ሃዋሬታ ኦሱዋ 14 - ጌሻ ማፃፋ

ጳዉሎስነ ባርናባስ እቆንዮነን

¹ ካሰይሳዳካ፥ ጳዉሎስነ ባርናባስ እቆንዮነን አይሁደታ ዎሳ ኬ ገልድ ዳሮ አይሁደትነ አይሁደ ግዶናይሳት አማናና ጋካናዉ ቃላ ኦድዶሶና።

² ሽን አማንቦና አይሁደት፥ አይሁደ ግዶናይሳታ ዎዛና ላምድ እሻታ ቦላ ደንዶሶና።

³ ሀዋረት ያን ዳሮ ዎደ ጋምእዶሶና። ኤንቲ ያዮና ጎዳባ ኦድዶሶና። ጎዳይ ማላታታነ ኦራባ ኤንቲ ኦና መላ ኤንታዉ ማታ እምድ፥ እ ባ አ ኬሀተ ቃላይ ቱማ ግደይሳ ቆንጭስስ።

⁴ ሽን ሄ ካታማ አሳይ ሻከትድ፥ ባጋይ አይሁደታራ ባጋይ ቃስ ሀዋረታራ ግድስ።

⁵ አይሁደ ግዶናይሳትነ አይሁደት ባንታ ሀላቃታራ እስፈ ግድድ ሀዋረታ ቆሀናዉነ ሹቻን ጫዳናዉ ኮይዶሶና።

⁶ ሀዋረት ሄሳ ኤርድ፥ ልስፅራነ ዳርበ ጌተትያ ልቃኦና ካታማታነ ኤንታ ሄራን ደእያ ቢታ ባቃትዶሶና።

⁷ ያን ዎንገላ ኦድዶሶና።

ጳዉሎስነ ባርናባስ ልስፅራንነ ዳርበን

⁸ የለቶሳፐ ዶምድ ናምኡ ቶሆይ ዎቢን ሄመት ኤሮና እስ አደይ ልስፅራን ደኤስ።

⁹ ሄ አደይ ጳዉሎስ ኦድሽን ኡትድ ስኤስ። ጳዉሎስ እያ ትሽ ኦ ፄልያ ዎደ ፓፃናዉ እያዉ አማኖይ ደኤይሳ በእድ፥

¹⁰ ባ ቃላ ቁ ኦድ፥ “ስት ጋዳ ነ ቶሁዋን ኤቃ” ያግስ። ያትን፥ ጉፕ ደንድ ኤቅድ ሄመ ዶምስ።

¹¹ ጳዉሎስ ኦዳይሳ አሳይ በእድ ባንታ ቃላ ቁ ኦድ ልቃኦና ዶናን፥ “ፆሳት አሰ ዳንድ ኑኮ ዎዶሶና” ያግዶሶና።

¹² ባርናባሳ፥ “ድያ” ግድ፥ ጳዉሎስ ኦዳን ዋናትያ ግሾ፥ እያ፥ “ሄርመና” ግድ ሱንዶሶና።

¹³ ካታማፐ ጋፃን ደእያ ኤቃ ድያ ኬ ካህነይነ አሳይ ኮርማታነ አሌቆ ጪሻታ ሀዋረታስ ያርሻናዉ ኮይድ ካታማ ፐንገ ኤህዶሶና።

¹⁴ ሽን ባርናባስነ ጳዉሎስ ሄሳ ስእዳ ዎደ ኤንቲ ኦናዉ ቆፕዳይሳ እፅድ፥ ባንታ ማኡዋ ፔዶሶና። አሳ ግዶ ዎፅ ገልድ፥

¹⁵ ባንታ ቃላ ቁ ኦድ፥ “አሳዉ፥ ሀይሳ አይስ ኦቲ? ኑካ ህንተ መላ አሰ። ሀ ፓናባፐ ሳሎነ ሳአ፥ አባነ ኤንታ ግዶን ደእያ ኡባባ መዳ ደኦ ፆሳኮ ህንተ ስማና መላ ህንተዉ ኑኒ ዎንገላ ኦዶስ።

¹⁶ እ፥ በን አሳይ ባንታ ኦገ ባና መላ የድ አግስ።

¹⁷ ሽን እራ ሳሉዋፐ ቡክስስ፥ ካካ ዎድያን ዎድያን እሚስ፥ ካ እምድ ህንተና ዳሮ ኡፋይስስ፥ ያትድ ህንተዉ ሎኦባ ኦድ ባዉ ማርካ ይስቤና” ያግዶሶና።

¹⁸ ሀዋረት ሄሳ ግድ፥ ባንታዉ አሳይ ያርሾና መላ ዋይድ ድግዶሶና።

¹⁹ አንፆከፐነ እቆንዮነፐ ይዳ አይሁደት፥ አሳ ባንታ ባጋ ዛሪድ ሹቻን ጳዉሎሳ ጫድዶሶና። እ ሀይቅዳባ ዳንን ካታማፐ ጋፃ ጎች ኤፍድ የግዶሶና።

²⁰ ሽን አማነይሳት ይድ፥ እያ ዩሾን ኤቅዳሽን እ ደንድድ ካታማ ገልስ። ዎንተ ጋላስ ባርናባሳራ እስፈ ዳርበ ብስ።

ጳዉሎስነ ባርናባስ ሶረ አንፆከ ስሙዋ

²¹ ኤንቲ ዳርበ ካታማን ዎንገላ ኦድድ ዳሮታ አማንዳፐ ጉየ ልስፅራ፥ እቆንዮነነ ጵስደን ደእያ አንፆከ ስምዶሶና።

²² ያን አማነይሳታ ምንሸነ ኤንቲ አማኖን ምንድ ደአና መላ ዞርሸ፥ “ፆሳ ካዎተ ገላናዉ ኑኒ ዳሮ ዋየ ኤካናዉ በሴስ” ያግድ ታማርስዶሶና።

²³ ቃስ ዎሳ ኬታስ ሁጰን ሁጰን ጭማታ ዶርዶሶና። ፆምዳፐነ ዎስዳፐ ጉየ ኤንቲ አማንዳ ጎዳስ ኤንታ ሀዳራ እምዶሶና።

²⁴ ጵስደ ቢታ ካን አድ ጵንፍለ ብዶሶና።

²⁵ ጰርገን ቃላ ኦድዳፐ ጉየ አፃለ ብዶሶና።

²⁶ ባንታ ኦሱዋ ፖልዳፐ ጉየ፥ አፃለፕ ፆሳ አ ኬሀተስ ኤንታ ሀዳራ እምዳ አንፆከ ማርካበራ ጉየ ስምዶሶና።

²⁷ አንፆከ ጋክዳ ዎደ ዎሳ ኬ አሳ ሺሽድ ፆሳይ ኤንታራ ኦዳ ኦሱዋ ኡባነ አይሁደ ግዶና አሳይ አማናና መላ ኤንታዉ ዋት ፐንገ ዶይዳኮ ኦድዶሶና።

²⁸ ሄሳን አማነይሳታራ ዳሮ ዎደ ጋምእዶሶና።