ሃዋሬታ ኦሱዋ 13 - ጌሻ ማፃፋ

ባርናባሳነ ሳኦላ

¹ አንፆከን ደእያ ዎሳ ኬን ናበትነ አስታማረት ደኦሶና። ኤንቲ ባርናባሳ፥ ካሬ ጌተትያ ስሞና፥ ቀሬናፐ ይዳ ሉክዮሳ፥ ካዋ ሄሮዲሳራ ድጭዳ ምናሄነ ሳኦላ።

² ኤንቲ ጎዳ ጎይንሽንነ ፆምሽን ጌሻ አያናይ፥ “ታኒ ፄግዳ ኦሱዋስ ባርናባሳነ ሳኦላ ታዉ ዱማይተ” ያግስ።

³ ሄሳ ግሾ፥ ኤንቲ ፆምዳፐነ ዎስዳፐ ጉየ ባንታ ኩሽያ ኤንታ ቦላ ዎድ የድዶሶና።

ባርናባስነ ሳኦል ቆጵሮሳን

⁴ ሄሳ ግሾ፥ ጌሻ አያናይ ኤንታ ኪትስ። ሰለዉቀ ብዶሶና፤ ያፐ ማርካበን ገልድ ቆጵሮሳ ሃን ተቀትዳ ቢታ ብዶሶና።

⁵ ኤንቲ ስልማና ጋክድ አይሁደ ዎሳ ኬታን ፆሳ ቃላ ኦድዶሶና። ዮሃንስ ማድሸ ኤንታራ ደኤስ።

⁶ ኤንቲ ዩሾይ አባን ተቀትዳ ቢታ፥ ቆጵሮሳ ካንድ ጳፉ ጋክያ ዎደ፥ እስ ዎርዳንቾ ናብያ፥ ባር-የሱሳ ጌተትያ አይሁደ ማሩዋ ደምዶሶና።

⁷ ሄ ማሮይ ደርያ አይስያ ሳርግዮስ ጳዉሎሳ ጌተትያ አኬካንቾ አድያራ ደኤስ። ሳርግዮስ ጳዉሎስ ባርናባሳነ ሳኦላ ባኮ ፄግድ ፆሳ ቃላ ስአናዉ ኮይስ።

⁸ ሽን ግርከ ዶናን ማሩዋ ሱንይ “ኤልማሳ” ጌተቴስ። እ ደርያ ሃረይስ አማኖና መላ ድጋናዉ ኮይድ ባርናባሳራነ ጳዉሎሳራ ኤቀትስ።

⁹ ሽን ጳዉሎሳ ጌተትያ ሳኦል ጌሻ አያናን ኩምድ ማሩዋ ጫድ ፄልድ፥

¹⁰ “ላ፥ ፃላሄ ናአዉ፥ ኢታተ ኡባይ ኩምዳይሶ፥ ፅሎተ ኡባስ ሞርክያዉ፥ ሱረ ጎዳ ኦግያ ምርቀይሳ አግኪ?

¹¹ ሄኮ፥ ሀእ ጎዳ ኩሸይ ነ ቦላ ደኤስ። ኔኒ ቆቀ ግዳና፤ ጉ ዎደስ አዋ ፖኦ በአካ” ያግስ። ኢራ ጫጋንነ ሚ እያ አይፍያ ጎዝን፥ ባ ኩሽያ ኦይክድ ካለያ አስ ኮይሸ ዩይስ።

¹² ደርያ አይሰይስ ሄሳ በእዳ ዎደ ጎዳባ ታማርስያ ትምርትያን ማላለትድ አማንስ።

ባርናባስነ ጳዉሎስ ጵስደ አንፆከን

¹³ ጳዉሎስነ እያራ ደኤይሳት ጳፉፐ ደንድድ፥ ጵንፍለን ደእያ ጳርገ ማርካበራ ብዶሶና። ዮሃንስ ኤንታፈ ሻከትድ የሩሳላመ ስምስ።

¹⁴ ሽን ኤንቲ ጳርገፈ አድ ጵስደን ደእያ አንፆከ ጋክዶሶና። ሳምባታ ጋላስ አይሁደ ዎሳ ኬ ገልድ ኡትዶሶና።

¹⁵ ሙሰ ህገይነ ናበታ ማፃፋይ ናባበትዳፐ ጉየ አይሁደ ዎሳ ኬ ሀላቃት፥ “ኑ እሻቶ፥ አሳ ምንያ ቃል ህንተዉ ደእያኮ አሳስ ኦደርከት” ያግድ ኤንታኮ ኪትዶሶና።

¹⁶ ጳዉሎስ ደንድ ኤቅድ ባ ኩሸ ማልድ፥ “እስራኤለ አሳቶነ፥ ፆሳ ጎይንያ አይሁደ ግዶና አሳዉ፥ ስእተ።

¹⁷ ሀ እስራኤለ አሳ ፆሳይ ኑ ማይዛታ ዶርስ። ግብፀ ቢታን እማተን ኤንቲ ደእሽን፥ ኤንታ ዳርስድ ባ ግታ ዎልቃን ግብፀ ቢታፈ ኤንታ ከስስ።

¹⁸ መላ ቢታን ኦይታሙ ላይ መላ ኤንታ ዳንዳእስ።

¹⁹ ካናነ ቢታን አይሁደ ግዶና ላፑን ካዎተታ ድግድ ኤንታ ቢታ ባ አሳ ላትስስ።

²⁰ “ሄሳፈ ጉየ፥ ናብያ ሳሜላ ዎደ ጋካናዉ ኦይዱ ፄታነ እሻታሙ ላይ መላ አይስያ ዳይናታ ኤንታዉ እሚስ።

²¹ ሄሳፈ ጉየ፥ ኤንቲ ባንታዉ ካዎ እማና መላ ዎስን፥ ፆሳይ ብንያመ ሼሻፐ ቂሳ ናኣ፥ ሳኦላ ኦይታሙ ላይ ካዎታና መላ ኤንታዉ እሚስ።

²² ፆሳይ ሳኦላ ሻርዳፐ ጉየ ኤንታ ቦላ ዳዊታ ካዎስ። ፆሳይ ዳዊታባ ማርካትሸ፥ ‘ታኒ ኮይያ ኡባ ታ ዎዛና መላ ኦያ እሰየ ናኣ ዳዊታ ደማስ’ ያግስ።

²³ “ፆሳይ፥ ‘ታኒ ዳዊታ ሼሻፐ እስራኤለ ደርያ አሸይሳ ኤሀና’ ግዳይሳ መላ የሱሳ ኤህስ።

²⁴ የሱሲ ያናፐ ስን እስራኤለ አሳ ኡባይ ባንታ ናጋራፐ ስሚድ ፃማቀታና መላ ዮሃንስ ቃላ ኦድስ።

²⁵ ቃስ ዮሃንስ ባ ኦሱዋ ዉርሳና ሀንሸ አሳኮ፥ ‘ታና ኦና ግድ ቆፔቲ? ታኒ ህንተ ናግያ ክርስቶሳ ግድከ፥ ሽን ታኒ እያ ጫማ ብርሻናዉ ታዉ በሶናይስ ታፐ ጉየራ ዬስ’ ያግስ።

²⁶ “ታ እሻቶ፥ አብራሃመ ሼሻቶ፥ ቃስ ሀይሳን አይሁደ ግዶናሽን ፆሳስ ያየይሳቶ፥ ሀ አቶተ ቃላይ ኑስ ኪተትስ።

²⁷ አይስ ጊኮ፥ የሩሳላመን ደእያ አሳይነ ኤንታ ሀላቃት የሱሳ ኤርቦኮና። ሳምባታ ኡባን ናባበትያ ናበታ ቃላ አኬክቦና ግሾ እያ ቦላ ፕርድድ ናበት ኦድዳ ቃላ ፖልዶሶና።

²⁸ የሱሳ ዎሳናዉ እስ ጋሶይካ ኤንታዉ ይን ጵላፆስ እያ ዎና መላ ዎስዶሶና።

²⁹ ኤንቲ የሱሳባይ ጌሻ ማፃፋን ፃፈትዳባ ኡባ ፖልዳ ዎደ ማስቃልያፐ እያ ዎስድ ሞግዶሶና።

³⁰ ሽን ፆሳይ ሀይቆፐ የሱሳ ደንስ።

³¹ ሄሳፈ ጉየ፥ እ ባራ ጋልላፐ የሩሳላመ ይዳይሳታስ ዳሮ ቶሆ በንትስ። ኤንቲ ሀእ እያባ አሳስ ማርካቶሶና።

³² “ፆሳይ ኑ አዋታስ እማና ግዳ ዎንገላ ኑኒ ህንተዉ ኦዶስ።

³³ ዳዊቲ ባ ማዝሙረ ማፃፋን ናምአን ሸምፑዋን፥ “ኔኒ፥ ታ ናአ፥ ታኒ ሀች ነና የላስ” ጌተትድ ፃፈትዳይሳ የሱሳ፥ ፆሳይ ሀይቆፐ ደንድ ኑ ማይዛታስ እማና ግዳይሳ ኑስ ኤንታ ናይታስ ፖልስ።

³⁴ እ ዎቆና መላ ፆሳይ ሀይቆፐ እያ ደንን ኤርሳናዉ፥ “ ‘ታኒ ዳዊታስ እማና ግዳ አማነትዳ ጌሻ አንጁዋ ህንተዉ እማና’ ያግድ ኦድስ።

³⁵ ሄሳ ግሾ፥ ማዝሙረ ማፃፋን ሀራ በሳን፥ “ ‘ነ ጌሻ ናኣ አሀ ዎቅሳካ’ ያጌስ።

³⁶ “ዳዊቲ ባ ዎደ ፆሳ ቆፋ ፖልዳፐ ጉየ ሀይቅድ ባ አዋታራ ሞገትድ ዎቅስ።

³⁷ ሽን ፆሳይ ሀይቆፐ ደንዳይስ ዎቅቤና።

³⁸ “ሄሳ ግሾ፥ ታ እሻቶ፥ ናጋራ አቶተይ የሱሳ ባጋራ ካሰትድ ህንተዉ ኦደትዳይሳ ኤርተ። ሙሰ ህገይ ናጋራፐ ፅልሳናዉ ዳንዳኤና።

³⁹ ሽን የሱሳ አማንያ ኡባይ ናጋራፐ ፅሌስ።

⁴⁰ ሄሳ ግሾ፥ ናበት ግዳይስ ህንተ ቦላ ጋኮና መላ ናገትተ።

⁴¹ “ ‘ፆሳይ ግዳባ ለቅሰይሳቶ! በእተ! ማላለትተ! ይተ! ኦንካ ኦድን፥ ህንተ አማኖና ኦሱዋ ታኒ ህንተ ዎድያን ኦና’ ” ያግስ።

⁴² ጳዉሎስነ ባርናባስ አይሁደ ዎሳ ኬፈ ከይሽን፥ ካልያ ሳምባታን ሄሳ ጉጅድ ኦዳና መላ አሳይ ኤንታና ዎስዶሶና።

⁴³ ሺቆይ ላለትዳፐ ጉየ፥ ዳሮ አይሁደትነ አይሁደታ አማኑዋን ገልድ ፆሳ ጎይንያ ዳሮት ጳዉሎሳነ ባርናባሳ ካልዶሶና። አማንዳይሳት ፆሳ አ ኬሀተን ምንድ ዳና መላ ኤንታ ዞርዶሶና።

⁴⁴ ካልያ ሳምባታን ካታማን ደእያ አሳፐ ዳሮት ፆሳ ቃላ ስአናዉ ሺቅዶሶና።

⁴⁵ ሽን አይሁደት ዳሮ አሳ በእዳ ዎደ ጳዉሎሳ ቃናትድ እያ ሃሳያ እፅድ እያ ጫይዶሶና።

⁴⁶ ጳዉሎስነ ባርናባስ ያዮና፥ “ፆሳ ቃላይ ኮይሮትድ ህንተዉ ኦደታናዉ ኮሼስ። ሽን ህንተ ቃላ እፅድ መርና ደኡዋ ኤካናዉ ኑስ በሰና ግድ ህንተ፥ ህንተ ሁጰን ፕርድዳ ግሾ ህዛ ኑኒ አይሁደ ግዶናይሳታኮ ስሞስ።

⁴⁷ ጋሶይካ ጎዳይ፥ “ ‘አላመ ኩመይ ነ ባጋራ አታና መላ፥ ታኒ ነና አይሁደ ግዶና ደርያስ ፖኦ ኦስ’ ያግድ ኑና ኪትስ” ያግዶሶና።

⁴⁸ አይሁደ ግዶናይሳት ሄሳ ስእዳ ዎደ ኡፋይትድ ፆሳ ቃላ ቦንችዶሶና። ቃስ መርና ደኡዋስ ዶረትዳ ኡባይ አማንዶሶና።

⁴⁹ ጎዳ ቃላይ ሄ ቢታ ኡባ ጋክስ።

⁵⁰ ሽን አይሁደት፥ አይሁደ ግዶና ፆሰ ጎይንያ ዱረ ማጫሳታነ ካታማን ደእያ ግታ አሳታ ጳዉሎሳ ቦላነ ባርናባሳ ቦላ ደንዶሶና። ሄ አሳት ኤንታ ጎዳ ዶምድ ባንታ ቢታፈ ከስዶሶና።

⁵¹ ሽን ጳዉሎሳራነ ባርናባሳራ እፀይሳታስ ማላ ግዳና መላ ባንታ ቶሁዋፐ ባና ፕትድ እቆንዮነ ካታማ ብዶሶና።

⁵² ቃስ አንፆከን ደእያ አማነይሳት ጌሻ አያናንነ ኡፋይሳን ኩምዶሶና።