ሃዋሬታ ኦሱዋ 21 - ጌሻ ማፃፋ

ጳዉሎስ የሩሳላመ ቡሳ

¹ ኑኒ ኤፈሶና ጭማታፐ ሻከትዳ መላ ቆሳ ብዳ። ዎንተ ጋላስ ሮዳ ጋክድ ያፐ ጳፃራ ብዳ።

² ስሮፍንቀ ፕንያ ማርካበ ደምድ እያን ገልድ ባናዉ ደንድዳ።

³ ኑኒ ቆጵሮሳ በአናዉ ዳንዳእያ ሶ ይድ፥ ቆጵሮሳ ሀድርሳ ባጋ አግድ ሶረ ብዳ። ማርካበይ ባ ጫና ያን ዎናዉ ኮይዳ ግሾ ፅሮሳ ብዳ።

⁴ ያን አማንያ አሳታ ደምድ ኤንታራ ላፑን ጋላስ ኡትዳ። ጳዉሎስ የሩሳላመ ቦና መላ ኤንቲ እያዉ አያናን ኦድዶሶና።

⁵ ኑኒ ኤንታራ ኡትያ ዎደይ ዉርን ከይድ ብዳ። ኤንቲ ኡባይ ባንታ ማጫሳታራነ ባንታ ናይታራ እስፈ ካታማፐ ካረ ከስድ ኑና ሞይዝዶሶና። ኑኒ አባ ዶናን ጉልባትድ ፆሳ ዎስዳ።

⁶ ሄሳፈ ጉየ፥ ዎል ሳሮድ ኑ ማርካብያን ገልዳ፤ ኤንቲ ባንታ ሶ ስምዶሶና።

⁷ ኑኒ አባ ኦግያ ኦንግድ፥ ፅሮሳፐ ጳፀለማሳ ጋክዳ። ያን አማንያ አሳታ ሳሮድ፥ ኤንታ ማታን እስ ጋላስ ፔእዳ።

⁸ ዎንተ ጋላስ ከይድ፥ ቅሳረ ብዳ። ሳባክያ ፍልጶሳ ሶ ጋክድ እያ ማታን ኡትዳ። እ የሩሳላመን ካሰ ዶረትዳ ላፑናታፐ እሱዋ።

⁹ ፍልጶሳስ ናበ ግድዳ ኦይዱ ጌላኦ ናይት ደኦሶና።

¹⁰ ኑኒ ኡንደና ጋላስ ያን ኡትድ ደእሽን ትንብተ ኦድያ እስ አጋቦሳ ጌተትያ አደይ ይሁዳፐ ቅሳረ ይስ።

¹¹ ኑኮ ይድ ጳዉሎሳ ሳቅያ ኤክድ ባ ኩሽያነ ባ ቶሁዋ ቃችድ፥ “ጌሻ አያናይ ሀ ሳቅያ ጎዳ፥ የሩሳላመን አይሁደት ሀይሳዳ ቃችድ፥ አይሁደ ግዶና አሳስ አድ እማና ያጌስ” ያግስ።

¹² ኑኒ ሄሳ ስእዳ ዎደ ኑነ ያን ደእያ አሳት ጳዉሎስ የሩሳላመ ቦና መላ ዎስዳ።

¹³ ሽን ጳዉሎስ ዛሪድ፥ “ህንተ ሀይሳዳ ዬክሸ አይስ ታ ዎዛና ሹግሴቲ? ታኒ፥ ጎዳ የሱሳ ሱን ግሾ ቃሸተ ፃላላ ግዶናሽን የሩሳላመን ሀይቃናዉካ ጊገታስ” ያግስ።

¹⁴ ኑ ዞርያ እ ኤኮና እፅን፥ “ጎዳ ሸነይ ሀኖ” ያግድ ስእ ግዳ።

¹⁵ ያን ጉ ዎደ ጋምእዳፐ ጉየ ጊገትድ የሩሳላመ ባናዉ ከይዳ።

¹⁶ ቅሳረን ደእያ አማንያ አሳታፐ ጉት ኑራ ብዶሶና። ኤንቲ ኑኒ ሸምፓና በሲ ምናሶና ጌተትያ ቆጵሮሳ አድያ ሶ ኤፍዶሶና። ምናሶን ኮይሮ አማንዳ አሳፐ እሱዋ።

ጳዉሎስ የሩሳላመ ጋክስ

¹⁷ ኑኒ የሩሳላመ ጋክዳ ዎደ አማንያ አሳት ኑና ኡፋይሳን ሞክዶሶና።

¹⁸ ዎንተ ጋላስ ጳዉሎስነ ኑኒ ያይቆባራ ጋሄታናዉ ብዳ። ዎሳ ኬ ጭማት ኡባትካ ያን ደኦሶና።

¹⁹ ጳዉሎስ ኤንታ ሳሮዳፐ ጉየ አይሁደ ግዶና አሳ ግዶን ባ ባጋራ ፆሳይ ኦዳባ ኡባ ኤንታዉ ኦድስ።

²⁰ ኤንቲ ሄሳ ስእዳ ዎደ ፆሳ ጋላትድ ጳዉሎሳኮ ሀይሳዳ ያግዶሶና፦ “ኑ እሻዉ፥ አይሁደታ ግዶን አፑን ሙኩላት ፆሳ አማንዳኮ ነ በኣሳ፤ ኤንቲ ኡባይካ ህግያ ምን ናጎሶና።

²¹ ኔኒ አይሁደ ግዶናይሳታ ቢታን ደእያ አይሁደ ኡባይ ባንታ ናይታ ቃፃሮና መላ፥ አይሁደታ ዎጋ ካሎና መላነ ሙሰ ህግያ እፃና መላ ኔኒ ታማርሰይሳ የሩሳላመን ደእያ አይሁደት ስእዶሶና።

²² ያትን አይብ ሎኦ? ኔኒ ይዳይሳ ዳሮት ስአና።

²³ “ሄሳ ግሾ፥ ኑኒ ነዉ ኦደይሳ ስአ፤ ጋሶይ ደእያ ኦይዱ አሳት ኑ ማታን ደኦሶና።

²⁴ ኤንታ ኤካዳ ኤንታራ ጌያ፤ ቃስ ኤንቲ ባንታ ሁጵያ ሜደታና መላ ኤንታዉ ሚሸ እማ። ኤንቲ ካሰ ነባ ስእዳይስ ቱማ ግዶናይሳነ ኔኒ ነ ሁጰንካ ህገ ናግያ አስ ግደይሳ ኡባይ ኤራና።

²⁵ “ሽን አማንዳ አይሁደ ግዶና አሳታ ግድኮ፥ ኤንቲ ኤቃስ ያርሸትዳባ ሞና መላ፥ ሱ ኡዮና መላ፥ ባዉታ ሞና መላነ ላይማቶና መላ፥ ኑኒ ኦዳ ቃችድ፥ ኤንታዉ ዳብዳበ ፃፍዳ” ያግዶሶና።

²⁶ ሄሳፈ ጉየ፥ ጳዉሎስ ዎንተ ጋላስ አሳታ ኤክድ፥ ኤንታራ ጌይስ። እ ባንታ ጌይያ ጋላሳይ አዉደ ፖለትያኮ ኤርሳናዉነ ባንታ ያርሹዋ አዉደ ያርሻነኮ ኤርሳናዉ ፆሳ ኬ ገልስ።

ጳዉሎስ ኦይከትስ

²⁷ ላፑን ጋላሳይ ዉራና ሀንሽን፥ ኢሰፐ ይዳ አይሁደት ፆሳ ኬን ጳዉሎሳ በእድ፥ አሳ ኡባ ደንድ ጳዉሎሳ ኦይክዶሶና።

²⁸ “እስራኤለ አሳዉ፥ ኑና ማድተ፤ ሀ ኡራይ፥ ኑ ደርያ፥ ኑ ህግያነ ሀ ፆሳ ኬ እፃና መላ አሳ ኡባ ታማርሴስ። ሄስካ ግዶና እፅን አይሁደ ግዶናይሳታ ፆሳ ኬ ገልስድ፥ ሀ ጌሻ በሳ ቱንስስ” ያግድ ዋስዶሶና።

²⁹ ኤንቲ ሄሳ ግዳይ ካሰ ኤፈሶና ፅሮፍሞሳ ጳዉሎሳራ ካታማን በእዳ ግሾ ሀእ ጳዉሎስ ፆሳ ኬ እያ ኤክ ገልዳባ ኤንታዉ ዳንስ።

³⁰ ካታማ ኡባይ ቡቀትስ፤ አሳ ኡባይ ሺቅድ ጳዉሎሳ ኦይክድ ፆሳ ኬፈ ካረ ጎችዶሶና። ፆሳ ኬ ፐንገት ኤለስድ ጎርደትዶሶና።

³¹ አሳይ ጳዉሎሳ ዎና ሀንሽን፥ “የሩሳላመ ካታማይ ኩመ ቡቀትስ” ግያ ኦዳይ ሮመ ሻላቃኮ ጋክስ።

³² ሻላቃይ ዎታዳረታነ ማቶ ሀላቃታ ኤክድ ዎፅሸ ይስ። አሳይ ሻላቃነ ዎታዳረታ በእዳ ዎደ ጳዉሎሳ ዋይሳ አጋግዶሶና።

³³ ሄ ዎደ ሻላቃይ ሺቅድ፥ ጳዉሎሳ ኦይክድ፥ ናምኡ ሳንላታን ቃሸታና መላ ኪትስ። ያትድ፥ እ ኦነኮነ አይ ኦዳኮ አሳ ኦይችስ።

³⁴ አሳፐ ባጋይ እስባ ግድ ዋስያ ዎደ፥ ሀራት ሀራባ ግድ ዋሴስ። ዋሶይ ዳርዳ ግሾ፥ ሻላቃይ ቱማ ሻካናዉ ዳንዳኤቶና እፅን፥ ዎታዳረት ጳዉሎሳ ባንታ ደእያሶ ኤፋና መላ ኪትስ።

³⁵ ጳዉሎስ የ ከይያ ደ ጋክያ ዎደ አሳ ሱገ ግሾ ዎታዳረት እያ ቶክዶሶና።

³⁶ ዳሮ አሳይ፥ “እ ሀይቆ!” ያግድ ዋስሸ ካሎሶና።

ጳዉሎስ አሳስ ዛሮ እሚስ

³⁷ ዎታዳረት ጳዉሎሳ ባንታ ደእያሱዋ ገልሳና ሀንሽን፥ ጳዉሎስ ሻላቃኮ፥ “ታኒ ነዉ እስባ ኦዶ?” ያግስ። እ ጳዉሎሳኮ፥ “ኔኒ ግርከ ዶና ኤራይ?

³⁸ ኔኒ ሀይሳፈ ስን ቡቀ መድ ሸምፖ ዎዳ ኦይዱ ሙኩሉ አሳታ ኤክድ ባዞ ገልዳ ግብፀ ኡራ ግድኪ?” ያግስ።

³⁹ ሽን ጳዉሎስ፥ “ታኒ፥ ክልቅያን ደእያ ኤረትዳ ተርሰሴ ካታማን የለትዳ አይሁደ አስ። ሀያና ታና ኦድሳርኪ?” ያግስ።

⁴⁰ ሻላቃይ እያኮ፥ “ኦዳ” ያግን ጳዉሎስ ደ ቦላ ኤቅድ፥ አሳይ ስእ ጋና መላ ባ ኩሽያን ማልስ። አሳይ ስእ ግን እብራወ ዶናን ሀይሳዳ ያግስ፦