ሃዋሬታ ኦሱዋ 19 - ጌሻ ማፃፋ

ጳዉሎስ ኤፈሶናን

¹ አጵሎስ ቆሮንቶሳን ደእሽን፥ ጳዉሎስ ቆሞ ባጋራ አድ ኤፈሶና ብስ። ያን እስ እስ አማንያ አሳታ ደምስ።

² ኤንታኮ፥ “ህንተ አማንዳ ዎደ ጌሻ አያና ኤክደቲ?” ያግድ ኦይችስ። ኤንቲ፥ “አካይ፥ ኤክቦኮ፤ ሀር አቶሽን፥ ጌሻ አያን ደእያባካ ስእቦኮ” ያግዶሶና።

³ ጳዉሎስ ኤንታኮ፥ “ያትን፥ አይብን ፃማቀትደቲ?” ያግስ። ኤንቲ፥ “ኑኒ ዮሃንሳ ፅንቃተን ፃማቀትዳ” ያግድ ዛርዶሶና።

⁴ ጳዉሎስ፥ “ዮሃንስ ባፐ ጉየራ ያ የሱስ ክርስቶሳን አሳይ አማናና መላ አሳስ ኦድሸ፥ ናጋራፐ ስሞ በሲያ ፅንቃተን ፃማቅስ” ያግስ።

⁵ ኤንቲ ሄሳ ስእዳ ዎደ ጎዳ የሱስ ክርስቶሳ ታማረ ግዳናዉ ፃማቀትዶሶና።

⁶ ጳዉሎስ ባ ኩሽያ ኤንታ ቦላ ዎዳ ዎደ ጌሻ አያናይ ኤንታ ቦላ ዎን፥ ዱማ ዱማ ዶናን ኦደትዶሶና፤ ቃስ ትንብተ ኦድዶሶና።

⁷ ሄ በሳን ታማነ ናምአ ግድያ አሳት ደኦሶና።

⁸ ጳዉሎስ አይሁደ ዎሳ ኬ ገልድ፥ ፆሳ ካዎተባ ያዮና ፓላምሸነ ሎይ ቆንጭስሸ ኤንታራ ሄ አጌና ጋካናዉ ጋምእስ።

⁹ ሽን ኤንታፈ እሶት እሶት በ ግድድ ዳሮ አሳ ስንን ጎዳ ኦግያ ጫይድ አማኖና እፅዶሶና። ጳዉሎስ አማነይሳታ ኤንታፈ ሻክ ኤክድ ፅራኖሳ ጌተትያ ትምርተ ኬን ኡባ ጋላስ ኤንታ ታማርስስ።

¹⁰ ጳዉሎስ ናምኡ ላይ ጋካናዉ ቃላ ኦድስ። ሄሳ ግሾ፥ ኢሰን ደእያ አሳ ኡባይ፥ አይሁደትነ አይሁደ ግዶናይሳት ጎዳ ቃላ ስእዶሶና።

አስቀዋ ናይታ

¹¹ ፆሳይ ጳዉሎሳ ኩሸን ዎልቃማ ማላታታ ኦስ።

¹² ሄሳ ግሾ፥ አሳይ እያ አሳተ ቦችዳ ማራበ ዎይኮ ማኦ ሀርጋንቾታስ ኤፎሶና። ኤንትካ ፓፆሶና፤ ቱና አያናት ኤንታፈ ከዮሶና።

¹³ ቱና አያናታ ከስሸ ዩይያ አይሁደታፐ እሶት እሶት፥ “ጳዉሎስ ሳባክያ የሱሳ ሱንን ከይተ ግድ ህንተና ኪቶስ” ያግድ፥ ቱና አያናት ኦይክዳ አሳታ ቦላ ጎዳ የሱሳ ሱን ፄግዶሶና።

¹⁴ ካህነ ሀላቃ አስቀዋ ጌተትያ እስ አይሁደ አድያስ ሄሳ ኦያ ላፑን ናይት ደኦሶና።

¹⁵ ሽን ቱና አያናይ ኤንታኮ፥ “ታኒ የሱሳካ ጳዉሎሳካ ኤራይስ፥ ሽን ህንተ ኦናንቴ?” ያግስ።

¹⁶ ቱና አያን ኦይክዳ አደይ ኤንታ ቦላ ጉፕ ዎድ፥ ኤንታ ማዱንፅስድ፥ ሄ ኬፈ ካሎ ባቃታና ጋካናዉ ዎልቃምስ።

¹⁷ ኤፈሶናን ደእያ አይሁደትነ አይሁደ ግዶናይሳት ኡባይ ሄሳ ስእድ ዳሮ ያይዶሶና። ጎዳ የሱሳ ሱንይ ዳሮ ቦንቸትስ።

¹⁸ አማነይሳታፐ ዳሮት ባንታ ኦዳ ኢታ ኦሱዋ ፓፅሸነ ቆንጨን ኦድሸ ዮሶና።

¹⁹ ማሮታፐ ዳሮት ባንታ ማፃፋታ ሺሽድ አሳ ኡባ ስንን ፁግዶሶና። ሄ ማፃፋታ ጋትያ ታይቦይ እሻታሙ ሙኩሉ ብራ ሳንትመ ግድስ።

²⁰ ሄሳዳ ሀንድ ፆሳ ቃላይ ድጭሸነ ዳልግሸ ብስ።

ኤፈሶናን ኦሽ ከይስ

²¹ ሄስ ሀንዳፐ ጉየ ጳዉሎስ፥ “ታኒ የሩሳላመ ባ ስማዳ ሮመ ባናዉ በሴስ” ያግድ ማቀዶነራነ አካያራ አድ የሩሳላመ ባናዉ ቆፋ ቃችስ።

²² ቃስ ባና ማደይሳታፐ ናምአታ ፅሞትዮሳነ ኤራስፆሳ ማቀዶነ ኪትድ፥ ባዉ ኢሰን ጉ ዎደ ጋምእስ።

²³ ሄ ዎደ ጎዳ ኦግያ ግሾ ኤፈሶናን ዎልቃማ ካች ከይስ።

²⁴ እስ ብራ ኦያ ድመፅሮሳ ጌተትያ ኡራይ አርፀምስ ኤቃ ኬ ምስልያ ብራፐ ኦድ ዳሮ ዎ ደሜስ።

²⁵ ሄሳ ግሾ፥ ሄሳ መላ ኦሶ ኦይሳታ እስፈ ሺሽድ፥ “አሳዉ፥ ኑ ዱረተይ ሀ ኦሱዋን ግደይሳ ህንተ ኤሬታ።

²⁶ ሀይስ ጳዉሎስ፥ ‘አሳ ኩሸን ኦሰትዳይሳት ፆሳታ ግዶኮና’ ያግድ፥ ኤፈሶናንነ ጉ ቢታታፐ አትሽን፥ ኩመ ኢሰ ኡባን ደእያ ዳሮ አሳ ኦድ አማንዳይሳነ ባለዳይሳ ህንተ በእደታነ ስእደታ።

²⁷ መቶ ግድዳይ፥ ኑ ኦሶይ ካተይሳ ፃላላ ግዶናሽን፥ ኢሰነ ቢታ ኡባን ደእያ አስ ጎይንያ ግታ ፆሰ አርፀምስ ኬይ ቦንቸቶና አተይሳነ እ ግታተይ ኩንዳናይሳ” ያግስ።

²⁸ አሳይ ሄሳ ስእዳ ዎደ ሸነን ፁገትድ፥ “ኤፈሶና አርፀምሳ ግታ” ያግድ ዋስዶሶና።

²⁹ ሄ ዋሶይ ካታማ ኡባ ጋክስ። ጳዉሎሳራ ሄመትያ ማቀዶነ አሳታ፥ ጋዮሳነ አርስፅሮኮሳ ኦይክድ ጎችሸ ካሳ በሳ ዎፅዶሶና።

³⁰ ጳዉሎስ አሳይ ሺቅዳ በሳ ገላናዉ ኮይስ፥ ሽን አማነይሳት እያ ድግዶሶና።

³¹ ኢሰ ቢታ ሀላቃታፐ ጳዉሎሳ ላገ ግድዳ እሶት እሶት ጳዉሎሳኮ ኪትድ፥ “ካሳ በሳ ቆንጨን ከያዳ በንቶፋ” ግድ እያ ዎስዶሶና።

³² ሺቅዳ አሳስ ሀናናባይ ይስ፤ ዳርያ ባጋ አሳይ ሀር አቶሽን አይስ ሺቅዳኮ ኤሮና ግሾ፥ እሶይ እስባስ ዋስያ ዎደ ሀንኮይ ሀራባስ ዋሴስ።

³³ አይሁደት እስክንድረ ጌተትያ አድያ አድ በስን፥ እስ እስ አሳይ እ ጋናባ ኦድድ እያ ስን አዶሶና። እ አሳይ ስእ ጋና መላ ባ ኩሸን ማል በስድ፥ አሳስ ሞተታናዉ ኤቅስ።

³⁴ ሽን እስክንድረይ አይሁደ አስ ግድዳይሳ አሳይ ኤርዳ ዎደ ናምኡ ሳተ ግዳናይሳ መላ ኡባይ እስ ቃላን፥ “ኤፈሶና አርፀምሳ ግታ” ያግድ ዋስዶሶና።

³⁵ ዉርሰን፥ ካታማ ፃፈይ አሳ ስእ ኦድ፥ “ኤፈሶና አሳዉ፥ ኤፈሶና ካታማይ ግታ አርፀምስ ኤቃ ኬነ ሳሎፐ ዎዳ እ ሹቻ ምስልያ ናገይ ኤፈሶና አሳ ግደይሳ ኤሮናይ ኦኔ?

³⁶ ሀይሳ ካሽ ግያ አስ ባይና ግሾ፥ ህንተ ስእ ጋናዉነ ድርግድ አይኮ ኦና አጋናዉ በሴስ።

³⁷ ህንተ፥ ሀ አሳታ ኤቃ ኬ ሚሸ ካይሶቶናሽን ዎይኮ ኑ ፆሳታ ጫይቦናሽን ጮ ሀ አሳታ ኦይክድ ኤህደታ።

³⁸ ሄሳ ግሾ፥ ድመፅሮስነ እያራ ደእያ ኦሳንቾት አሳ ሞታናዉ ኮይኮ፥ ፕርዳ ኬይ ዶያ ደኤስ፤ ዳይናትካ ደኦሶና፤ ኤንቲ ሞታናዉ ዳንዳኦሶና።

³⁹ ሽን ህንተ ሀራ ኦዳ ኮይኮ፥ ሻንጎ ሺቆን ኦዳይ በኤቶ።

⁴⁰ ሄሳ ግዶና እፅኮ ሀች ሀንዳባስ ሮመ ካዎተይ ኑና ኦይቻና። ሀ ቡቀስ ጋሶይ ባይና ግሾ፥ ኑኒ ጋሶ ኦዳናዉ ዳንዳኦኮ”

⁴¹ ያግድ ሺቁዋ ላልስ።