ሃዋሬታ ኦሱዋ 15 - ጌሻ ማፃፋ

የሩሳላመ ሺቁዋ

¹ እስ እስ አሳት ይሁዳፐ አንፆከ ብድ፥ “ሙሰ ዎጋ ህንተ ቃፃረቶና እፅኮ አታናዉ ዳንዳኤከታ” ግድ አማነይሳታ ታማርሶ ዶምዶሶና።

² ሄስ ጳዉሎሳነ ባርናባሳ ኤንታራ ዳሮ ፓላማናዳነ ካጫናዳ ኦስ። ሄሳ ግሾ፥ አንፆከን ደእያ እስ እስ አሳት ጳዉሎሳራነ ባርናባሳራ የሩሳላመ ብድ ሀዋረታራነ ጭማታራ ጋሄትድ ሄ ኦዳ ብላናዉ ቆፋይ ቃሸትስ።

³ ዎሳ ኬይ ኤንታ ኪትን ብዶሶና። ኤንቲ ስሮፍንቀ ሳማረራ አሸ አይሁደ ግዶናይሳት ፆሳኮ ዋንድ ስምዳኮ ኦድዶሶና። ሄስ አማነይሳታ ኡባ ዳሮ ኡፋይስስ።

⁴ ኤንቲ የሩሳላመ ጋክዳ ዎደ ዎሳ ኬይ፥ ሀዋረትነ ጭማት ኤንታ ሞክዶሶና። ፆሳይ ባንታራ ኦዳባ ኡባ ኦድዶሶና።

⁵ ሽን ፋርሳወታ ባጋፈ አማንዳ እስ እስ አሳት ደንድ ኤቅድ፥ “አይሁደ ግዶናሽን አማንዳ አሳት ቃፃረታናዉነ ሙሰ ህገ ናጋናዉ በሴስ” ያግዶሶና።

⁶ ሀዋረትነ ጭማት ሄሳ ዞረታናዉ ሺቅዶሶና።

⁷ ዳሮ ዞረትዳፐ ጉየ፥ ጰፅሮስ ደንድ ኤቅድ፥ “ታ እሻቶ፥ አይሁደ ግዶናይሳት ዎንገላ ቃላ ታ ዶናፐ ስእድ አማናና መላ ካሰትድ ታና ፆሳይ ህንተ ግዶፈ ዶርዳይሳ ህንተ ኤሬታ።

⁸ አሳ ዎዛና ኤርያ ፆሳይ ጌሻ አያና ኑስ እምዳይሳዳ ኤንታዉካ እምድ ቱማይስ።

⁹ አማኖን ኤንታ ዎዛና ጌሽዳ ግሾ ኑ ግዶንነ ኤንታ ግዶን ዱማተ ዎቤና።

¹⁰ ሄሳ ግሾ፥ ኑ አዋትነ ኑኒ ቶካናዉ ዳንዳእቦና ቃምባራ አማነይሳታ ሞርገን ዎድ ሀእ አይስ ህንተ ፆሳ ፓጨቲ?

¹¹ ጎዳ የሱስ ክርስቶሳ አ ኬሀተን ኤንቲ አትዳይሳዳ ኑካ አትዳይሳ አማኖስ” ያግስ።

¹² አሳይ ስእ ግድ፥ ባርናባስነ ጳዉሎስ አይሁደ ግዶና አሳ ግዶን ባንታ ባጋራ ፆሳይ ኦዳ ማላታታነ ኦራባ ኡባ ኦድሽን ስኦሶና።

¹³ ኤንቲ ሃሳያ ኦንግዳፐ ጉየ ያይቆብ፥ “እሻቶ፥ ታ ገይሳ ስእተ።

¹⁴ ፆሳይ አይሁደ ግዶናይሳታ ግዶፈ ባ አሰ ዶራናዉ ኮይድ ኤንታና ኮይሮ ዋትድ ቆፕዳኮ ስሞን ኦድስ።

¹⁵ ናበታ ቃላይ ሀይሳራ እስኖ። ጌሻ ማፃፋን፥

¹⁶ “ ‘ሀይሳፈ ጉየ፥ ታኒ ስማና፥ ኩንድዳ ዳዊታ ካዎተ ደንና። ላለትዳ ኬካ ዛራ ኤሳና።

¹⁷ አትዳ አሳ ኡባይ ታኮ ያና፥ ታኒ ፄግዳ አይሁደ ግዶና አሳ ኡባይ ታና ኮያና።

¹⁸ በንፐ ዶማዳ ሄስ ኤረታና መላ ኦዳ ፆሳይ፥ ታኒ ያጋይስ’ ያጌስ።

¹⁹ “ሄሳ ግሾ፥ ታ ቆፋይ ፆሳኮ ስምያ አይሁደ ግዶናይሳታ ኑኒ ዋይሶናኮ ሎኦ።

²⁰ ሽን ኤንቲ ኤቃስ ያርሸትድ ቱንዳባ ሞና መላ፥ ላይማቶና መላ፥ ባዉታ ሞና መላነ ሱ ኡዮና መላ ኤንታዉ ኑኒ ዳብዳበ ፃፋናዉ ኮሼስ።

²¹ ሙሰ ህገይ በንፐ ዶምድ ሳምባታን ሳምባታን አይሁደ ዎሳ ኬታን ናባበትሸ ካታማ ኡባን ሳባከቴስ” ያግስ።

²² ሄሳፈ ጉየ፥ ሀዋረትነ ጭማት ዎሳ ኬ አሳ ኡባራ እስፈ ባንታ ግዶፈ ጉ አሳታ ዶርድ ጳዉሎሳራነ ባርናባሳራ አንፆከ የዳናዉ ቆፋ ቃችዶሶና። ኤንቲ ዳሮ ቦንቸትዳ ናምኡ አሳታ ባርሳባሳ ጌተትያ ይሁዳነ ስላሰ ዶርዶሶና።

²³ ሀይሳዳ ጌተትድ ፃፈትዳ ዳብዳበ ኤንታ ቦላ የድዶሶና፦ “ኑኒ ሀዋረትነ ጭማት ህንተ እሻት፥ አንፆከን፥ ሶረንነ ክልቀን ደእያ አይሁደ ግዶና እሻታስ ኑ ሳሮዋ ኪቶስ።

²⁴ “ኑኒ ኪቶና አሳት ኑ ግዶፈ ብድ፥ ‘ህንተ ቃፃረታናዉነ ህግያ ናጋናዉ በሴስ’ ግድ፥ ህንተና ዋይስዳይሳነ ይሎይዳይሳ ስእዳ።

²⁵ ኑኒ ዶስያ ባርናባሳነ ጳዉሎሳ ዶረትዳ አሳታራ እስፈ ህንተኮ ኪታናዉ እስ ዎዛናን ኑ ቆፋ ቃችዳ።

²⁶ ኤንቲ ኑ ጎዳ የሱስ ክርስቶሳ ግሾ ባንታ ደኡዋ አድ እምዶሶና።

²⁷ ሄሳ ግሾ፥ ኑኒ ፃፍዳይሳ ኤንቲ ባንታ ዶናን ጉጅድ ህንተዉ ኦዳና መላ ይሁዳነ ስላሰ ኪትዳ።

²⁸ “ሀ ኮሸይሳታፐ አትሽን፥ ሀራ ቶሆ ህንተና ቶሶና መላ ኑነ ጌሻ አያናይ ኦዳ ቃችዳ።

²⁹ ኤቃስ ያርሸትድ ቱንዳባ ሞፕተ፥ ሱ ኡዮፕተ፥ ባዉታ ሞፕተ፥ ላይማቶፕተ። ሀ ኡባፈ ህንተ ሁጵያ ናግኮ ህንተ ሎኦባ ኦታ። ህዛ፥ ሳሮ ደእተ” ያግዶሶና።

³⁰ ሄሳ ግሾ፥ ኪተትዳይሳት ሞይዘትድ አንፆከ ብድ አማንያ አሳ ሺሽድ፥ ዳብዳበ እምዶሶና።

³¹ ኤንቲ ሄ ምንያ ዳብዳብያ ናባብዳ ዎደ ኡፋይትዶሶና።

³² ቃስ ይሁድነ ስላሰይ ባንታ ሁጰን ናበ ግድያ ግሾ አማነይሳታ ሎይ ዞርድ ምንዶሶና።

³³ ኤንቲ አንፆከን ጉ ጋላስ ኡትዳፐ ጉየ እሻት ሎኦራ ሞይዝን ባንታና ኪትዳይሳታኮ ስምዶሶና።

³⁴ [ሽን ስላሰይ ያን አታናዉ ኮይስ]።

³⁵ ቃስ ጳዉሎስነ ባርናባስ ሀራ ዳሮ አሳታራ እስፈ ጎዳ ቃላ ታማርስሸነ ዎንገላ ኦድሸ አንፆከን ጋምእዶሶና።

ጳዉሎሳነ ባርናባሳ ሻከተ

³⁶ ጉ ጋላሳፐ ጉየ ጳዉሎስ ባርናባሳኮ፥ “ኑኒ ጎዳ ቃላ ኦድዳ ካታማ ኡባን አማነይሳት ዋንድ ደእያኮ ጉየ ስምሸ ፆሞስ በኦስ” ያግስ።

³⁷ ባርናባስ ማርቆሳ ጌተትያ ዮሃንሳ ባንታራ ኤፋናዉ ኮይስ።

³⁸ ሽን ጳዉሎስ ማርቆሳ ባንታራ ኤፋናዉ ኮይቤና። ጋሶይካ፥ እ ጵንፍለን ሻከትድ ኤንታራ ኦናዉ ብቤና።

³⁹ ኤንታ ግዶን ኢታ ኦሽ ከይን እሶይ እሱዋፈ ሻከትዶሶና። ባርናባስ ማርቆሳ ኤክድ ማርካበራ ቆጵሮሳ ብስ።

⁴⁰ ሽን ጳዉሎስ ስላሰ ዶርስ፤ አማነይሳት ጳዉሎሳ ፆሳ አ ኬሀተስ ሀዳራ እምዳፐ ጉየ፥ እ ከይድ ብስ።

⁴¹ ያትድ፥ ዎሳ ኬታ ምንሸ ሶረራነ ክልቅያራ አስ።