ሃዋሬታ ኦሱዋ 16 - ጌሻ ማፃፋ

ፅሞትዮስ ጳዉሎሳራነ ስላሰራ ጋሄትስ

¹ ጳዉሎስ ዳርበነ ልስፅራ ብስ። ያን ፅሞትዮሳ ጌተትያ አማንያ አስ ደኤስ። እያ አይያ አማንያ አይሁደ ማጫስ፥ እያ አዋይ ግርከ አስ።

² ልስፅራንነ እቆንዮነን ደእያ አማነይሳት ፅሞትዮሳባ ሎይድ ማርካትዶሶና።

³ ጳዉሎስ ፅሞትዮሳ ባራ ኤፋናዉ ኮይድ፥ እያ አዋይ ግርከ አስ ግድዳይሳ ሄ በሳን ደእያ አይሁደ ኡባይ ኤርያ ግሾ እያ ቃፃርስ።

⁴ ኤንቲ ካታማታራ ብሸ የሩሳላመን ደእያ ሀዋረትነ ጭማት ዎዳ ህግያ አማነይሳት ናጋና መላ ኤንታዉ ኦድሸ አዶሶና።

⁵ ሄሳ ግሾ፥ ዎሳ ኬት አማኖን ምንሸ፥ ታይቦንካ ጋላስ ጋላስ ዳር ዳር ብዶሶና።

ጳዉሎስ ማቀዶነ ባናዉ ፄገትስ

⁶ ኢሰን ቃላ ኦዶና መላ ጌሻ አያናይ ኤንታ ድግዳ ግሾ፥ ፕርገራነ ጋላትያ ቢታራ አዶሶና።

⁷ ኤንቲ ሚሰ ዛዋ ጋክዳ ዎደ ብታነ ባናዉ ኮይዶሶና። ሽን የሱሳ አያናይ ኤንታ ድግስ።

⁸ ሄሳ ግሾ፥ ኤንቲ ሚሰ ማታራ አሸ ፅሮኣዳ ዎዶሶና።

⁹ ጳዉሎስ ቃማ ቆንጨን እስ ማቀዶነ አስ ባኮ፥ “ማቀዶነ ፕናዳ ኑና ማዳርክ” ያግሸ ኤቅድ ዎስሽን በእስ።

¹⁰ ቆንጨ እ በእዳፐ ጉየ ኤለስድ ኑኒ ማቀዶነ ባናዉ ኮይዳ። አይስ ጊኮ፥ ዎንገላ ያን ደእያ አሳስ ኦዳናዉ ፆሳይ ኑና ፄግዳይሳ ኤርዳ።

ሊድያ ክርስቶሳ አማናሱ

¹¹ ፅሮኣዳፐ ደንድድ ማርካበን ገልድ ሳሞትራቀ ብዳ፥ ዎንተ ጋላስ ናጱለ ብዳ።

¹² ያፐ ደንድድ ማቀዶነ ቢታን ደእያ ፍልጵስዩሳ ካታማ ብዳ። ፍልጵስዩስ ሮመ አሳይ ደእያ ካታማ። ኑኒ ሄ ካታማን ጉ ጋላስ ኡትዳ።

¹³ ሳምባታ ጋላስ ካታማፐ ጋፃን ሻፋ ዶናን አይሁደት ፆሳ ዎስያ በሲ ደኤይሳ ኤርድ ያ ብዳ። ሄ በሳን ሺቅዳ ማጫሳስ ቃላ ኦድዳ።

¹⁴ ኑና ስእያ አሳፐ እስ ሊድያ ጌተትያ ትያትሮና ካታማፐ ይዳ፥ ፆሳ አማንዳ ዞኦ አፍላ ዛልእያ፥ ማጫስያ ደአዉሱ። ጳዉሎስ ኦደይሳ እያ ስአና መላ ፆሳይ እ ዎዛና ዶይስ።

¹⁵ ሊድያ ባ ሶ አሳራ እስፈ ፃማቀትዳፐ ጉየ ኑኮ፥ “ህንተ ታና ጎዳ ቱማ አማናሱ ጊኮ ታ ሶ የተ” ጋዳ ምንዳ ዎሳሱ።

ጳዉሎስነ ስላሰይ ቃሸትዶሶና

¹⁶ ኑኒ ፆሳ ዎስያ በሳ ብሽን ኢታ አያናይ እ ቦላ ደእድ ማሮያ እስ ጌላኦ ጋንዶይ ኑራ ጋሄታሱ። እያ ካያዳ ዳሮ ሚሸ ባ ጎዳታስ ኤሀዉሱ።

¹⁷ ጳዉሎሳነ ኑና ካላዳ፥ “ሀይሳቲ ኡባፈ ቦላ ፆሳ አይለታ! ኤንቲ ህንተ አታና ኦገ ኦደይሳታ” ጋዳ ዋሳሱ።

¹⁸ ኡባ ጋላስ ሄሳዳ ጋዉሱ። ሽን ጳዉሎስ ይሎትድ ጉየ ስሚድ፥ ሄ አያና፥ “የሱስ ክርስቶሳ ሱንን ኔኒ ኢፐ ከያ” ግድ ኪትስ። ኢራካ ኢታ አያናይ ኢፐ ከይ አግስ።

¹⁹ ሽን እ ጎዳት ባንታዉ ሚሸ ደምያ ኦገይ ይዳይሳ በእድ፥ ጳዉሎሳነ ስላሰ ኦይክድ፥ ዳባባ ዳይናታ ስን ጎች ኤፍዶሶና።

²⁰ ዳይናታ ስን ኤንታ ኤፍድ፥ “ሀይሳቲ አይሁደ አስ ግድሸ ኑ ካታማ አሳ ዳሮ ዋይሶሶና።

²¹ ኑኒ ሮመ ቢታ አስ ግድሸ ኤካናዉነ ኦናዉ ዎጋ ግዶናባ ታማርሶሶና” ያግዶሶና።

²² አሳይ እስ ባጋ ግድድ፥ ጳዉሎሳ ቦላነ ስላሰ ቦላ ደንድዶሶና። ዳይናት ኤንታ ማኡዋ ቃርድ ፃምአን ሾጫና መላ ኪትዶሶና።

²³ ኤንታ ዳሮ ዋዳፐ ጉየ፥ ቃሾ ኬ ገልስዶሶና። ቃሾ ኬ ናገይስካ ኤንታ ምን ናጋና መላ ኪትዶሶና።

²⁴ ቃሾ ኬ ናገይስ ሄ ኪታ ኤክድ፥ ጳዉሎሳነ ስላሰ ቃሾ ኬስ ቆልአ ገልስስ። ኤንታ ቶሁዋ ዱፅስ።

²⁵ ሽን ግድ ብላሄ ግድያ ዎደ ጳዉሎሳራነ ስላሰራ ዎስሸነ ማዝሙረ የፅሸ ፆሳ ጋላቶሶና። ቃሾ ኬን ደእያ ሀራ አሳትካ ኤንቲ ግያባ ስኦሶና።

²⁶ ቆፖና ቃሾ ኬ ባሶይ ቃፃና ጋካናዉ ቢታ ቃፆይ ሀንስ። ሄ ሳተንካ ፐንገ ኡባይ ዶየትስ፤ ቃሸትዳ አሳ ኡባ ሳንላታይ ብርሸት ዎስ።

²⁷ ቃሾ ኬ ናገይስ ስኮፈ ባርክዳ ዎደ ቃሾ ኬ ፐንገ ኡባይ ዶየትዳይሳ በእድ ቃሾ አሳይ ከስ ኤክ ብዳባ ዳንን ባና ዎናዉ ማሸ ኤክስ።

²⁸ ሽን ጳዉሎስ ቃላ ቁ ኦድ “ኑ ኡባይ ሀይሳን ደእያ ግሾ ኔኒ ነና ቆሆፓ” ያግስ።

²⁹ ቃሾ ኬ ናገይስ ፆምፐ ዎስ ኤክድ ኤለስድ ጋ ዎፅስ። ኮኮርሸ ጳዉሎሳ ስንንነ ስላሰ ስንን ጉፋንስ።

³⁰ ኤንታ ካረ ከስድ፥ “ታ ጎዳቶ፥ ታኒ አታናዉ አይ ኦናዉ በሲ?” ያግስ።

³¹ ጳዉሎሳራነ ስላሰራ እያኮ፥ “ጎዳ የሱስ ክርስቶሳ አማና፤ ኔራነ ነ ሶ አሳራ አታና” ያግዶሶና።

³² ኤንቲ እያስነ እያ ሶን ደእያ ኡባስ ጎዳ ቃላ ኦድዶሶና።

³³ ቃማ ሄ ሳተንካ ቃሾ ኬ ናገይስ ኤንታ ኤፍድ ኤንታ ማዱን ሜጭስ። ኤለስድ ባ ሶ አሳ ኡባራ ፃማቀትስ።

³⁴ ጳዉሎሳነ ስላሰ ባ ሶ ኤፍድ ኤንታዉ ካ አስ። እ ባ ሶ አሳ ኡባራ ፆሳ አማንዳ ግሾ ኡፋይትስ።

³⁵ ሳእ ዎንትን ዳይናት፥ “ሄ አሳታ ብላ” ያግድ ዎታዳረታ ሀላቃታ እያኮ ኪትዶሶና።

³⁶ ቃሾ ኬ ናገይስ፥ “ህንተ ብለታና መላ ዳይናት ኪትዶሶና። ህዛ፥ ከይድ ሳሮ ቢተ” ያግድ ሄ ኪታ ጳዉሎሳስ ኦድስ።

³⁷ ሽን ጳዉሎስ፥ “ኑኒ ሮመ አስ ግድሽን ኤንቲ ኑና ፕርድ ባይና አሳ ስንን ዋድ፥ ቃሾ ኬን የግዶሶና። ሀእ ኑና ጌማን ከይድ ቦ ጎና? ሀነና፥ ኤንቲ ባንታ ሁጰን ይድ ኑና ከሶ” ያግስ።

³⁸ ዎታዳረ ሀላቃት ዳይናታስ ሄሳ ኦድን፥ ጳዉሎሳራነ ስላሰራ ሮመ ቢታ አሰ ግድዳይሳ ስእዳ ዎደ ያይዶሶና።

³⁹ ሄሳ ግሾ፥ ዳይናት ይድ ኤንታኮ፥ “ኑኒ ህንተና ቆህዳ” ግዶሶና። ቃሾ ኬፈ ካረ ኤንታ ከስድ፥ ካታማፐ ከይድ ባና መላ ዎስዶሶና።

⁴⁰ ጳዉሎሳራነ ስላሰራ ቃሾ ኬፈ ከይድ ሊድያ ሶ ብዶሶና። ያን አማነይሳታራ ጋከትድ ኤንታ ምንድ ከይድ ብዶሶና።