ሃዋሬታ ኦሱዋ 20 - ጌሻ ማፃፋ

ጳዉሎስ ማቀዶነንነ ግርከን

¹ ዋሶይ ዶችዳፐ ጉየ፥ ጳዉሎስ አማንያ አሳታ ፄግስድ ኤንታ ዞርዳፐ ጉየ፥ ሳሮድ ማቀዶነ ባናዉ ከይስ።

² ሄ ቢታራ አሸ ቃላ ኦድሸ አሳ ዳሮ ምንዳፐ ጉየ ግርከ ቢታ ብስ።

³ እ ያን ሄ አጌና ኡትድ፥ ማርካበራ ሶረ ባናዉ ቆፕድ ደእሽን፥ አይሁደት ባና ዎናዉ ኮየይሳ ኤርድ ማቀዶነራ ጉየ ስማናዉ ኮይስ።

⁴ ጳዉሎሳ ሞይዝዳይሳት ቤርያፐ ጳርሁሳ ናኣ ሶጳፅሮሳ፥ ተሰሎንቀፈ አርስፅሮኮሳነ ስኮንዱሳ፥ ዳርበፈ ጋዮሳ፥ ኢሰፐ ትክቆሳ፥ ፅሮፍሞሳነ ፅሞትዮሳ።

⁵ ሄሳት ስን ብድ ኑና ፅሮኣዳን ናጎሶና።

⁶ ኑኒ ኡይ ባልያ ቦንችዳፐ ጉየ፥ ፍልጵስዩሳፐ ማርካበራ ደንድድ፥ እቻሻን ጋላሳን ኤንታ ፅሮኣዳን ጋክድ ያን ላፑን ጋላስ ጋምእዳ።

ጳዉሎስ ፅሮኣዳን

⁷ ሳምንታፈ ኮይሮ ጋላሳን ኑኒ ኡይ መንናዉ ሺቅድ ደእሽን፥ ጳዉሎስ ዎንተ ባናዉ ቆፕዳ ግሾ፥ ኤንታዉ ቃላ ኦድሸ ግድ ብላሄ ጋካናዉ ኦዳ አዱስስ።

⁸ ኑኒ ሺቅድ ኡትዳ ፖቅያን ዳሮ ፖኦይ ደኤስ።

⁹ ኤዉፅኮሳ ጌተትያ እስ ናአተይ ማስኮተ ቦላ ኡትድ፥ ባና ዶግድ ስክስ። ጳዉሎስ ኦዳ አዱስዳ ዎደ ኤዉፅኮስ ስኮ ኤይድ ሄን ፖቅያፐ ኩንድድ ሀይቅዳይሳ አሳይ ደንስ።

¹⁰ ሽን ጳዉሎስ ዎድ፥ እያ ቦላ ጉፋንስ። እያ እድምድ፥ “እ ሀይቅቤና፥ ህርጎፍተ” ያግስ።

¹¹ ሄሳፈ ጉየ፥ ፑደ ፖቅያ ቦላ ከይድ ኡይ መንድ ምስ። ሳአይ ዎንታና ጋካናዉ አሳስ ኦድዳፐ ጉየ ደንድድ ብስ።

¹² ሄ ፓፅዳ ናአተ ሶ ኤፍድ ዳሮ ኡፋይትዶሶና።

ጳዉሎስ ኤፈሶናፐ ሞይዘትስ

¹³ ሽን ጳዉሎስ ባና ያፐ ሞካና መላ ኑስ ኦድዳ ግሾ፥ ካሰትድ ማርካብያኮ ብድ፥ አሶሳ ባናዉ ደንድዳ። አይስ ጊኮ፥ እ ቶሆን ባናዉ ቆፕዳ ግሾ ኑና ሄሳ ኪትስ።

¹⁴ እ ኑራ አሶሳን ጋሄትን ማርካብያን እያ ኤክድ ምፅልነ ብዳ።

¹⁵ ዎንተ ጋላስ ያፐ ደንድድ ማርካበን ክዮሳ ስንን ደእያ በሳ ጋክዳ፤ ቃስ ዎንተ ጋላስ ሳሞሳ ፕንድ ካልያ ጋላስ ምልፀ ጋክዳ።

¹⁶ ጳዉሎስ ኢሰን ዳሮ ጋምኦና ኤፈሶና ማታራ አናዉ ቆፕስ። ባዉ ዳንዳኤትኮ ጳንፀቆስፀ ባልያ ጋላስ የሩሳላመ ጋካናዉ ኤሶቴስ።

¹⁷ ጳዉሎስ ምልፀፐ ኤፈሶና ኪትድ ዎሳ ኬ ጭማታ ፄግስስ።

¹⁸ ዎሳ ኬ ጭማት እያኮ ይን፥ ኤንታኮ ሀይሳዳ ያግስ፦ “ታኒ ኢሰ ገልዳ ኮይሮ ጋላሳፐ ዶምዳ ህንተራ ደእዳ ዎደ ኡባን ዋና ደእዳኮ ህንተ ኤሬታ።

¹⁹ አይሁደት ዱላትድ ታ ቦላ መቶ ጋኮካ ታኒ አሽከተንነ ዳሮ አፉን ጎዳስ ኦስ።

²⁰ ዳባባንካ ህንተ ኬን ኬን ህንተና ታማርስሸ ህንተና ማድያባፐ እስባካ ፓጭሳብከ።

²¹ ታኒ አይሁደታስነ አይሁደ ግዶናይሳታስ ናጋራፐ ፆሳኮ ስማና መላነ ኑ ጎዳ የሱሳ አማናና መላ ማርካታስ።

²² “ያን ታና አይብ ጋካኔኮ ኤርከ፥ ሽን ሀእ ታኒ ጌሻ አያናስ ኪተታዳ የሩሳላመ ባይስ።

²³ ጌሻ አያናይ ቃሾይነ ዋየይ ታና ናገይሳ ካታማ ኡባን ታዉ ማርካትስ።

²⁴ ሽን ታ ዎ ፖላናዉነ ጎዳ የሱስ ክርስቶሳፐ ኤክዳ ኦሱዋ፥ ፆሳ አ ኬሀተ ዎንገላ ማርካተይሳ ፖላናዉ ታ ሸምፕዉ ፓናባዳ ታይባስ።

²⁵ “ታኒ ሀእካ ፆሳ ካዎተ ማርካታሸ ህንተ ኡባ ግዶን ዩያስ። ህዛፐ ጉየ፥ ህንተፈ ኦንካ ታና በኦናይሳ ኤራይስ።

²⁶ ሄሳ ግሾ፥ ህንተፈ እስ ኡራይ ይኮካ ታ ኦይሸቶናይሳ ሀች ህንተዉ ጌሻዳ ኦዳይስ።

²⁷ አይስ ጊኮ፥ ፆሳይ ኦናዉ ቆፕዳባ ኡባ ህንተዉ አይብባካ አሾና ኦዳስ።

²⁸ “ባ ናኣ ሱን ዎዝዳ ፆሳ ዎሳ ኬ ናግተ። ጌሻ አያናይ ህንተና ሀላቃ ኦድ ዶርዳ ዉድያስነ ህንተ ሁጵያስ ናገትተ።

²⁹ ታኒ ብዳፐ ጉየ፥ ዉድያስ ቃቶና ዎዛና ምኖ ሱመት ህንተ ግዶ ገላናይሳ ታኒ ኤራይስ።

³⁰ አማነይሳታ ባንታ ጌዶ ካለናዉ ዎርዶ ታማርስያ አሳት ህንተ ግዶፈ ደንዳና።

³¹ ሄሳ ግሾ፥ ታኒ ሄ ላይ ቃማነ ጋላስ አፉን ህንተና ሁጰን ሁጰን ምንዳይሳ ቆፕሸ ናገትተ።

³² “ሀእካ ህንተና ምንናዉነ ጌሻ አሳራ ላትሳናዉ ዳንዳእያ ፆሳስነ እያ አ ኬሀተ ቃላስ ህንተና ሀዳራ እማይስ።

³³ “ታኒ ኦደ ብራ ዎይኮ ዎርቃ ዎይኮ አፍላ አሞታብከ።

³⁴ ታኒ ታ ኩሸን ኦዳ ታናነ ታራ ደኤይሳታ ኮሽዳባ ማድዳይሳ ህንተ፥ ህንተ ሁጰን ኤሬታ።

³⁵ ህንተ ሀይሳዳ ዳቡርድ ኦሸ ዳቡራንቾታ ማዳናይሳነ ጎዳ የሱሲ፥ ‘ኤከይሳፈ እመይስ አንጀትዳይሳ’ ግዳ ቃላ ህንተ ቆፓናዉ በሰይሳ ታኒ ህንተና ኡባባን በሳስ” ያግስ።

³⁶ ጳዉሎስ ሄሳ ኦድ ኦንግድ ኤንታ ኡባራ ጉልባትድ ፆሳ ዎስስ።

³⁷ ኤንቲ ኡባይካ ጳዉሎሳ እድምድ ዬክድ ዬርዶሶና።

³⁸ እ ዛሪድ፥ “ታና በኤከታ” ያግዳ ቃላይ ኤንታ ዳሮ አዛንስ። ኤንቲ ማርካብያ ጋካናዉ እያ ሞይዝዶሶና።