ሃዋሬታ ኦሱዋ 17 - ጌሻ ማፃፋ

ጳዉሎስ ተሰሎንቀን

¹ ጳዉሎሳራነ ስላሰራ አምፍጶልሳራነ አጶሎናራ አድ ተሰሎንቀ ብዶሶና። ያን አይሁደ ዎሳ ኬ ደኤስ።

² ጳዉሎስ ካሰይሳዳ ያ ገልስ። ሄሳን ሄ ሳምንታ ፆሳ ቃላፐ አሳስ ኦድስ።

³ ክርስቶስ ዋየ ኤካናዉነ ሀይቆፐ ደንዳናዉ በሰይሳ ኤንታዉ ቆንጭስድ ኦድሸ፥ “የሱሲ ሀ ታኒ ህንተዉ ኦደይስ ክርስቶሳ” ያግስ።

⁴ ኤንታፈ እሶት እሶት ኦዳይ ቱማ ግደይሳ ማእድ ጳዉሎሳራነ ስላሰራ እስፍዶሶና። ሄሳዳካ፥ ፆሳ ጎይንያ ዳሮ ግርከ አሳይነ ዳሮ ቦንቸትዳ ማጫሳትካ ኤንታራ እስፍዶሶና።

⁵ ሽን አይሁደት ቃናትድ እስ እስ ኦሶይ ባይና ኢታ አሳታ ኦገፐ ሺሽዶሶና። ካታማን ቡቀ ከስዶሶና፤ ጳዉሎሳነ ስላሰ አሳስ አድ እማናዉ ኮይድ ያሶና ኬ ተቅዶሶና።

⁶ ጳዉሎስነ ስላ ኤንታዉ በንቶና እፅን፥ ያሶናነ እስ እስ አማነይሳታ ካታማ ሀላቃታኮ ጎች ኤፍድ፥ “ሀይሳቲ ቢታ ኡባ ቡቀይሳት ሀእ ኑኮ ይዶሶና።

⁷ ያሶን ኤንታ ባ ሶን ዎስ። ሀይሳቲ፥ ‘የሱሳ ጌተትያ ሀራ ካዎይ ደኤስ’ ግድ ቄሳረ ኪታ መንሶና” ያግድ ቁ ግዳ ቃላን ኦድዶሶና።

⁸ ሺቅዳ አሳይነ ካታማ ሀላቃት ሄሳ ስእድ ሀናናባ ይዶሶና።

⁹ ሀላቃት ያሶናነ ሀራታ ዋሰራ ብልዶሶና።

ጳዉሎስ ቤርያን

¹⁰ አማነይሳት ጳዉሎሳነ ስላሰ ቃማራ ቤርያ የድዶሶና። ቤርያ ጋክድ፥ አይሁደ ዎሳ ኬ ገልዶሶና።

¹¹ ቤርያ አሳይ ተሰሎንቀ አሳፐ አዳ ሱረታ። ኤንቲ ቃላ ኩመ ዎዛናፐ ኤክዶሶና፤ ጳዉሎስ ግዳይስ ቱማ ግደይሳ ሻክ ኤራናዉ ጋላስ ጋላስ ጌሻ ማፃፋታ ፕልጎሶና።

¹² ሄሳ ግሾ፥ ኤንታፈ ዳሮት፥ ግርከታፐካ ቦንቸትዳ ዳሮ ማጫሳትነ ዳሮ አደት አማንዶሶና።

¹³ ሽን ተሰሎንቀን ደእያ አይሁደት ጳዉሎስ ፆሳ ቃላ ቤርያንካ ኦድዳይሳ ስእዳ ዎደ ቤርያ ይድ አሳ ቡቅዶሶና።

¹⁴ ሄሳፈ ጉየ፥ አማነይሳት ኤለስድ ጳዉሎሳ አባ ማት የድዶሶና። ሽን ስላሰይነ ፅሞትዮስ ቤርያን አትዶሶና።

¹⁵ ጳዉሎሳ ሞይዝዳ አሳት አቴና ጋዶሶና። ሄ አሳት ስላሰይነ ፅሞትዮስ ባንታዉ ዳንዳኤትዳ መላ ኤለስድ ባኮ ያና መላ ጳዉሎስ ኪትዳ ኪታ ኤክድ ቤርያ ስምዶሶና።

ጳዉሎስ አቴናን

¹⁶ ጳዉሎስ አቴናን ስላሰነ ፅሞትዮሳ ናግሸ፥ ካታማን ኤቅ ኩምዳይሳ በእድ ይሎትስ።

¹⁷ ሄሳ ግሾ፥ አይሁደ ዎሳ ኬን አይሁደታራነ ፆሳ ጎይንያ አይሁደ ግዶና አሳራ ቃስ ባራ ጋሄትያ አሳራ ኡባ ጋላስ ፓላሜስ።

¹⁸ ኤፕቆሮሰነ እስቶይከ ጌተትያ ጩጋታፐ እስ እስ ኤራንቾት ጳዉሎሳራ ፓላምዶሶና። ኤንታፈ እሶት እሶት፥ “ሀ ዮያማይ አይ ኦዳናዉ ኮዪ?” ያግዶሶና። ሀራት ጳዉሎስ የሱሳባነ ሀይቆፐ እ ደንድዳይሳ ባንታዉ ኦድዳ ግሾ፥ “ኦራ ፆሳታባ ኦድያ ዳኔስ” ያግዶሶና።

¹⁹ ጳዉሎሳ ኦይክድ አርዮስፓጎሳ ጌተትያ ሺቆ በሳ ኤፍድ፥ “ሀ ኔኒ ታማርስያ ኦራባይ አይበኮ ኑና ኤርስኪ?

²⁰ አይስ ጊኮ፥ ኔኒ ኑስ ኦራባ ኦዳሳ፤ ህዛ ሄስ አይበኮ ኑኒ ኤራናዉ ኮዮስ” ያግዶሶና።

²¹ አቴና አሳ ኡባይነ ያን ደእያ እማ አሳይ ኦራባ ኦደቶናነ ስኦና ፔኦኮና።

²² ጳዉሎስ አርዮስፓጎሳ ስንን ኤቅድ፥ “አቴና አሳቶ፥ ፆሳታስ ኡባባን ህንተ ዳሮ ያየይሳ ታኒ በአይስ።

²³ ታኒ ህንተ ካታማራ ዩያሸ ህንተ ጎይንያ በሳታ በእያ ዎደ፥ ‘ኤረቶና ፆሳስ’ ጌተትድ ፃፈትዳ ያርሾ በሳ ደማስ። ሀ ህንተ ኤሮናሽን ጎይነይሳ ታኒ ህንተዉ ኦዳይስ።

²⁴ ሳአነ ሳአን ደእያ ኡባባ መዳ ፆሳይ፥ ሳሎነ ሳአ ጎዳይ፥ አስ ኬፅዳ ኬን ዴና።

²⁵ እ ደኦ፥ ሸምፖነ ኡባባ አሳ ኡባስ እምያ ግሾ ፓጭ ደእያ አሳዳ አሳ ማደ ኮየና።

²⁶ ፆሳይ አሳ ኮቸ ኡባ እስ አድያፈ መድ ቢታ ኡባን ዎስ። ያትድ ኤንቲ ዳና ዎድያስነ በሳስ ዛዋ እሚስ።

²⁷ እ ሄሳ ኦዳይ አስ እያ ኮያና መላነ ፕልግድ ደማና መላሳ። ሀንኮካ እ ኑፐ ጌምቤና።

²⁸ ህንተፈ እስ እስ የፀይሳት፥ ‘ኑኒ እያ ናይታ’ ግዳይሳዳ፥ ‘ኑኒ እያን ፓፃ ደኦስ፥ ቃፆስ።’

²⁹ ህዛ፥ ኑኒ ፆሳ ናይታ ግድያ ግሾ፥ ‘ፆሳይ አሳ ሂላተንነ ቆፋን ዎርቃፈ ዎይኮ ብራፐ ዎይኮ ሹቻፈ ኦሰትዳባ ዳኔስ’ ያግድ ቆፓናዉ በሰና።

³⁰ ሄሳ ግሾ፥ ፆሳይ በን ዎደ አሳይ ኤሮና ኦዳይሳ አግድ አስ። ሽን ሀእ ኡባ በሳን ደእያ አሳይ ናጋራፐ ስማና መላ ኪቴስ።

³¹ አይስ ጊኮ፥ ፆሳይ ባ ዶርዳ አድያን ሳአን ደእያ አሳ ኡባ ቦላ ፅሎ ፕርዳ ፕርዳናዉ ቃማ ጊግስ ዎስ። እያ ሀይቆፐ ደንድ ሄሳ አሳ ኡባስ ቱማይስ” ያግስ።

³² ኤንታፈ እስ እስ አሳት ሀይቆፐ ደንዶባ ጳዉሎሳፐ ስእድ፥ እያ ቦላ ቀልቅስዶሶና። ሽን ሀራት፥ “ኑኒ ሄሳ ኔፐ ጉጅድ ስአናዉ ኮዮስ” ያግዶሶና።

³³ ሄሳ ግሾ፥ ጳዉሎስ ኤንታ ግዶፈ ከይስ።

³⁴ ሽን እስ እስ አደት ጳዉሎሳራ ጋከትድ አማንዶሶና። ኤንታ ግዶፈ አርዮስፓጎሳን ሺቁዋን ደእያ ድዮናስዮሳ ጌተትያ አደይ፥ ዳማርሶ ጌተትያ እስ ማጫስያነ ሀራት ደኦሶና።