ሃዋሬታ ኦሱዋ 2 - ጌሻ ማፃፋ

ጌሻ አያና ዎ

¹ ጰንፀቆስፀ ጋላሳይ ጋክዳ ዎደ አማንያ አሳ ኡባይ እስፈ እስ በሳን ሺቅድ ደኦሶና።

² ቆፖና ዎልቃማ ጎተዳ ጉምያ ጉንይ አኬኮና ሳሎፐ ይድ ኤንቲ ደእያ ኬ ኩምስ።

³ ቃስ ታማ ላጮ ዳንያ እንፃርሳት ኤንታዉ በንትሸ፥ ሻከት ሻከት ኤንታ ኡባ ቦላ ዎዶሶና።

⁴ ኤንቲ ኡባይ ጌሻ አያናን ኩምድ ዱማ ዱማ ዶናን ኦደታና መላ ጌሻ አያናይ ኤንታ ዳንዳእስን ሃሳያ ዶምዶሶና።

⁵ ሄ ዎደ ቢታ ኡባፈ ይዳ ፆሳስ ባቢያ አይሁደት የሩሳላመን ደኦሶና።

⁶ ሄ ጉን ስእዳ ዎደ ዳሮ አሳይ ሺቅዶሶና። አማንያ አሳይ ኤንታ ቃላን ኦደትሽን ስእዳ ግሾ፥

⁷ ማላለትድ፥ “ሀ ኦደትያ አሳ ኡባይ ጋልላ አሰ ግዶኮናዬ?

⁸ ያትን፥ ኑኒ፥ ኑ የለትዳ ቢታ ዶናን ኤንቲ ኦደትሽን ዋንድ ስአናዉ ዳንዳእዶ?

⁹ ኑኒ ጳርፀን፥ ሜዶናን፥ ኤላማን፥ ማሰጰፆመን ደኤይሳት፥ ይሁዳን፥ ቃጳዶቃን፥ ጳንፆሳን፥ ኢሰን፥

¹⁰ ፕርገን፥ ጵንፍለን፥ ግብፀን፥ ቃረና ማታን ደእያ ሊበን ደኤይሳታ። ኑፐ ባጋትካ ሮመፐ ይዳ አሳታ።

¹¹ አይሁደትነ አይሁደተ አማኖ ገልዳ አሳት፥ ቃርፄሳነ አራበ አሳት፥ ፆሳይ ኦዳ ግታ ኦሱዋ ኑ ቃላን ኦደትሽን ስኦስ” ያግዶሶና።

¹² ኡባይ ማላለትድ፥ ጋናባ ይድ፥ “ላ ሀይስ አይ ጉሴ?” ያግዶሶና።

¹³ ሽን ሀራት፥ “ሀይሳቲ ዎይነ ኡይድ ማትዶሶና” ያግድ ቀልቅስዶሶና።

ጰፅሮሳ ሃሳያ

¹⁴ ሽን ጰፅሮስ፥ ታማነ እስ ሀዋረታራ ደንድ ኤቅድ፥ ባ ቃላ ቁ ኦድ፥ ኤንታዉ ሀይሳዳ ያግድ ኦድስ፦ “አይሁደቶ፥ የሩሳላመን ደእያ ኡባቶ፥ ታኒ ኦደይሳ ስእተ።

¹⁵ ዎንታፈ ሄ ሳተ ግድያ ግሾ ህንተ ቆፐይሳዳ ሀ አሳት ማትቦኮና፤ ሄስ ህንተዉ ኤረቶ።

¹⁶ ሽን ሀይስ ሀንዳይ ናበይ እዩኤል ኦድዳይስ ፖለታና መላሳ።

¹⁷ “ ‘ፆሳይ፥ ዎድያ ዉርሰን ሀይሳዳ ሀናና ያጌስ፦ ታኒ አሳ ኡባ ቦላ ታ አያና ጉሳና። ህንተ አደ ናይትነ ማጫ ናይት፥ ትንብተ ኦዳና። ህንተ ያላጋት ቆንጨ በአና፤ ህንተ ጭማት አሙሆ አሙሀና።

¹⁸ ሄ ጋላሳታን ታና አማንያ አደ አይለታ ቦላነ ማጫ አይለታ ቦላ ታኒ ታ አያና ጉሳና፤ ኤንቲ ትንብተ ኦዳና።

¹⁹ ቃስ ታኒ ቦላ ሳሎን ኦራባ፥ ጋርሳ ሳአንካ ማላ በሳና። ሱይ፥ ታማይነ ዎልቃማ ጫጋናይ በንታና።

²⁰ ግታነ ቦንቾ ግድዳ ጎዳ ጋላሳይ ጋካናፐ ስን አው ማና፤ አጌን ሱ ዳናና።

²¹ ሄ ዎደ ሄሳዳ ሀናና፤ ጎዳ ሱን ፄግያ ኦንካ አታና’ ያግስ።

²² “እስራኤለ አሳቶ፥ ሀ ቃላ ስእተ። ናዝረተ የሱሳ ኦናተይ፥ ፆሳይ ህንተ ግዶን ኦዳ ዎልቃማ ኦሱዋንነ ማላታታን ህንተዉ ቆንጮይሳ ህንተ፥ ህንተ ሁጰን ኤሬታ።

²³ ፆሳ ካሰ ኤራንነ እያ ሸነን፥ የሱሲ ህንተዉ አድ እመትስ። ህንተ፥ ናጋራንቾት እያ ማስቃለ ቦላ ካቅድ ዎና መላ አድ እምደታ።

²⁴ ሽን ፆሳይ ሀይቆ ዎልቃ ድግድ እያ ደንስ። ሄሳ ግሾ፥ ሀይቆይ እያ ኦይካናዉ ዳንዳእቤና።

²⁵ ዳዊቲ እያባ ኦድሸ፥ “ ‘ታኒ ያርኮና መላ፥ ጎዳይ ታ ኡሻቻን ደኤስ። ጎዳ ኡባ ዎደ ታ ማታን በአይስ።

²⁶ ሄሳ ግሾ፥ ታ ዎዛናይ ኡፋይትስ፤ ታ እንፃርሳን ኡፋይስ ኩምስ፤ ሀይቅያ ታ አሳተይ ኡፋይሳን ዳና።

²⁷ አይስ ጊኮ፥ ታ ሸምፑዋ ስኦለን አጋካ። ቃስ ነ ጌሻ ናአ አሀ ዎቅሳካ።

²⁸ ኔኒ ታና ደኦ ኦገ ኤርሳዳሳ። ኔኒ ታራ ደኤይሳን ታ ኡፋይሳይ ኩመ ግዴስ’ ያግስ።

²⁹ “አሳዉ፥ ኑ አዋ ዳዊታባ ታ ህንተዉ ጌሻዳ ኦዳና። ዳዊቲ ሀይቅድ ሞገትስ፤ እያ ዱፎይ ሀች ጋካናዉ ኑ ማታን ደኤስ።

³⁰ ዳዊቲ ናበ ግድዳ ግሾ፥ ፆሳይ እያ ሼሻፐ እሱዋ እያ ካዎተ አራታ ቦላ ኡትሳናዉ እያዉ ጫቅዳ ጫቁዋ ኤሬስ።

³¹ ሄሳ ግሾ፥ ክርስቶሳ ደንዱዋ ስን ፄልድ፥ ‘እያ ሸምፖይ ስኦለን አትቤና፤ እያ አሳተይካ ዎቅቤና’ ግድ ኦድስ።

³² “ፆሳይ፥ ሀ የሱሳ ሀይቆፐ ደንዳይሳስ ኑኒ ኡባይ ማርካ።

³³ ሄሳ ግሾ፥ ፆሳይ ባራ ሃራና መላ ባፐ ኡሻቻ ባጋራ እያ ቁ ቁ ኦድ፥ እያዉ እማና ጌተትዳ ጌሻ አያና ኤክድ፥ ሀይሳ ህንተ ሀእ በኤይሳነ ስኤይሳ ኑ ቦላ ጉስስ።

^34-35 ጋሶይካ፥ ዳዊቲ ባ ሁጰን ሳሎ ብቤና ሽን ያግስ። “ጎዳይ፥ ታ ጎዳ፥ ‘ታኒ ነ ሞርከታ ነ ቶሆይ የያሶ ኦና ጋካናዉ ሀይሳን፥ ታፐ ኡሻቻ ባጋራ ኡታ’ ” ግስ። ያግስ።

³⁶ “ሄሳ ግሾ፥ ሀ ህንተ ማስቃለ ቦላ ካቅዳ የሱሳ፥ ፆሳይ ጎዳነ ክርስቶሳ ኦዳይሳ እስራኤለ አሳ ኡባይ ቱማ ኤሮ” ያግስ።

³⁷ አሳይ ጰፅሮስ ግዳይሳ ስእዳ ዎደ ባንታ ዎዛናን ቦሸትድ ጰፅሮሳነ ሀንኮ ሀዋረታኮ፥ “እሻቶ፥ ያትን ኑኒ አይ ኦኖ?” ያግዶሶና።

³⁸ ጰፅሮስ ኤንታኮ፥ “ህንተ ናጋራይ አቶ ጌተታና መላ ናጋራፐ ስሚድ፥ ህንተ እሶይ እሶይ የሱስ ክርስቶሳ ሱንን ፃማቀትተ። ፆሳይ እምያ ጌሻ አያና ህንተ ኤካና።

³⁹ ጋሶይካ ፆሳይ እማና ግዳ ኡፋይሳ ቃላይ ህንተዉ፥ ህንተ ናይታስነ ጎዳይ ኑ ፆሳይ ባኮ ፄግያ ሃሆን ደእያ ኡባሳ” ያግስ።

⁴⁰ ጰፅሮስ ኤንታዉ ሀራ ቃላካ ጉጅ ማርካትድ፥ “ሀ ዎድያ ጌላ አሳ ቦላ ያናዉ ደእያ ፕርዳፈ ህንተ ሁጵያ አሽተ” ያግድ ዞርስ።

⁴¹ ጰፅሮስ ኦድዳይሳ ኤክዳይሳት ፃማቀትዶሶና። ሄ ጋላስ ሄ ሙኩሉ ግድያ አሳይ አማንዶሶና።

⁴² ኤንቲ ሀዋረታ ትምርትያን፥ እስፈተን፥ ኡይ ሙሳንነ ዎሳን ምኖሶና።

⁴³ ሀዋረታ ኩሸን ዳሮ ኦራባይነ ማላት ኦሰትያ ግሾ አሳ ኡባይ ያይዶሶና።

⁴⁴ አማንዳ ኡባይ እስፈ ደኦሶና፤ ባንታዉ ደእያባ ኡባ እስፈ ሻከቶሶና።

⁴⁵ ኤንቲ ባንታዉ ደእያባ ባይዝድ ሚሽያ እሱዋስ እሱዋስ ኮሽዳ መላ ሻኮሶና።

⁴⁶ ኡባ ጋላስ እስ ዎዛናን ግድድ ፆሳ ኬን ሺቆሶና። ባንታ ኬን እሶይ እሱዋ ፄግድ ኡፋይሳንነ አሽከ ዎዛናን ካ ሞሶና።

⁴⁷ ፆሳ ጋላትሸ አሳ ኡባን ሳበትዶሶና። ጎዳይ አተይሳታ ጋላስ ጋላስ ኤንታ ቦላ ጉጄስ።