ሃዋሬታ ኦሱዋ 12 - ጌሻ ማፃፋ

ጰፅሮስ ቃሾ ኬፈ ከስ ኤክስ

¹ ሄ ዎደ ካዎይ ሄሮዲስ ዎሳ ኬ አሳፐ ባጋ ጎዳ ዶምስ።

² ዮሃንሳ እሻ ያይቆባ ማሻን ዎስስ።

³ ሄስ አይሁደታ ኡፋይስዳይሳ በእድ፥ ጉጅድ ጰፅሮሳካ ኦይስ። ሄስ ሀንዳይ ፓስካ ባኣለ ቦንችያ ጋላሳታና።

⁴ ጰፅሮሳ ኦይክድ ቃችስ። ፓስካ ቦንችያ ጋላሳታፐ ጉየ ደርያ ስን አናዉ ቆፕድ፥ ኦይዱ ኦይዱ ዎታዳረት እያ ናጋና መላ ታማነ ኡሱፑን ዎታዳረታስ አድ እሚስ።

⁵ ሄሳ ግሾ፥ ጰፅሮስ ቃሾ ኬን ናገቴስ። ሽን ዎሳ ኬ አሳይ እያዉ ምንድ ፆሳ ዎሶሶና።

⁶ ሄሮዲስ ጰፅሮሳ አሳ ስን ሺሻናፐ ካሰ ቃማ ጰፅሮስ ናምኡ ባጋራ ናምኡ ዎታዳረታራ ሳንላታን ቃሸትድ ኤንታ ግዶን ስክስ። ናገይሳት ቃሾ ኬ ፐንገታን ኤቅድ ናጎሶና።

⁷ አኬኮና ደእሽን ጎዳ ኪታንቾይ ቆንጭስ። ቃሾ ኬን ፖኦይ ፖእስ። ኪታንቾይ ጰፅሮሳ ምያ ቦች ባርክስድ፥ “ኤለ ደንዳ” ያግስ። ኢራካ ሳንላታይ እያ ኩሽያፐ ዎ አግስ።

⁸ ኪታንቾይ እያኮ፥ “ነ ማኡዋ ማአ፥ ነ ጫማካ አ” ያግስ። ጰፅሮስ ሄሳዳ ኦስ፤ ኪታንቾይ፥ “ነ ላፃና ማአዳ ታና ካላ” ያግስ።

⁹ ጰፅሮስ ቃሾ ኬፈ ከይድ ኪታንቹዋ ካልስ። እያዉ ቆንጨ በእያባ ዳንስፐ አትሽን፥ ኪታንቾይ ኦያባይ ቱማ ዳንቤና።

¹⁰ ኪታንቾይነ ጰፅሮስ ኮይሩዋነ ናምአን ዎታዳርያ አድ ካታማ ኤፍያ ብራታ ፐንግያኮ ጋክዶሶና። ፐንገይ ኤንታዉ ባርካ ዶየት አግስ። ኤንቲ ከይድ እስ ኦግያራ ብሽን ኪታንቾይ አኬኮና ጰፅሮሳፐ ሻከት አግስ።

¹¹ ጰፅሮሳስ ዎዛን ስምን፥ “ታና ጎዳይ ባ ኪታንቹዋ ኪትድ፥ ሄሮዲሳ ኩሸፐነ ናግድ ኡትዳ አይሁደ አሳ ኡባፈ አሽዳይሳ ሀእ ቱማ ኤራስ” ያግስ።

¹² እ ሄሳ አኬክዳ ዎደ ዳሮ አሳይ እስፈ ሺቅድ ፆሳ ዎስያ በሳ፥ ማርቆሳ ጌተትያ ዮሃንሳ አየ ማይራም ሶ ብስ።

¹³ ያን ካረን ኤቅድ ፄግስ። እስ ሮዳ ጌተትያ ኦሳንችያ ፐንግያ ዶያናዉ ያሱ።

¹⁴ ሮዳ ጰፅሮሳ ቃላ ግድዳይሳ ኤርዳ ዎደ ኡፋይሳን ኩማዳ ካርያ ዶየና ጉየ ዎፃ ባዳ፥ “ጰፅሮስ ካረን ኤቅስ” ያጋዳ አሳስ ኦዳሱ።

¹⁵ አሳይ ኢኮ፥ “ኔኒ ጎያይ!” ያግዶሶና። ሮዳ ጰፅሮሳ ግድዳይሳ ጌሻዳ ኦዳሱ። ኤንቲ፥ “ሄስ እያ ናግያ ኪታንቹዋ” ያግዶሶና።

¹⁶ ሽን ጰፅሮስ ካረን ኤቅድ ፄግድ አጎና እፅን አሳይ ካርያ ዶይድ እያ በእድ ማላለትዶሶና።

¹⁷ ሽን ኤንቲ ስእ ጋና መላ ጰፅሮስ ባ ኩሽያን ማልድ ጎዳይ ቃሾ ኬፈ እያ ዋት ከስዳኮ ኤንታዉ ቆንጭስ ኦድድ፥ “ሀይሳ ያይቆባስነ አማንያ አሳታስ ኦድተ” ግድ ያፐ ከይድ ሀራሶ ብስ።

¹⁸ ሳአይ ዎንትያ ዎደ፥ “ጰፅሮስ አዉ ብደ” ግድ ዎታዳረት ዎል ግዶን ዳሮ ካጭዶሶና።

¹⁹ ሄሮዲስ ጰፅሮሳ ኮይስን፥ እ ይዳ ዎደ ናገይሳታ ቆርድ፥ ኤንታ ዎና መላ ኪትስ። ሄሳፈ ጉየ፥ ሄሮዲስ ይሁዳፐ ቅሳረ ዎድ ያን ጉ ዎደ ኡትስ።

ሄሮዲሳ ሀይቁዋ

²⁰ ሄሮዲስ ፅሮሳ አሳ ቦላነ ስዶና አሳ ቦላ ዳሮ ሀንቀትስ። ኤንታ ቢታይ ካ ሄሮዲሳ ቢታፈ ደምያ ግሾ ኤንቲ እስፈ ግድድ እያ ሞርና ብላስፆሳ ባንታዉ ጭማ ኦድ ጊጋናዉ ሄሮዲሳኮ ብዶሶና።

²¹ ሄሮዲስ ባርዳ ጋላሳን ባ ካዎተ አፍላ ማእድ፥ አራታ ቦላ ኡትድ አሳስ ኦድስ።

²² አሳይ፥ “ሄስ ፆሳ ቃላ፥ አሳ ቃላ ግደና” ያግድ ዋስዶሶና።

²³ ሄሮዲስ ፆሳ ቦንችቦና ግሾ ኢራካ ጎዳ ኪታንቾይ እያ ደችን ጉፁነን ሜተትድ ሀይቅስ።

²⁴ ሽን ፆሳ ቃላይ ድጭሸነ ዳልግሸ ቤስ።

²⁵ ባርናባስነ ሳኦል ባንታ ኦሱዋ ፖልድ ማርቆሳ ጌተትያ ዮሃንሳ ባንታራ ኤክድ የሩሳላመፐ ስምዶሶና።