ኬን የጋሸነ ኤንታ ዎሳና ጋካናዉ ዋየ በስዳ አስ።

⁵ ሄሳዳካ፥ ካህነ ሀላቃይነ ሻንጎ ኡባይ ታባ ማርካታናዉ ዳንዳኤስ። ታኒ ዳማስቆን ደእያ ኤንታ እሻታስ ኤንታፈ ዳብዳበ ኤካዳ ያን ደእያ አሳት ቃሸትድ ሴረታና መላ የሩሳላመ ኤንታ ኤሀናዉ ያ ባስ።

⁶ “ታኒ ባዳ ዳማስቆ ማትዳ ዎደ ሴታ ጋላስ ቆፖና ሳሎፐ ግታ ፖኦይ ታ ዩሹዋን ፖእስ።

⁷ ታኒ ሳአን ኩንዳ ደእሽን፥ ‘ሳኦላ፥ ሳኦላ፥ ታና አይስ የደይ?’ ግያ ቃላ ስአስ።

⁸ ታኒ ዛራዳ፥ ‘ጎዳዉ፥ ኔኒ ኦኔ?’ ያጋስ። እ ዛሪድ፥ ‘ታኒ፥ ኔኒ ጎድያ ናዝረተ የሱሳ’ ያግስ።

⁹ ታራ ደኤይሳት ፖኡዋ በእዶሶናፐ አትሽን፥ ታዉ ኦደይሳ ቃላ አኬክቦኮና።

¹⁰ “ታኒ፥ ‘ጎዳዉ፥ ታ አይ ኦ?’ ያጋስ። “ጎዳይ ታኮ፥ ‘ደንዳዳ ዳማስቆ ባ። ኔኒ ኦና መላ ፆሳይ ኦናዉ ቆፕዳባ ኡባይ ያን ነዉ ኦደታና’ ያግስ።

¹¹ ሄ ዎልቃማ ፖኡዋ ጋሶን ታ አይፈይ ቆቅን፥ ታራ ደእያ አሳት ታ ኩሽያ ኦይክድ፥ ታና ጎችን ዳማስቆ ጋካስ።

¹² “ዳማስቆን ደእያ አይሁደ ኡባይ ዳሮ ቦንችያ እስ ሀናንያ ጌተትያ አደይ፥ ኑ ህግያ ቦንቸይስነ ፆሳ ምን ዎሰይስ ደኤስ።

¹³ ሀናን ታኮ ይድ፥ ታ ማታን ኤቅድ፥ ‘ታ እሻዉ ሳኦላ፥ ፄላ’ ያግስ። ኤለሳዳ ታኒ እያ ፄላ አጋስ።

¹⁴ “እ ታኮ፥ ‘ኑ አዋታ ፆሳይ ኔኒ እያ ሸንያ ኤራና መላ፥ እያ ፅሎ ናኣ በአና መላነ እያ ዶናፐ ቃላ ስአና መላ ካሰትድ ነና ዶርስ።

¹⁵ ኔኒ በእዳባነ ስእዳባ አሳ ኡባ ስንን እያዉ ማርካታና።

¹⁶ ሀእ አይስ ጋምአይ? ደንዳዳ ፃማቀታ፤ እያ ሱን ፄጋዳ ነ ናጋራፐ ሜጨታ’ ያግስ።

¹⁷ “ታኒ ጉየ የሩሳላመ ስማዳ ፆሳ ኬን ዎስሽን፥ ታዉ ቆንጨ በንትስ።

¹⁸ ቆንጨን ጎዳይ ታኮ፥ ‘ነ ታዉ ማርካትያ ማርካተ አሳይ ኤኮና ግሾ ኤለሳዳ የሩሳላመፐ ከያ’ ያግሽን ታኒ በአስ።

¹⁹ “ታኒ፥ ‘ጎዳዉ፥ አይሁደ ዎሳ ኬ ኡባን ነና አማነይሳታ ኦይካዳ ዋዳይሳነ ቃሾ ኬን የግዳይሳ ኤንቲ ኤሮሶና።

²⁰ ኤንቲ ነ ማርካ እስፅፋኖሰ ዎያ ዎደ ታኒ ሄ ኦዳን እስፋስ። ቃስ ኤንታ ማታን ኤቃዳ እያ ዎይሳታ ማኡዋ ናጋይስ’ ያግስ።

²¹ “ጎዳይ ታኮ፥ ‘ታኒ ነና አይሁደ ግዶና አሳኮ ሃሆሶ ኪትያ ግሾ ደንዳዳ ባ’ ” ያግስ።

ጳዉሎስ ሮመ አስ

²² ጳዉሎስ ሄ ቃላ ኦድድ ኦንጋና ጋካናዉ አሳይ እ ገይሳ ስኦሶና። ሄሳፈ ጉየ፥ ባንታ ቃላ ቁ ኦድ፥ “ሀይሳ ቢታፈ ይሳ! እ ዳናዉ በሰና” ያግዶሶና።

²³ ኤንቲ ዎጫምሽን፥ ባንታ ማኡዋ ቦላ ሆልሽንነ ባና ቦላ ላልሽን፤

²⁴ ሻላቃይ በእድ ዎታዳረት ጳዉሎሳ ባንታ ደእያሱዋ ኤፋና መላ ኪትስ። ቃስ አሳይ አይስ ሄሳዳ ዎጫምዳኮ ኤራናዉ ኮይድ ጳዉሎሳ ልሶን ጋራፍድ ፕልጋና መላ ኤንታ ኪትስ።

²⁵ ሽን ዎታዳረት ጳዉሎሳ ዳፎን ምን ቃችድ ጋራፋና ሀንያ ዎደ ጳዉሎስ ባ ማታን ኤቅዳ ማቶ ሀላቃኮ፥ “ሮመ አስ ፕርድ ባይና ጋራፈይስ ህንተዉ ዎጌ?” ያግስ።

²⁶ ማቶ ሀላቃይ ሄሳ ስእዳ ዎደ ሻላቃኮ ብድ፥ “ሀ አደይ ሮመ አስ። ኔኒ አይ ኦናዉ ቆፓይ?” ያግድ ኦይችስ።

²⁷ ሻላቃይ ጳዉሎሳኮ ሺቅድ፥ “ኔኒ ሮመ አሴ? አነ ታዉ ኦዳ” ያግስ። ጳዉሎስ፥ “ኤ” ያግስ።

²⁸ ሻላቃይ ዛሪድ፥ “ታኒ ሀ ጋደተ ዳሮ ሚሸን ሻማስ” ያግስ። ሽን ጳዉሎስ፥ “ታ ሀ ጋደተ የለተን ደማ ኤካስ” ያግስ።

²⁹ ሄሳ ግሾ፥ ጳዉሎሳ ፕልጋናዉ ቆፕዳይሳት ኢራ እያፐ ሻከትዶሶና። ሻላቃይ ሮመ አስ ሳንላታን ቃችዳይሳ ኤርዳ ዎደ ያይስ።

ጳዉሎስ አይሁደ ሻንጎ ስንን

³⁰ ዎንተ ጋላስ ሻላቃይ፥ አይሁደት ጳዉሎሳ አይስ ሞትዳኮ ጌሽ ኤራናዉ ኮይስ። ካህነ ሀላቃትነ ሻንጎይ ኡባይ ሺቃና መላ ኪትስ፤ ቃስ ጳዉሎሳ ቃሾፐ ብልስድ ኤንታ ስንን ኤስስ።